Skip to main content

Pele Broberg akimasut akornanni ulapissasoq

Inuussutissarsiornermut, Niuernermut, Nunanut Allanut Silallu Pissusaata Allanngoriartorneranut Naalakkersuisoq Pele Broberg Amerikamiut nunanut allanut ministgerianik Antony Blinkenimik Købenahvanimi Reykjavikkimilu kiisalu Nuummi ataatsimeeqateqartussaagami, sapaatip akunnerani matumani ulapingaatsiartussaavoq.

Amerikamiut nunanut allanut ministeriat Antony Blinken sapaatiummat unnukkut Københavnimut tikippoq. Amerikamiut nunanut allanut ministeriata ministeriunermik Mette Frederiksenimik nunanullu allanut ministerimik Jeppe Kofodimik ataatsimeeqateqarnissami saniatigut Pele Broberg ataasinngorpat ataatsimeeqatigissavaa.

Antony Blinkenimik Københavnimi oqaloqateqarnerani Issittumi sillimaniarnermut politikki pingaarnertut oqaloqatigiissutigineqassaaq.

- Neriuutigaara ataatsimiinnermi niuernermut inuussutissarsiornermullu tunngassuteqartunik aamma pitsaanerusumik niueqatigiissinnaanermut tunngassuteqartumik pissarsiaqarumaarlunga, Pele Broberg Antony Blinkenimik ataatsimeeqateqarnissani sioqqullugu oqarpoq.

Periarfissarpassuaqartoq

Taassuma oqaatigaa, Amerikamiut nunanut allanut ministeriat USA-mi periarfissarpassuarnut ammaassisinnaasoq.

- Neriuutigaarput killeqanngitsumik niueqatigiissinnaaneq tunngavigalugu niueqatigiinnissamik isumaqatigiissuteqarnissaq aallartissinnaassallutigu, Ritzau naapertorlugu taanna oqarsimavoq.

Pele Brobergip Danmarikimi nunanut allanut ministeri Jeppe Kofod (S) sapaatiummat ataatsimeeqatigaa. Tassanili USA sammineqarani pisortatiguunnginnerusut allat sammineqarsimapput.

Pele Broberg Jeppe Kofodimit angalaqatigiumaneqarsimasoq
Martin Sylvest/Ritzau Scanpix

- USA-mik ataatsimeeqateqarnissavut Danmarkimit ataatsimeeqarnitsinnit allaanerulaassagunarput, Pele Broberg Ritzauimut oqarpoq.

Jeppe Kofodip Savalimmiiuni nunanut allanut kultureqarnermullu ministeri Jenis av Rana sapaatiummat aamma ataatsimeeqatigaa.

Kofodi avissaartuutsitsisoqannginnerartoq

Kofodip ataatsimiittoqareernerani tusagassiortunik katersortitsinermi erseqqissaassutigaa, Kalaallit Nunaannut attaveqarnermi USA avissaartuutsitsilernavianngitsoq.

- Kalaallit Nunaata USA-mik niueqateqarnerorusunnera tapersersorparput. Soournami tamanna tapersersussavarput - aamma Savalimmiunut atatillugu, nunanut allanut ministeri oqarpoq.

Issittumi Siunnersuisoqatigiit pingasunngorpat Islandimiittumi Reykjavikimi ataatsimiissapput, tassani aamma Amerikamiut nunanut allanut ministeriat Pele Brobergilu peqataassapput, aamma taakku tassani ataatsimeeqatigiinnissaat pilersaarutaavoq. Siunnersuisoqatigiit ataatsimiinneranni oqaluuserisassat ilagaat, silap pissusaata allanngoriartornera Issittumi sikup aakkiartorneranut immikkut pingaaruteqartoq.

Issittumi Siunnersuisoqatigiit ataatsimiinnerat sisamanngorpat naammassineqassaaq, tamatuma kingorna Nuummukartoqassaaq, tassani Antony Blinkenip ilaatigut Naalakkersuisunut Siulittaasunngorlaaq Múte B. Egede ataatsimeeqatigissavaa.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER