Pele Broberg: Inatsisartut ataatsimiinnerat radiokkut aallakaatinneqaqqittalerlik
Innuttaasut Inatasisartut ataatsimiinnerat radiokkut tusarnaarsinnaanissaat anguniarlugu KNR-ip innuttaasunut kiffartuussinera atorunnaarsikkusuppaa
Inatsisartut ataatsimiinnerat innuttaasut radiokkut toqqaannartumik tusarnaarsinnaasariaqaraat Partii Naleqqamit Pele Broberg isumaqarpoq.
Inatsisartut ataatsimiinnerat KNR2-kkut aamma KNR-ip nittartagaatigut malinnaaffigineqarsinnaapput, tamannali PN-imi politikerimit naammagineqanngilaq.
- Inuiaqatigiit tamakkerluta TV-kkut imaluunniit internet-ikkut attaveqanngilagut, taamaattumillu Inatsisartuni katersuulluta ataatsimiittarnitsinni malinnaasinnaanatik inissisimasarlutik. Aalisartut, piniartut, allaffimmiut, suliffissuaqarfinni atorfilittat, sisamanik assakaasulinnik ingerlatsisut aammalumi kikkuugaluarnersut katersuulluta ataatsimiinnitsinni pisariaqarluinnartunik pingaaruteqarluinnartunillu paasissutissanik suliaqarnitsinni malinnaasinnaannginnerat naammaginanngilaq, Naalakkersuisunut apeqquteqaamminut tunngaviliilluni allappoq.
Aalajangiinerit pingaaruteqartut
Pele Broberg Naalakkersuisunut apeqquteqaatini Sermitsiaq.AG-mut ima itisilerpai:
- Ilisimatusarfiup nalunaarutaanit 'Tusagassiuutit 2018'-imi takuneqarsinnaavoq innuttaasut amerlanerpaartaat radio tusarnaartaraat. Inatsisartut ataatsimiinnerat radiokkut aallakaatinneqarneq ajorpoq, tamannalu innuttaasunut kiffartuussinerunngilaq pitsaasoq, Pele Broberg Sermitsiaq.AG-mut oqarpoq.
KNR-ip kiffartuussinissamut isumaqatigiissutaa tamaat imaluunniit ilaannakortumik atorunnaarsikkusuppaa.
- Ilisimatuussutsikkut ilisimatusarnermi ilanngullugu takutinneqarpoq radio tassaasoq aliikkutassiinermut, nutaarsiassanut aammalu paasissutissiinermut atorneqartartoq. Taamaattumik pakatsissutigaara Inatsisartut ukiaq (UKA 2018) katersuunneranni ataatsimiinnerannilu aalajangertoqarmat inuiaqatigiinnut tamanut kingunerluuteqartussamik, inuiaqatigiit tamarmiusut oqallinneq radio-kkut malinnaaffigalugulu naalaarsinnaanngimmassuk, Pele Broberg allappoq.
Pele Brobergip oqallissaarutaa 2016-mi aamma oqallisigineqangaatsiarpoq, tassanimi aalajangerneqarpoq Inatsisartut ataatsimiinnerat radiokkut aallakaatinneqartarunnaassasoq. Kiffartuussinissamut isumaqatigiissut suliarinnittussarsiunneqartariaqartoq Pele Broberg isumaqarpoq, tamanna innuttaasunut pitsaanerpaassasoq isumaqarluni.