Paviasen akitsuutit pillugit: Misissueqqissaarnerit arlallit ingerlanneqassapput

Naalakkersuisut inatsisissatut siunnersuut mittarfinnik ingerlatseqatigiiffiup, Mittarfeqarfiit, siunissaanik aalajangiisussaq maannakkorpiaq suliarivaat.

Siunnersuutip tusarniaassutigineqarnerani, timmisartoqarfissat nutaat atulerpata Mittarfeqarfiit siunissami qanoq aningaasalersorneqassanersut sammineqarluarsimavoq.

Kalaallit Nunaanni timmisartumut ilaasut tamarmik nammaqatigiiffiusumik akitsuummik akiliuteqartinneqartarnissaannut peqatigitillugu, Mittarfeqarfiit ingerlanneqarnerannut tapiissuteqartarnissaq eqqarsaatigalugu Namminersorlutik Oqartussanik kiffartuussinissamik isumaqatigiissuteqarnissaq periarfissat ilagivaat.

Attaveqaasersuutinut naalakkersuisup Mariane Paviasenip (IA) Sermitsiaq.AG-mut oqaluttuaraa, tamanna aaqqiissutissatut maannakkorpiaq isigalugu.

- Taakku marluullutik oqaluuserineqassasut

Apeqqut: Kiffartuussinissamik isumaqatigiissut imaluunniit timmisartunut ilaasut akitsuummik akiliuteqartinneqartarnerat ikiorsiullugit Mittarfeqarfiit aningaasalersorneqarnissaat piumaneruviuk?

- Isumaqarpunga taakku marluutillugit atorneqarsinnaasut. Ilassut akitsuummik akiliuteqartinneqartarnissaat aamma kiffartuussinissamik isumaqatigiissuteqarnissaq ilimanarluinnarpoq. Taakku immikkoortillugit ingerlatsisinnaanissarput ilimananngitsoq isumaqarpunga, Mariane Paviasen oqarpoq, nangillunilu:

- Suli inaarutaasumik isummersimanngilagut, oqaatigisinnaavarali aningaasaqarneq sulissutigigatsigu, akitsuusiinissaq sakkussat ilagaat, sakkussalli amerlanerusunik atorsinnaasatsinnik peqarpugut. Tamanna piffissami qaninnerusumi misissussavarput.

Kalaallit Nunaanni Sulisitsisut isumaqarput, Mittarfeqarfiit miliuunilikkaanik amigartooruteqartalernissaannut matussutissatut timmisartunut ilaasut akitsuumik nammaqatigiissutitut akiliuteqartinneqartalerniarnerat siunertamut naapertuutinngitsoq.

Akitsuusiiniarneq ernumanartoqartinneqartoq

Ilaatigut sulisitsisunit oqaatigineqarpoq, akitsuusiinikkut Kalaallit Nunaata tikiffissatut unammillersinnaanera ajornerulersinneqassasoq.

Mariane Paviasenip tassunga atatillugu oqaatigaa, Mittarfeqarfiit aningaasaqarnerat oqimaaqatigiissinniarlugu arlaatigut aningaasanik nassaarniartoqartariaqartoq:

- Mittarfeqarfiit Kangerlussuaq aningaasanik isaatitsiffigisartagartik atorunnaarunikku annaasaqangaatsiarnissaat eqqarsaatigisariaqarparput. Mittarfeqarfiit aamma mittarfinnik qulimiguulinnullu mittarfinnik ukiuni aggersuni iluarsaassinissamik suliassaqarput. Iluarsaassinernut aningaasarpassuarnik atuisariaqassaagut, ingerlatseqatigiiffiullu ingerlanneqarneranut tunngaviit naapertorlugit Mittarfeqarfiit A/S akigititassanik aalajangersaasussaapput, taanna oqarpoq, nangillunilu:

Naalakkersuisut ataatsimeeqatigiinneranni oqaluuserineqassasoq

- Mittarfeqarfiimmi pilersaarut malillugu aktiaatileqatigiiffinngortinneqartussaapput, akigititassaminnik nammineq aalajangiisinnaasassallutik. Siunnersuutiminnik naalakkersuisunut tunniussisassapput, naalakkersuisullu akigitinneqarniartut akuersissutigisassavaat, tamarmilli ajunngitsumik inerneqarlutillu aningaasaqarnikkut amigartooruteqariusussaanngillat.

Mariane Paviasenip ilisimatitsissutigaa, inatsisissatut siunnersuut Naalakkersuisut sisamanngornermi ataatsimeeqatigiinneranni oqaluuserineqassasoq naatsorsuutigalugu:

- Neriuutigaara siunnersuut Naalakkersuisunit akuersissutigineqarumaartoq, Mariane Paviasen oqarpoq.

Siunnersuullu naalakkersuisooqatigiinni oqallisigineqassangunaqaaq, partiimimmi naalakkersuisooqataasumit Naleqqamit siusinnerusukkut oqaatigineqarsimavoq, akitsuummik nutaamik, Kalaallit Nunaanni timmisartukkut angalanermut akisunerulersitsisussamik atuutsitsiniarneq isumaqatiginagu:

- Tamanna Naleqqami ajuusaarutigilluinnarparput, innuttaasumi angallassinermi akigititanut qaffasissupilussuarnut akiliuteqartareerput, Jens Napaattooq januaarip qaammataani oqarsimavoq.