Pele Brobergip aningaasanut inatsisissatut siunnersuut isornartorsiorpaa
Siunnersuummik saqqummiussaminit piumasaqaatit allanngorsimasut, aningaasaqarnermut naalakkersuisuusimasoq isumaqarpoq.
Naalakkersuisoqatigiit avissaarsimanngitsuuppata, Pele Brobergip ullumi Partii Neleqqamit 2019-imut aningaasanut inatsisissatut siunnersuut saqqummiuttussaagaluarpaa. Taarsiullugu Vittus Qujaukitsoq (NQ) saqqummiussivoq, Pele Broberg illuatungiliuttuni inissisimalluni. Pisup immikkukkuullarilaartoq nammineerluni maluginiarpaa.
- Taamaattoq arlallit pissangassutigisimavaat Partii Naleqqamit qanoq oqariartuuteqarumaarnersugut. Tassami uanga Aningaasaqarnermut Naalakkersuisuusimasutut, Naalakkersuisut sinnerlugit suliarinikuugakku, taassuma oqaaseqaatini taama aallarnerpaa.
Air Greenlandimi piginneqataassutsit pisiarineqarnissaat
Kisianni naak siunnersuutaasimasoq siulleq taassuma atsiugarigaluaraa, maanna isornartorsiussallugu inissaminiiginnartoq, taanna isumaqarpoq.
- Taavami sooq inatsisissamut siunnersuuteqarsimavunga, maannalu isornartorsiulerlugu? Tunngaviusumik akissutaa naatsunnguuvoq. Naleqqukkunnaarpoq.
- Pissutsit allanngormata Naalakkersuisut siulittaasuat aamma statsministeri Lars Løkke Rasmussen atsioqatigiimmata, kingornalu ikinnerussuteqarlutik Naalakkersuisut isumaqatigiissusiorneranni.
Taassuma isumaa naapertorlugu Air Greenlandimi piginneqataassutsit pisiariniarneqarneranni piumasaqaatit ilaatigut allanngueqataapput.
- Maanna Air Greenland A/S pisiarinissaanut aningaasaliinissaq ilaasariaqarpoq, taakkulu naatsorsuutigineqarsinnaapput aningaasarpaaluussasut. Danskit mittarfinnut ilaaniarlutik neqeroorutaat erniakikkaluit, aningaasanik attartuisariaqarnerup kinguneranik aningaasanik sipaarfiunani landskarsimut aningaasartuutaasussaagamik.
- Aningaasaqarnermut Naalakkersuisuusimavunga, suliarisimasaralu maanna naleqqukkunnaarpoq.
Mittarfiit, suliffeqarfiit akileraarutaat ilinniartitaanerlu
Tupaallaataanngitsumik oqaaseqaatimi ilarujussuani mittarfiliortiternissamut pilersaarut oqaaseqarfigaa.
- Uteqattaarneqarpoq mittarfissuit sananeqanngippata nunarput ineriartorsinnaanngitsoq, nunanit allanit qimataassalluta unammilleqatigiinnikkut. Taannali mittarfissuarnit tunngaveqanngilaq. Sinaakkutit tulluutinngitsut, soorlu ingerlatsiviit isertitaminnit akileraarutaat nunanit unammillertitsinniit marloriaataasoq, tunngaviuneruvoq.
- Mittarfissuarnullu aningaasat atugassaraluit qanorli ilinniartitaanermut ukiuni tulliuttuni qulini atorneqaraluarpata? Tassa siunissamut ineriartortitsinissamut aningaasaliineq.