Paviasenip oqaasii kingulliit: Aningaasaqarnermik naatsorsuisimaneq pillugu isornartorsiummut akerliusoq
Nuummi Ilulissanilu timmisartoqarfiliornerit inuiaqatigiit aningaasaqarnerannut sunniutissai pillugit naatsorsueqqinnermi Kangerlussuaq naammattumik ilanngunneqarsimavoq. Taamatut oqarpoq naalakkersuisuujunnaalersoq Mariane Paviasen.
Kangerlussuup siunissaa qularnartuunngilaq, timmisartoqarfissallu nutaat atuutilerapata Nuummi Ilulissanilu timmisartoqarfiit nutaat inuiaqatigiit aningaasaqarnerannut iluaqutissartaannut ajoqutissartaannulluunniit sunniuteqarsinnaanerat ilimanarani, attaveqaasersuutinut naalakkersuisoq Mariane Paviasen (IA) oqarpoq.
Aningaasaqarnermi professorip Birger Poppelip nalunaarutigimmagu angalanermi piffissamik sivikinnerusumik atuisoqartalerpat iluanaarutissarpassuartut naatsorsorneqarsimasut annikinnerulissasut, ilaatigullu Namminersorlutik Oqartussat Kangerlussuarmik ingerlatsinermut aningaasartuuteqarnerulissasut naalakkersuisoq akerliilluni taamatut oqarpoq. Poppel ilaatigut isumaqarpoq, assersuutigalugu Nuummi sila ajussappat, Kangerlussuaq imarpik qulaallugu timmisartunut suli miffiusinnaasoq.
Tamatuma inuiaqatigiit aningaasaqarnerannik naatorsuisimaneq marlutsigut sunnissavaa, Poppel oqarsimavoq. Ilaatigut angalanermi piffissamik sivikinnerusumik atuisoqartalerpat iluanaarutissarpassuartut naatsorsorneqarsimasut annikinnerulissapput, ilaatigullu Namminersorlutik Oqartussat Kangerlussuarmik ingerlatsinermut aningaasartuuteqarnerulissallutik.
Attaveqaasersuutinulli naalakkersuisup Mariane Paviasenip (IA) tamanna isumaqatiginngilaa:
Isumaqatiginngikkaa
- Kangerlussuup allatut atorneqarsinnaaneranut tunngagineqartoq isumaqatiginngilarara. Air Greenlandimiimmi nalilerneqarsimavoq, Kangerlussuaq ammagaluarpalluunniit imaluunniit matoqqagaluarpat timmisartut nunanit allaneersut missinnaanerannut tamanna malunniutingaarnavianngitsoq.
- Erseqqissaassutigissallugu pingaaruteqarpoq, timmisartortitsileqatigiiffiit sumut minnissartik namminneq aalajangertarmassuk. Ilulissani timmisartoqarfissaq nutaaq assersuutigalugu Kangerlussuartulli miffigiuminartigingajappoq. Ullumi aamma periarfissaareersoq, tassa Københavnimut uterluniluunniit Islandimut mikkiartortoqarsinnaanera aamma suli atorneqarsinnaavoq, naalakkersuisoq Sermitsiaq.AG-mut allakkatigut akissuteqarluni oqarpoq.
Sermitsiaq.AG-p paasissutissaatai naapertorlugit, Mariane Paviasen Naalakkersuisuujunnaassaaq, Inuit Ataqatigiit Siumullu naalakkersuisooqatiginnissamik isumaqatigiissuteqarnerisa kingorna, uullumi Naalakkersuisussanik nutaanik toqqaasoqarpat.
- Qanoq suliaqartoqartiginissaanik aqutsisinnaanngitsoq
Mariane Paviasenip aamma oqaatigaa, Kangerlussuup siunissaata pilersaarusiorneqarnera naammassineqangajalersoq. 2.500 meteriusumik mittarfeqassaaq, inuussutissarsiutinillu ingerlataqartut tikiffigineqarsinnaanerata ineriartortinneqarnissaa namminneq aalajangissagaat oqaatigalugu:
- Isumaqarpunga 2500 meteriusumik mittarfeqarnissaq pillugu Illersornissaqarfimmut tunngaviusumik isumaqatigiissupput erseqqissuusoq, taamaammat timmisartoqarfiup siunissaa pillugu sooq suli qulartoqarnera paasisinnaanngilara, naalakkersuisoq oqarpoq, nangillunilu:
- Naalakkersuisummi qanoq suliaqartoqartiginissaanik aqutsisinnaanngillat. Inuussutissarsiutinik ingerlataqartut qulakkeertussaavaat, Kangerlussuup siunissami angallattunut akunnittarfittut atorneqaannarnissaanut sanilliullugu tikiffissatut pilerinartutut ineriartortinneqarnissaa .
Pitsaanerpaamik kissaakkaa
Apeqqut: Nuummi imarpik qulaallugu timmisartunut mittarfik atuutilerpat, Kangerlussuaq qanoq pineqassanersoq illit attaveqaasersuutinut Naalakkersuisutut suna kissaatigaajuk?
- Kangerlussuaq pitsaanerpaamik kissaappara, isumqarpungalu Qeqqata Kommuniata takornariartitsisarnermik ineriartortitsisinnaasimanera kakkaginartuusoq. Tamatuma saniatigut Naalakkersuisut aamma Kangerlussuup siunissami sakkutuujunngitsunut sakkutuunullu mittarfittut atorneqarnissaanik Illersornissaqarfimmut isumaqatigiissutigineqarsimasoq malillugu suliaqarput, Mariane Paviasen oqarpoq.