Paviasen Naleqqamut akissuteqartoq: Siunnersuummik tigussaasumik takorusuttoq
Naalakkersuisoq Mariane Paviasen umiarsualivinnik atuinermi akiliuteqartalersinnaanermik suliaqarnermut partiit peqataatinneqarnissaannik neriorsuivoq. Erseqqissaassutigaali aserfallatsaaliuinissamik kinguaattooruteqarnermut pilersaarusiortoqassasoq.
Naleqqamit attaveqaasersuutinut naalakkersuisoq Mariane Paviasen (IA) politikkikkut ataasinngormat sioorasaarneqarpoq.
Partiip naalakkersuisooqataasup umiatsiaararsorlutik aalisartut angallatinillu mikinerusunik piginnittut umiarsualivinnik atuinerminni akiliuteqartinneqartalernissaannik oqaluttarnerit tamaasa peeqquai, tamatuma saniatigut umiatsiaararsorlutik aalisartut angallatinillu mikinerusunik piginnittut Nuummi Sikuki Harbourimut akiliuteqartinneqartalernissaat atorunnaaqquaa.
Tamanna pinngippat, naalakkersuisoq amerlanerussutaarutsinneqassasoq, Naleqqameersoq Jens Napaattooq.
Mariane Paviasenip Sermitsiaq.AG-mut oqaatigaa, Naleraq siunnersuummik tigussaasumik tunniussinissaminut tikilluaqqusaasoq:
Aningaasanut inatsisissaq pillugu isumaqatigiissut innersuussutigigaa
- Umiatsiaararsorlutik aalisartut angallatinillu mikinerusunik piginnittut atuinermi akiliuteqartannginnissaat politikkikkut kissaatigineqarpat ammasumik oqaloqatigiinnissamut piareersimavunga. Siunnersuutaasinnaasunut sunulluunniit, atuinermi akiliuteqartitsisarnissamit, 2022-mut aningaasanut inatsisissamut siunnersuummi oqaatigineqarsimasumit pitsaanerusunik tusagaqarusuppunga, Mariane Paviasen oqarpoq.
2022-mut aningaasanut inatsisissaq pillugu Inuit Ataqatigiit, Naleqqap, Demokraatit Atassutillu isumaqatigiissutigisimasaanni allassimavoq, Namminersorlutik Oqartussat attaveqaasersuutaasa nungullariartoqqinnginnerunissaat anguniarneqassasoq – taakkununnga ilanngullugit umiarsualiviit:
- Ingerlatsinermut aserfallatsaaliuinermullu aningaasartuutit isertitarineqartartullu, nalinginnaasumik atuisut akiliuteqarnerisigut aamma/imaluunniit aningaasanut inatsit aqqutigalugu aningaasaliissuteqarnikkut isertinneqartartut oqimaaqatigiissinneqassasut, partiit akunnerminni isumaqatigiissutaanni allassimavoq.
- Aserfallatsaaliinissamik kinguaattooruteqarsimanermut aaqqiissutissarsiortoqassasoq
Mariana Paviasenip ilanngullugu oqaatigaa, naalakkersuisooqataasumut matuni ammasoq:
- Tusagassiorfiit aqqutigalugit isumaqatiginninniarusunngilanga. Matora ammavoq, arlaannillu isumaqatiginninniarusukkunik isersinnaapput. Tamanna aamma partiinut soqutigisaqartunullu atuuppoq.
Naalakkersuisulli erseqqissaassutigaa, umiarsualiviit aserfallatsaaliorneqarnissaannik kinguaattooruteqarsimanermut aaqqiissutissarsiortoqartariaqartoq:
- Kinguaattooruteqarsimaneq iliuuseqarfigissavarput. Issiaannarsinnaanngilagut iliuuseqaratalu. Aserfallatsaaliuinissaq pilersaarusiussavarput. Soqutiginnittut arlallit sapinngisamik peqatigalugit, Mariane Paviasen oqarpoq, nangillunilu:
- Partiit peqataatinneqarnissaat pingaartippara, tigussaasunillu siunnersuuteqartoqarnissaa takorusullugu.
Atuisut akiliuteqartikkiartuaarneqassasut
Naleqqap naalakkersuisullu aaqqiagiinngissuteqarnerat, Mariane Paviasenip Aslak Jensenimut (S) akissutaa sapaatip-akunnerata naannginnerani saqqummiunneqarmat aallartippoq.
Mariane Paviasenip akissuteqarnermini ilisimatitsissutigaa, Sikuki Nuuk Harbour A/S-imut atuisutut akiliuteqartarnerup allanngortinneqarnissaata piumasarineqarnissaanik Naalakkersuisut pilersaaruteqanngitsut.
- Sikuki Nuuk Harbour A/S-ip ingerlatsinermut, aserfallatsaaliinermut, umiarsualiviliorsinnaanissamullu taarsigassarsiat taarsersorneqarnerinut aningaasartuutinut atuisut akiliutaat matussutigineqartarput, naalakkersuisoq Aslak Jensenimut akissuteqaammi allappoq.
Naalakkersuisup ilanngullugu ilisimatitsissutigaa, aserfallatsaaliuinissamik kinguaattooruteqangaatsiarsimanermut aaqqiissutissat ilaattut, umiarsualivinnik allanik atuinermi akiliuteqartitsisalernissaq sulissutigineqartoq.
Inatsit atuisut akiliuteqartalernissaannut aqqutissiuissasoq
Taamatut nalunaaruteqartoqarmat partiimit naalakkersuisooqataasumit Naleqqamit puffaammertoqarpoq, naalakkersuisumullu tapersersuineq tunuartinneqassasoq sioorasaarutigalugu.
Naalakkersuisunit siusinnerusukkut ilisimatitsissutigineqarsimavoq, Umiarsualiviit pillugit Inatsisartut inatsisaata, nr. 9, 13. juni 2015-imeersup akuersissutigineqarneranut atatillugu, Namminersorlutik Oqartussat umiarsualiviutaannik tamanik atuinermi akiliuteqartitsisalernissaq akuerineqarsimasoq.
- Umiarsualivinnut atatillugu aningaasanik isertitaqartartut ingerlatsinermi aningaasartuutinut umiarsualiviliornissamullu taarsigassarsianut aamma akiliuteqartarnissaat tunngaviatigut akuersissutigineqarsimavoq, taamanikkut attaveqaasersuutinut naalakkersuisuusoq Naaja Nathanielsen 2021-mi upernaakkut allakkatigut akissuteqarluni allappoq.
Nunami umiarsualivinnik aserfallatsaaliuinissamik kinguaattooruteqarnerup 270 millioner koruunit missaannik akeqarnissaa Naalakkersuisut 2017-imi naatsorsorsimavaat.