PDAC: Aatsitassat pillugit Nuummi immikkut ittumik ataatsimeersuarnissaq
Coronap tuniluunnera pissutigalugu aatsitassat pillugit nunarsuarmi ataatsimeersuartarnerit annersaat PDAC internetsikkut ingerlanneqassaaq, tamatumalu malitsigisaanik Namminersorlutik Oqartussat, Kalaallit Nunaanni Sulisitsisut aamma Dansk Industri Nuummi immikkut ittumik nittarsaassassamminnik suliaqarsimapput.
- Uagutsinnut pingaaruteqarsimavoq, ukiorpassuarni suliarisimasaata annaaneqannginnissaat, Kalaallit Nunaanni Sulisitsisut pisortaat Christian Keldsen Sermitsiaq.AG-mut oqarpoq.
Aatsitassat pillugu ataatsimeersuartarneq, nalinginnaasumik Canadamiittumit Torontomi ingerlanneqartartoq, aningaasaliissuteqartartut aatsitassarsiorfiillu nunanit allaneersut Kalaallit Nunaannik soqutiginnilersinniarneqarneranni pingaarutilipilussuuvoq. Ukiut marluk matuma siornatigut Kunngissapq Frederik Kalaallit Nunaata saqqummersitsiviani peqataavoq, tamannalu nunat tamalaat tusagassiorfiitigut sammineqangaatsiarsimalluni.
Aatsitassanut Naalakkersuisoqarfik, Dansk Industri aamma Kalaallit Nunaanni Sulisitsisut internetsikkut PDAC-p Torontomi ataatsimeersuarnerata saniatigut, Nuummi sammisassaqartitsinermik aaqqissuussisimapput, tassani PDAC-p internetsikkut saqqummiussai malinnaaffigineqarsinnaassallutik.
Inuit arlallit oqalugiariartussasut
- Pilersaarummut atatillugu oqalugiartussat soqutiginartut pissarsiarisimavavut, Sulisitsisut siulittaasuat ilisimatitsivoq, oqaatigalugulu Canadap ambassadøria nutaaq kiisalu USA-p Kalaallit Nunaanni konsulia Sung Choi oqalugiartunut ilaassasut.
PDAC-p aatsitassat pillugit ataatsimeersuarnera martsip arfineq-pingajuanniit aqqarnanut internetsikkut ingerlanneqassaaq. Nuummi aaqqissuussami pingaartumik martsip arfineq-pingajuanni ingerlatassaq sammineqassaaq, ”peqataasulli ullut tamaasa ataatsimeersuarnermut malinnaasinnaassapput”, Christian Keldsen neriorsuivoq.
Pilersaarut tamarmiusoq ullualuit qaangiuppata saqqummiunneqassaaq, Sulisitsisut siulittaasuat ilisimatitsivoq.