Pele Broberg mittarfiit pillugit: Pissutsit imminnut ataqatigiinngillat
Mittarfissat nutaat pillugit kingunerisassat pillugit eqqortunik ilisimatitsiffigineqarneq ajorpugut, Pele Broberg, Partii Naleraq, suliamik tamarmiusumik isornartorsiuisoq, oqarpoq
- Kalaallit Airports A/S mittarfiliassallu pillugit saqqummiussami tamarmi attaveqaatinut nutaanut nunatsinni aamma nunatsinnut nunatsinnillu akikinnerusumik timmisartunut attaveqaatinut ikaarsaariassasugut pilersaarutaavoq. Kisianni pilersaarutinik piviusunngortitsinissaq qanilliartortillugu qanoq pisoqqarneranik ilisimasaqannginnerput aamma innuttaasut amerlanersaannut kingunissat suussanersut ilisimanngikkivut ersarissigaluttuinnarpoq, Pele Brober, Partii Naleraq, oqarpoq.
Aviisi Sermitsiaq taama allaaserisaqarpoq.
Mittarfiliugassat pissutigerpiarlugit Partii Naleqqap Naalakkersuisooqatigiit qimappaat. Ilaatigut akisuallaarnissaat aamma aningaasaliinerit imminnut akilersinnaanerat uppernarsarneqanngimmat ilaatigullu Danmarkip naalagaaffia suliniutinut aningaasaliinermigut aalajangiisuusumik sunniuteqalernissaa pissutigalugit.
Paasiuminaallisitsisut
- Suut tamarmik akikillissasut pitsaanerulertillu Naalakkersuisut neriorsuiuarsinnarput kisianni qanoq ilillutik imaluunniit sooq Ilulissani Nuummilu 2.200 meterisut takitigisunik mittarfiliussanerlutik nassuiarsinnaanngilaat. Nuummi immikkut ittumik akuersissuteqaqqaarluni timmisartorsinnaanerit pillugit paasissutissat kingulliit aatsaat iluamik suut tamaasa paasiuminaallisippaat, Pele Broberg, Air Greenlandimi timmisartortartutut aamma sulisimasoq, naliliivoq.
- Timmisartuussisartut allat Air Greenlandimit allanerusut nunamut timmisartuussisarsinnaaniassammata nunamut nutaanik isaaffiliorniarput. Kisianni Nuummut minniaraanni immikkut ittumik akuersissummik pinissamut akuerineqaqqaartoqartussaavoq. Timmisartuutileqatigiit arlaannaataluunniit timmisartoq aalajangersimasoq Nuummut timmisartuussisartussanngorlugu immikkoortikkunnanngilaa. Ingammik timmisartuutileqatigiit akikitsumik ingerlatseqatigiiffiusut mittarfinnik nutaanik atuisussatut neriuutigineqaraluartut. Tamakku timmisartuutaat nunarsuarmi tamarmi timmisartuussiinnavittarput. Timmisartoq aalajangersimasoq Nuuliaassisartussatut immikkoortikkunnanngilaat, Pele Broberg, nassuiaavoq.
Allaaserisaq tamaat Sermitsiami atuaruk – uani ataani linki aqqutigalugu aviisimut isissutissarsigit: