Pele erseqqissaasoq: Milliardinik nalilinnik isumaqatigiissuteqarnissaq suli isumaqatiginninniutigineqarpoq
Naalakkersuisut Kalaallit Nunaanni danskit droniinik atuisoqarnissaa illersornissamullu ilinniartitsisoqarnissaa itigartinnikuunngilaat, nunanut allanut naalakkersuisoq erseqqissaavoq.
Nunanut allanu Naalakkersuisoq, Kalaallit Nunaanni danskit illersuiniarnerminnik nukittorsaaniarnerat pillugu ulluni kingullerni oqallitsitsisimavoq.
Pele Brobergi (N) TV2-mut sapaatip akunnerani kingullermi sapaatikkut oqarpoq, danskit Kalaallit Nunaanni nakkutilliinissamut droninik ungasissumut ingerlasinnaasunik atuinissamik aamma illersornissamut ilinniartitsinissamik pilersaaruteqarnerat, Naalakkersuisut sakkulersortoqannginnissaanik isumaqatigiissutaannut akerliusut:
- Naalakkersuisuusimasut Inatsisartuni amerlanerussuteqalaaginnartut imaassinnaavoq tusarniarneqarsimasut. Naalakkersuisunngortulli nutaat tamanna pillugu oqaloqatigineqarsimanngillat. Sakkulersortoqannginnissaa pillugu erseqqissumik periusissiaqarpugut, aamma Kalaallit Nunaanni dronit atorneqarnissaat, illersornissamut ilinniartitsisoqarnissaa danskilluunniit sakkutuuisa nunatsinniinnissaat soqutigisarinngilarput, Nunanut allanut Naalakkersuisoq Pele Broberg TV2-mut oqarsimavoq.
Danskit naalakkersuisuinit paasineqartutut misigisimasoq
Pele Brobergip oqaatigaa, oqaaseqaatigisimasani Naalakkersuisut isumaqatigiissummut itigartitsisimanerattut paasineqarsimasoq. Naalakkersuisulli itigartitsisimanngillat, Pele Broberg pingasunngormat tusagassiorfinnut nalunaaruteqarluni erseqqissaavoq:
- Naalakkersuisoq isumaqatigiissummut illersornissamut ministerimut itigartitsilluni nalunaaruteqarnikuunngilaq. Naalakkersuisullu Naalakkersuisunngortut nutaat pingaartitaanni anguniakkat pillugit apuussinerani paasinninneq annertusoq misigalugu, taakkununnga ilaalluni sakkutuunik ilinniartitsisinnaanerup sakkutuujunngitsunut sammitillugu ilinniartitsisinnaanernut, tusagassiorfinnut nalunaarummi allassimavoq.
Tusagassiorfinnut nalunaarummi ilanngullugu allassimavoq, Pele Brobergip Danmarkimi Illersornissamut ministeri Trine Bramsen pitsaasumik isumalluarnartumillu Danmarkip issittumi piginnaasaqarnerulernissamut isumaqatigiissutaa pillugu oqaloqatigiinnerit ataavartut ingerlakkai.
Sermitsiaq.AG-mit PeleBroberg pisoq pillugu kiisalu Naalakkersuisut Siulittaasuat Múte B. Egede Pele Brobergip oqaaseqaatai pllugit oqaaseqartinniarneqarsimagaluarput.
Siulittaasorli naalagaaffeqatigiit ataatsimeeqatigiinnissaannut atatillugu angalanini pissutigalugu apersorneqarnissamut piffissaqarsimanngilaq, siulittaasup allattaa paasissutissiisimavoq.