Pedelip ernumassutaa: Meeqqat pissusaat sakkortutsikkiartorpoq

Nuummi atuarfiit ilaanni pedelitut sulisimasoq Bent Lundblad suligallarami misigisimasani oqaluttuarai. - Meeqqat pissusaat sakkortutsikkiartuinnavippoq, oqarpoq

Aalakoornartulinnik imigassartutorneq, ikiaroorneq aserorterinerillu meeqqat aqqaneq-marluk missaannik ukiullit akornanni.

Unnuleraangat meeqqat atuarfiata Ukaliusap silataani pisartut tamakku ilagaat.

Meeqqat aalakoornartortalinnik imigassatortut

Bent Lundblad atuarfimmi tassani pedelitut atorfeqarnikuuvoq ukiorpassuarni, sulinermini misigisani oqaluttuarai.

- Immiaaraq karsi imaluunniit ikiaruussutigineqarsimasut pujortaatit ulluinnarni naammattoortarpakka. Immiaaqqat aseqqukut ilagaamerngi piffissarujussuaq atorlugu katersortarpakka, tassa meeqqat aalakoornartumik imigassartutortarnerat tassuuna erserpoq. Meeqqat aqqaneq marluk missaanni ukiullit imertut takusareerpakka. Politiit tamanna pillugu nalunaarfigigaangakkit, ornigukkaangata, qimagutereersimasarput, oqaluttuarpoq.

Pissuserluttut

Arlaleriarluni unnukkut atuarfik misissoriartortarnikuuaa.

- Sapaatip akunneri tamarluinnaasa igalaanik aseruisoqartarpoq. Ataasiarlunga naammattoornikuuara igalaat aqqaneq marluk unnummi ataatsimi aserorneqarsimasut. Taassuma saniatigut aamma ikuallaaniartoqartarpoq. Ukiuni kingullerni qulini meeqqat pissusaat ajorsiartornerat malugaara, maannakkummi inersimasunut akisalernikuupput. Pissusaat kusanarpallaarunnaarnikuuvoq, tamanna siornatigut takusimanngisaannarpara, oqaluttuarpoq.

Oqallittoqartariaqalerpoq

Pisartut maanna eqqartorneqartariaqalersut isumaqarpoq.

- Maanna pissutsit ajorsiartunnginneranni allannguisoqartariaqalinnginnerpa? Takusimasakka innuttaasutut ernumagaakka, maannami pisartut toqqortuinnarnagit eqqartorneqartariaqalersut isumaqarpunga, Bent Lundblad oqarpoq.

Powered by Labrador CMS