Pele Blinkenimik ataatsimeeqateqareerluni: USA-mit akiuussutissatigut ikiorneqarnissamik neriuuteqarneq

Nunanut allanut Naalakkersuisup Pele Brobergip neriuutigaa, akiuussutissalersuineq sukkanerusumik ingerlasinnaaqqullugu USA akiuussutissanik Kalaallit Nunaannut tunniussinissamik piareersimassasoq.

Amerikamiut nunanut allanut ministeriata Anthony Blinkenip Danmarkimi, Savalimmiuni Kalaallillu Nunaanni ministereqatini ullumi ataasinngornermi ataatsimeeqatigai, ataatsimeeqatigiinnermilu pingaartumik coronap tuniluunnera silallu pissusaata allanngoriartornera oqaluuserineqarput.

- USA akiuussutissatigut ikiuunnissamut piareeqqanerminik kingusinnerusukkut nalunaaruteqarnissaa neriuuteqartitsilerpoq, tamanna Kalaallit Nunaannut iluaqutaassaqaaq, takornariartitsisarnermi piaarnerpaamik aallartittariaqaratsigu, Pele Brobergi Sermitsiaq.AG-mut oqarpoq.

Pele Brobergip paasisimavaa, Amerikami præsidentip Joe Bidenip USA-mi akiuussutissalersuinermut pilersaarut kingusinnerusukkut nalunaarutiginiaraa.

Pele Brobergip ilisimatitsissutigaa, ataatsimeeqatigiinneq ilasseqatigiinnerusoq, tassani Amerikamiut nunanut allanut ministeriannik naapeqateqarnissaq periarfissaanerulluni.

Aqqusaaginnartoq

- Issittumimi Siunnersuisoqatigiit Islandimi ataatsimiinnissaannut ornigunninni Københavnimut aqqusaaginnarpunga. Taamaammat Antony Blinkenimik naapeqateqarnera pissusissamisuuginnarpoq, Pele Broberg Kalaallit Nunaata USA-llu sisamanngorpat Kangerlussuarmi ataatsimeeqatigiinnissaanni piviusuunerusunik soqutiginarnerusunillu oqaluuserisaqartoqarniartoq erseqqissaasoq nassuiaavoq.

- Københavnimimi imatut ataasimoorussaqanngilagut. Sisamanngorpat ataatsimeeqatigiinnitsinni tigussaanerusunik oqaloqatigiittussaavugut, tassani Antony Blinken Kalaallit Nunaannut tikeraarpat, Kangerlussuarmi Múte B. Egede peqatigalugu taanna ataatsimeeqatigisussaavarput, Pele Broberg nunanut allanut ministerit sisamaallutik ataatsimiissimanerannit naatsumik ilanngussisoq itisiliivoq.

- Amerikamiummi nunanut allanut ministeriata Kalaallit Nunaannik soqutiginninnera soorunami nuannaarutigaarput, ilisimatinneqarpugullu pingaarutilittut iliusugut, Pele Broberg ataatsimiissimaneq pillugu oqaluttuarpoq.

Powered by Labrador CMS