Paviasen: Innuttaasut ilisimatinneqarsimapput Narsarsuaq - timmisartoqarfiujunnaartinneqarniartoq

Naalakkersuisut aalajangersimapput, Qaqortumi mittarfissaq atorneqalerpat Narsarsuarmi mittarfik qulimiguulinnut mittarfinngortinneqassasoq.

Nuummi, Ilulissani Qaqortumilu mittarfiliornissamut aningaasaliissuteqartoqassasoq 2018-imi aalajangiunneqarmat, Narsarsuarmi innuttaasunut timmisartoqarfiup siunissaa minnerunngitsumillu innuttaasut siunissartik nalornissutigisimavaat.

Suliarli qaammammi matumani qanoq inerneqassanersoq paasinarsisimasoq, Attaveqaasersuutinut Naalakkersuisoq Mariane Paviasen (IA) Sermitsiaq.AG-mut ilisimatitsivoq.

Allakkatigut akissuteqaammi allassimavoq, Naalakkersuisut aalajangersimasut Qaqortumi mittarfissaq atorneqalerpat Narsarsuarmi mittarfik qulimiguulinnut mittarfinngortinneqassasoq. Narsarsuarmi innuttaasut qaammammi matumani siusinnerusukkut taamatut ilisimatinneqarsimapput.

- Erseqqissaassutigerusuppara Naalakkersuisut sanaartornermut inatsit 2018-imi atuutsinneqalersoq malillugu sulimmata. Kommuni Kujallermi kommunalbestyrelsip tamarmiusup siorna inassuteqaateqarneratigut, Qaqortumi mittarfissamut nutaamut aningaasaliissuteqarnissaq Inatsisartuni isumaqatigiissutigineqarneratigut qulakkeerneqarsimavoq.

Naalakkersuisut ataatsimoortut

- Naalakkersuisut ataatsimoortut tamanna tunngavigalugu 2022-mi martsip arfineq-aappaani Narsarsuarmi innuttaasunik ataatsimiitsitsinermi nalunaarutigisimavaat, nunaqarfimmut siunissami angallassisarnissat qulimiguullit atorlugit isumagineqartalissasut, Mariane Paviasen allappoq, nangillunilu:

- Narsarsuarmi mittarfik taamaalilluni Qaqortumi mittarfissaq atorneqalerpat, timmisartunut suluusalinnut matuneqassaaq.

Qaqortumi mittarfiliorneq 2025-mi ukiakkut naammassineqarsimassasoq naatsorsuutigineqarpoq. Naalakkersuisullu ilanngullugu oqaatigaa, pilersaarutaasoq malillugu suleqatigiissitat aallarteqqinneqarsimasut nunaqarfiup siunissaa pillugu qulaajaassasut:

- Kommuni Kujalliup Innovation South Greenlandillu nunaqarfimmi inuussutissarsiutaasinnaasutut ilippanaatilinnik ineriartortitsillutik suliaqarnerat tatigilluinnarpara. Naalakkersuisut suliaqarnermut tapersersuipput.

Kingunerluuteqangaatsiassasoq

Qaqortumi Timmisartoqarfissaq 2025-mi ukiakkut atoriaannanngussasoq naatsorsuutigineqarpoq. Atorneqalerpallu timmisartoqarfiup qulimiguulinnut mittarfinngortinneqarnera Narsarsuarmut - timmisartoqarfitmmut nunaqarfimmullu kingunerluuteqangaatsiartussaavoq.

Siusinnerusukkut naatsorsuisimanerit takutippaat, Narsarsuarmi mittarfiup qulimiguulinnut mittarfinngortinneqarnera inuiaqatigiit aningaasaqarnerannut pitsaanerpaassasoq.

Qulimiguulinnulli mittarfinngortinneqarpat nunaqarfimmi suliffeqarfiit amerlanersaannut tamanna kingunerluuteaqassasoq naatsorsuutigineqarpoq. Rambøllip naatsorsuisimanernimi inerniliussimavaa, Narsarsuarmi innuttaasut 21-t missaannut ikilisissasut.

Timmisartoqarfittut oqaluttuaannanngussasoq

Qulimiguulinnut mittarfinngortinneqarneratigut Kalaallit Nunaanni silaannakkut angallassinermi timmisartoqarfik oqaluttuaannanngussaaq. Narsarsuarmi Timmisartoqarfik Sorsunnersuup Aappaani amerikamiunit 1941-miit 1942-mut sananeqarsimavoq.

Siorna aasakkut timmisartoqarfiup ukiunik 80-inngortorsiornera nalliussineqarpoq. Amerikamiut timmisartoqarfik 1950-ikkut naalerneranni qimappaat, tamatumalu kingunitsiannguatigut ammaqqinneqarluni.

Narsarsuaq nunami maanni imarpik qulaallugu mittarfiit marluusut aappaattut atuussimavoq, Kangerlussuarli ukiuni kingullerni ilaasut amerlanersaannit timmisartullu amerlanersaannit atorneqartarsimavoq.

Powered by Labrador CMS