Skip to main content

Patrick Siu-Tsiumut katersinermini ipukkami 71.339 koruunit katersorpai

Patrick Abrahamsen arfininngornermi akunnerni 24-ni 205 kilometerit ipuppai, taamaasillunilu Tasiilami suliffeqarfimmut inuusuttunut suliniuteqartunut 71.000 koruunit sinnerlugit katersorlugit.

Suliffeqarfiit annerusut minnerusullu, soorlu EMJ Atcon aamma Nuuk Osteopati og Fysioterapi, kiisalu innuttaasut Patrick Abrahamsenip ipunnera pillugu tapiissuteqartunut ilaapput. Akunnerni 24-ni ipunnissap siunertaraa Tasiilami suliffeqarfiup Siu-Tsiup aningaasatigut tapersersorneqarnissaa.

- Qujamasuppunga, tupaqqavunga nuannaarlungalu suliniutiga taama tapersersorneqartigimmat. Tapersersorneqarnera isumalerujussuuvoq, Patrick Abrahamsen Sermitsiaq.AG-mut oqarpoq.

Tapersersorneqarluarporlu. Ullormi kulturisiorfimmi, arfininngornermi 21. januar Patrick Abrahamsen Tasiilameersoq, akunnerni 24-ni 205 kilometerinik ipummat, katillugt 71.339 koruuninik tapersersorneqarpoq.

Patrick Abrahamsen Tasiilami peroriartorsimasup, suliffeqarfiup Siu-Tsiup inuusuttunut 16-27-nik ukiulinnut suliniutai periarfissagissaartutut isigai.

- Tasiilami najugaqarnikuuvunga, Tasiilallu ajunngitsortai aamma takusimallugit. Illoqarfiup ajunngitsumik ineriartortinneqarnissaa takorusuttorujussuuara, taamaattumillu Siu-Tsiu tapersersorusullugu, oqarpoq.

Tapersersorneqarneq qujamasuutigaat

Suliffeqarfiup Siu-Tsiup inuusuttut qulit qaammatit qulikkaarlugit suliniartittarpai. Suliassanut ilaasarput illut silataanik qalipaaneq, ikaartarfiliorneq, Tasiilami narsaatip isumaginera kiisalu kingullertigut kalaalimineerniarfimmik sanaartoqataaneq.

Siu-Tsiumi Tasiilami suliniummi pisortaq, Nivikka Witjes oqaluttuarpoq Patrick Abrahamsenip ipunnerani tapersersuisorpassuit qujamasuutigalugit.

- Aningaasat Tasiilami illuutitta pisatsersornissaanut atorneqassapput. Illuutitsinni inuusuttut peqatigisagut qasuersaarfissaqalissapput nereqatigiiffissaqalissallutillu. Patrick Abrahamsen Tasiilami inuusuttut maligassiuivoq. Inuunerissaarpoq, anguniagaqarlunilu angusaqarsinnaanermik takutitsilluni, Nivikka Witjes oqarpoq.

Patrickip timaa akiliuteqangaatsiarpoq

Patrick Abramhamsen ilisimatitsivoq akunnerit 24-t ipunnermini 3 kilonik oqilisimalluni, oqilinermini 1,4 kilo nukiit katassimavai. Ipunnermini 11.000 kaloriat katassimavai, kiisalu nissumigut nulumigullu ajoquserneqalerluni.

- Misileeqqissanersunga? 100 procentinngoqqaartariaqassaanga. Imminulli nalunngilluinnaruma, taamaalluni piffissaq takkukkumaarpoq suli ingasannerusumik anguniagaqalerumaarnissannut, Sermitsiaq.AG-mut oqarpoq.

Siu-Tsiumi ingerlatsisoq oqarpoq inuusuttut Tasiilamiittut arfininngornermi katillugit 101 kilometerinik takissuseqartumik aamma ipussimasut.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER