Pele danskit isumaqatigiissutaannut milliardinik nalilimmut akerliusoq
Folketingip issittumi piginnaasanik annertusaanissap ilaatut Kalaallit Nunaanni dronit atorlugit nakkutilliinissamut imaluunniit illersornissamut ilinniartitsisoqarnissaanut 1,5 milliarder koruuninik immikkoortitsisimanerat Naalakkersuisunit soqutigineqanngilaq. Taamatut oqarpoq nunanut allanut naalakkersuisoq.
Danmarkip Kalaallit Nunaannik illersuinerminik 1,5 milliarder koruunit nalingannut annertusaaniarnera Naalakkersuisunit akuersaarneqannngilaq.
Nunanut allanut Naalakkersuisoq Pele Broberg (PN) taamatut TV2-mut oqarpoq.
1,5 milliarder koruunit issittumi piginnaasanik annertusaanimmut immikkoortinneqarsimapput, Folketingimilu partiit aningaasat qanoq atorneqassanersut februaarip qaammataani isumaqatigiissutigaat.
Ilaatigut Kalaallit Nunaanni dronit satellitsillu atorlugit annertusisamik nakkutilliinermut aningaasat atorneqassapput - nakkutilliisoqarnerunissaanik USA ujartuisimammat. Tamatuma saniatigut Kalaallit Nunaanni innuttaasut Kalaallit Nunaannik illersuinermt peqataasinnaanerat annertusarniarlugu illersornissamut ilinniartitaanissaq isumaqatigiissummut ilaatinneqarpoq.
Piginnaasanik annertusaanissami pineqarput
- Suliaqarnermi silamut sunniutaasartut annikillisarniarlugit dronit satellitsillu atorneqarnerusassapput. Dronit ungasissumut timmisinnaaasut atorlugit silaannakkut nakkutilliinissamut 750 millioner koruunit immikkoortinneqarsimapput.
- Savalimmiuni kallerisaarummik radariliisoqassaaq, tassunga 390 millioner koruunit immikkoortinneqarsimapput.
- Kalaallit Nunaanni illersornissamut ilinniartitaaneq nutaaq Naalakkersuisut suleqatigalugit aallartinneqassaaq. Ilinniartitaanerup Kalaallit Nunaanni innuttaasut Kalaallit Nunaata illersorneqarneranut peqataasinnaalissapput. Tassung 50 millioner koruunit immikkoortinneqarsimapput.
- Satellitsikkut nakkutilliinissamut 82 millioner koruunit, sineriammi radarinut 20 millioner koruunit droninullu mikinerusunut 60 millioner koruunit immikkoortinneqarsimapput.
- Partiinit kissaatigineqarsimavoq, aningaasaliissutit nutaat sapinngisamik Danmarkimi, Savalimmiuni Kalaallillu Nunaanni suliffissuaqarnermut illersornissatigullu suliffissuaqarnermut iluaqutaassasut – tassa najukkani suliffissanik pilersitsissasut, nunaqavissunik sulisoqarnermut atorneqassasut aamma Kalaallit Nunaanni Savalimmiunilu ineriartortitsinermut tapertaassasut.
- Isumaqatigiissut aamma inuinnarnut iluaqutaassaaq. Illersornissaqarfiup assersuutigalugu annaassiniartarluni, upalungaarsimasutut suliaqartarluni avatangiisinillu nakkutiginnittarluni inuiaqatigiinnut sullissisarnera nukittorsarneqassaaq.
Pissarsiffik: Illersornissamut Ministeeriaqarfik.
Isumaqatigiissutip Folketingimi inissinneqarnerata kingorna Nunatsinni qinersisoqarmat nutaanik Naalakkersuisoqalernikuuvoq, nunanullu allanut naalakkersuisoq isumaqatigiissummut isorinnilluni:
- Naalakkersuisuusimasut Inatsisartuni amerlanerussuteqalaaginnartut imaassinnaavoq tusarniarneqarsimasut. Naalakkersuisunngortulli nutaat tamanna pillugu oqaloqatigineqarsimanngillat. Sakkulersortoqannginnissaa pillugu erseqqissumik periusissiaqarpugut, aamma Kalaallit Nunaanni dronit atorneqarnissaat, illersornissamut ilinniartitsisoqarnissaa danskilluunniit sakkutuuisa nunatsinniinnissaat soqutigisarinngilarput, Nunanut allanut Naalakkersuisoq Pele Broberg TV2-mut oqarpoq.
Savalimmiuni radari pillugu oqallinneq
Pele Brobergip TV2-mit oqaloqatigineqarnermini isornartorsiorpaaa, isumaqatigiissutip Folketingimi danskit partiivinit suliarineqarsimanera, tassa Danmarkip illersornissamut, nunanut allanut sillimaniarnermullu politikki akisussaaffigimmagu.
Savalimmiuni aamma Issittumi piginnaasanik annertusaaniarneq oqallisaasimaqaaq, Folketingimi politkkerit Savalimmiuni kallerisaarummik radariliinissamut 390 millioner koruuninik immikkoortitsisimanerat pissutigalugu.
Illersornissamut ministerip Stine Bramsenip tassunga atatillugu erseqqissaassutigisimavaa, Savalimmiormiut pilersaarummut aatsaat akuersaassappata kallerisaarummik radariliisoqassasoq.
Partiimit Enhedslistenimit piginnaasanik annertusaanissaq pillugu isumaqatigiissuteqartoqareersoq Kalaallit Nunaata Savalimmiullu peqataatinneqarnissaat sammineqarpoq:
- Suliassami taamak pingaaruteqartigisumi isumaqatiginninniarnermut Atlantikup Avannaanni suleqativut marluk isumaqatiginninniartussanit ministerimillu qaaqquneqarsimannginnginerat kanngusuusaarnarpoq, Enhedslisten sinnerlugu folketingimi ilaasortaq Christian Juhl tusagassiorfinnut nalunaaruteqarnermi allappoq.
Naalakkersuisooqatigiit partiiat Inuit Ataqatigiit sinnerlugit folketingimi ilaasortaq Aaja Chemnitz Larsen isumaqarpoq, Naalakkersuisut ilisimatinneqarsimammata aamma pilersaarutit Folketingip Kalaallit Nunaannut ataatsimiititaliaani oqaluuserineqarsimammata, isumaqatiginninniarnermut Kalaallit Nunaat ilaatigut peqataatinneqarsimasoq.