Pele Broberg: Suleqatissakka tassaapput Danmarkimi naalakkersuisut

Pele Brobergip Aaja Chemnitz Larsenimik ataatsimmeqateqarnissamik itigartitsisimanini tupinnartuunginnerarpaa, ataatsimeeqatiserineqarnermut itigartitsisimanera aviisip AG-p isornartorsiorsimavaa.

Pelep Aajamut akissutaa:

Pilluaqqussutinnut tigulluarneqarsimasumut qujanarujussuaq.

Maanna Naalakkersuisooqataalerpunga, Nunatsinnilu Naalakkersuisunut ilaalerlunga, Naalakkersuisullu anguniagaat naammassiniarlugit sulinissannut qilanaarlunga. Inatsisartuni ilaasortaaninni pingaartissimavara, inatsisartut akornanni (inatsisartut assigiinngitsut) suleqatigiinerup aamma naalakkersuisut akornanni suleqatigiinnerup immikkoortinneqartarnissaat.

Nunanut allanut tunngasutigut isumannaallisaanermilu politikkimut tunngasutigut suleqatigisartagassakka oqaloqatigisartagassakkalu tassaapput nunanit allani naalakkersuisut saniatigut Danmarkimi naalakkersuisut. Inatsissartoqarnermut atatillugu Inatsisartut Nunanut allanut Sillimaniarnermullu Ataatsimiitaliaat (USPU) oqaloqatigisarlugulu suleqatigisussaavara.

Suleqatigiinneq taanna pingaartillugulu ataqqivara. Danmarkip folketingiani sulavit ingerlateqqinnissaanut iluatsitsilluarnissat kissaatigaara, neriuutigaaralu Inatsisartuni inatsisartoqarnikkut suleqatitit suleqatigilluarumaaritit.

Pele Brobergip Sermitsiaq.AG-mut ilisimatitsissutigaa, naalakkersuinikkut suliani Christiansborgimi naalakkersuisunut toqqaannartumik ingerlatittartussaallugit.

- Danmarkimi naalakkersuisunik qanimut pitsaasumillu suleqateqarnera pingaartitaraara. Taamaammat aamma suliamma tugassiorfiit aqqutigalugit allatulluunniit iliorluni qajannarsisinneqarsinnaanerat mianersuuppara, Pele Broberg oqarpoq.

Ataatsimeeqateqarnerup folketingimi sulineq nukittorsassavaa

Aaja Chemnitz Larsen isumaqarpoq, ataatsimeeqatigiinnerup Folketingimi sulinera iluaqusissagaa.

- Kalaallinut folketingimi ilaasortaasunut pingaaruteqarpoq, Kalaallit Nunaanni politikkikkut ingerlatsinermik malinnaanissaq, taamaalilluni danskit folketingianni Kalaallit Nunaannut tunngassuteqartut pitsaanerpaamik suliarineqarsinnaammata, taanna aviisimut AG-mut oqarpoq.

Aaja Chemnitz Larsenilu kisiartaanngilaq nunanut allanut politikkeqarnermut aamma Naalakkersuisut Issittumut atatillugu periusissiaannut tunngatillugit Pele Brobergip pilersaarutaanik ilisimatinneqarusuttoq.

Aleqa Hammondip (NQ) Danmarkimi tusagassiorfik Altinget Arktis aqqutigalugu, Issittumi ineriartortitsinissaq pillugu Kalaallit Nunaata isumaani naalakkersuisut avammut saqqummiussisarnerat isornartorsiorsimavaa.

Pele Brobergilu tassunga atatillugu aamma tunngavissaqarluarluni isumaqarpoq.

- Naalakkersuisooqatigiinnissamik isumaqatigissummi allassimavoq, Inatsisartuni partiit tamaasa sapinngisamik naapeqatiginiarneqartassasut. Tamanna anguneqarsinnaanngilaq tusagassiorfiit aqqutigalugit isumaqatiginninniarnikkut imaluunniit siunnersuummik naammassillugu suliaasimasumik, arlaannaataluunniit oqaaseqarfigissallugu periarfissaqarfiginngisaanik saqqummiussinikkut, Pele Broberg oqarpoq.

Inatsisartut peqataatinneqartussaasut

Pele Brobergip erseqqissaassutigaa, nunap nunanut allanut atatillugu periusissiassaanik isumaqatiginninniarnerit, tassunga ilanngullu issittumut tunngassuteqartut, Inatsisartut ataatsimeerat aallartippat, Inatsisartut ataatsimiititaliaanni suliarineqartussaasut. Inatsisartullu ataatsimiinnissaat Pele Brobergip maannakkorpiaq piareersarfigaa.

- Inatsisartut ataatsimiinnissaannut, qanittukkut aallartittussamut piareersaalluta maannakkorpiaq ulapputeqarpugut, taanna oqarpoq.

Ukiakkut ataatsimiinnissamut siunnersuutinik tunniussiffissaq kingulleq tassaavoq, sapaatip akunnerani matumani tallimanngorneq.

Brobergip oqaatigaa, suliat ilaannut tunngatillugu piffissaalatsineq pissutigalugu partiinik tamananik peqataatitsiniarneq ajornarsimasoq, ataatsimiinnerlu septembarip 24-ani aallartippat, qinigaaffik manna naallugu atuuttsussamik nunanut allanut politikki pillugu amerlanernik isumaqatigiissuteqarnissaq naalakkersuinikkut suliarineqartoq.

- Paasilluarsinnaavara inuit sapinngisamik ilisimatinneqarusuttarnerat. Pissutsinilli arlalinnik pissuteqartumik tamanna pisinnaasimanngilaq. Qinersinerup kingorna Issittumi Siunnersuisooqatigiit ataatsimiittussaanerat pissutigalugu sukkasuumik suliaqartariaqarsimavugut aamma piffissap sivikittunnguup iluani nalunaarfigineqarsimavugut USA-p nunanut allanut ministerianik tikeraartoqartussaasugut.