Peerstaap anaanaa: Nassaarineqarnissaa neriuutigigaluaqaara
Peerstaat Isaksenip Qaqortumi tammareernerata kingorna anaanaa isumassaaleqivoq. - Naalliunnaqaaq, imannak oqaloqateqarneq ajorama, Peerstaap anaanaa oqarpoq.
Judithe Isaksen Peerstaat Isaksenimut anaanaavoq, Peerstaat novembarip 22-anili kingullermik takuneqarpoq. Judithe Isaksenillu Narsami najugaqarami panini kingullermik augustimi takuaa.
Panimi nassaarineqarnissaa kissaatigisorujussuaa.
Peerstaat Isaksen inuk ammasuuvoq ikinnguterpassuaqarlunilu. Narsarmiut Qaqortumiisimagaangamik Peerstaat naapissimagaangamikku arnaanut unnersiortuartartut, arnaa oqaluttuarpoq. Peerstaallu kommunimi angerlarsimaffinni ikiortaasoq aamma arnaata oqaluttuaraa.
- Narsarmiut Qaqortumiisimagaangata Perstaat naapissimagaangamikku uannut unnersiutigisarnikuuaat. Qiimasuuvoq, kisianni sivisuumik takuneqannginnakku naluara suli taamaanersoq. Kisianni nalinginnarmik ammasuuvoq, Judithe Isaksen Sermitsiaq.AG-imut oqaluttuarpoq.
Peerstaat Isaksen ataasinngornerup unnukkuani novembarip 22-ani kingullermik Qaqortumi Bygning 7-imiit ingerlasoq takuneqarpoq. Bygninginiit nalunaaqutaq 22.00-ip 23-00-illu akornanni ingerlasoq kingullermik takuneqarpoq. Politiillu aamma Brugseneeqqap eqqaaniit illoqarfiup tungaanut ingerlasoq nalunaaqutaq 23.00-ip missaani aamma takuneqarsimasoq ilimagilluinnarpaat.
Naak Peerstaat Isaksen Issittumi sakkutuunit, qatserisartunit politiinit namminerlu kajumissutsiminnit ujarneqareeraluartoq suli sumiiffianik aqqutissiuisinnaasumik nassaartoqanngilaq.
Politiit ujaasineq pisortatigoortumik ataasinngormat unitsippaat. Innuttaasullu arlaanik paasissutissaateqarunik sumiineranillu aqqutissiuisinnaasunik paasissutissaateqarunik politiinut saaffiginneqquneqarput.
Oqaleqatigiissutiginagu sakkortuvoq
- Nuannarineqarluartuuvoq, puigorneqarnavianngilaq. Ulluinnarnut uteqqinniarsaraluni sakkortoqaaq, sulimi nassaarineqanngilaq. Nassaarineqarnissaa neriuutigisorujussuugaluarpara, Judithe Isaksen oqarpoq.
Judithe Isaksen Narsami meeqqerivimmi asaasuuvoq. Maanna sapaatip akunnera sulinngiffeqareerluni sulileqqippoq. Taassuma aamma oqaatigaa qanoq oqimaatiginersoq panimi tammarnera arlaanut oqaloqatigiissutigisinnaanagu.
- Panimma ujaarineqarnera pillugu sisamanngornerup ullaavani politiinit sianerfigineqarpunga. Tupaqqanermik naluara suminngaaniit sianersimasut. Aqaguani sianeqqipput ujaasineq aallartissimasoq ujaasinerlu unitsinneqarmat aamma sianeqqipput. Naallioqaanga, panimma tammarnera arlaanut iluamik oqaloqatigiissutigisinnaannginnakku, Judithe Isaksen oqarpoq.
35-nik ukiulik Peerstaat Isaksen pillugu paasissutissat: 155 centimeterit missaannik angissuseqarpoq, nerinnattoq, atisarai kavaajaq qorsummik taartumik qalipaatilik, tujuuluaraq aappilarujuttumik qalipaatilik, qarliit qernertut skuullu tunguusat.