Peder Munk Pedersen nersornaaserneqartoq
Atorfilittaasimasoq, oqallissaarisartuusimasoq, suliniuteqartarsimasoq, aqqutissiuussisarsimasorlu Peder Munk Pedersen, ullumi arfininngornermi martsip 16-ani sølviusumik Nersornaaserneqarpoq.
Inatsisartut siulittaasuata, Vivian Motzfeldtip (S), Polar Seafoodip Aalborgimi allaffeqarfiani ullumi martsip 16-ani Peder Munk Pedersen sølviusumik Nersornaaserpaa.
Inatsisartoqarfik tusagassiutinut taama nalunaaruteqarpoq.
Sølviusumik Nersornaasiinermut tunngavilersuutigineqarpoq piffissami sivisuumi tunniusimalluni nersortarialimmik Kalaallit Nunaanni aalisarnermik inuussutissarsiut Atorfilittatut, Oqallissaarisutut, Suliniuteqartutut, Aqqutissiussisartutullu siuarsarsimammagu, Inatsisartoqarfik ilisimatitsivoq.
– Aalisarnerup iluani suliniutinik arlalissuarnik piviusunngortitseqataasimavutit, tamatumani ilaatigut aalisarneq pillugu saqqummersittakkamik Killingusaamik isumaginnittuusimallutit, aamma Sustainable Fisheries Greenlandimi killiliussat iluini Marine Stewardship Councilip (imartat pisuussutaannik nakkutilliineq pillugu siunnersuisoqatigiit) nunarsuarmut tamarmut atuuttumik nungusaataanngitsumik aqutsivigineqarluartumillu aalisarnermut najoqqutassiai malillugit Kalaallit Nunaanni raajarniarnerup uppernarsaaserneqarnera sulissutigisimavat, Vivian Motzfeldt (S) Peder Munk Pedersen sølviusumik Nersornaaserneqarnerani oqalugiaammini oqarpoq.
Sorsuutiginnittoq
Peder Munk Pedersen Kalaallit Nunaanniinnermini aviisimi AG-mi tusagassiortutut ukiuni arlalinni sulisimavoq. Kingornalu aamma aviisimi Sermitsiami aaqqissuisutut atorfeqarsimalluni. 1982-imi aviisimi Sermitsiami aaqqissuisutut atorfeqarunnaarpoq.
Peder Munk Pedersen kilisaataatileqatigiit peqatigiiffianni pisortaasimavoq, Aalisarnermi Aqutsisoqarfimmi pisortatut atuuffeqarsimalluni aammalu Pingortitaleriffimmi siulersuisunut ilaasortaasarsimalluni.
- Kalaallit Nunaanni inuussutissarsiutit pingaarnersaanni aalisarnermi sorsuutiginnillaqqissutut taaneqarputit, sammisamilu ilisimasaqarluarlutit inuiannut kalaallinut tamanut iluaqutaaqisumik inuussutissarsiummi atugassarititaasut pillugit sorsuutiginnittuusimallutit, Vivian Motzfeldt (S) Peder Munk Pedersen sølviusumik Nersornaasernerani oqalugiarluni oqarpoq.