Skip to main content

Pasilliut: KNI-p naatsorsuutinik peqquserlunneq isertuunniarsarigaa

KNI-mi sulisuusimasut marluk KNI-p naatsorsuutaasa peqquserluutigineqartarsimanerat uppernarsaatissaqarnerarpaat. Taamaalillutik siulersuisut siulittaasuata, Lars Borris Pedersenip, naatsorsuuserinermi kukkusoqartarsimaneranik nassuiaataa ilumuunnginnerarpaat.

Dorthea Olsen Rasmussen aamma Ane Marie Schmidt Hansen, KNI-p qullersaqarfiani Sisimiuniittumi atorfeqarsimasut, ukiup aappaa affaq sinnerlugu ilisimasaqarsimapput nalunngeqatiginnissutiminnik nukimminnillu sualuttumik nungullarsaataasunik.

Aviisi Sermitsiaq taama allappoq.

Tusarfik kinaassutsiminik isertuussisoq, ingerlatseqatigiiffiup allaffeqarfiani aamma sulisimasoq, aqqutigalugu, isumaqarput KNI-p naatsorsuutai ukiut arlallit ingerlaneranni allanngortiterneqartarsimasut nioqqutissanik pilersuinermut immikkoortortaqarfimmi Pilersuisumi peqqumaasivimmi uninngasuutit nalingisa qaffasinnerusunngortinnerisigut.

Iliuuserineqartartoq tamanna aqutsisut ingerlatseqatigiiffiup naatsorsuutaanik kusassaasinnaasarsimanerannik kinguneqarsimasoq, pasilliutigineqarpoq.

Isumaliutit ilungersunartut

Sulisuusimasut taakkua marluk ilungersunartumik isumaliutiginnereerlutik susassaqartunik qitiusumiittunik arlalissuarnik akuliutsitsiniarlutik aalajangersimapput, ilaatigut ingerlatseqatigiiffiup kukkunersiuisuanik suliffeqarfimmik, politiinik, politikerinik aamma naalakkersuisunut ilaasortanik marlunnik. Qaammatini arlalinni susoqanngereersorlu atuartartut allagaat aqqutigalugu Sermitsiami sapaatip-akunnerani kingullermi sassarniarlutik aalajangersimapput.

Atuartartulli allagaat marlunngornermi tunuartittariaqalerpaat allanngortittariaqalerlugulu, siulersuisut siulittaasuat Lars Borris Pedersenip tusagassiuutitigut nalunaarut aqqutigalugu tassanngaannaq sioqqummatik, taannalu tassuuna paasissutissiimmat, naatsorsuutit peqqumaasivimmi uninngasuutinik naatsorsuisarnermut atatillugu ukiuni arlalinni kukkuneqartarsimasut.

Lars Borris Pedersen paasissutissiivoq, inerniliisoqarsinnaasoq, »kukkussuteqarnermi peqquserluuteqartoqarsimanngitsoq imaluunniit aningaasaqarnikkut arlaatigut naapertuukkunnaarsaasoqarsimanngitsoq«.

Nassuiaat tupaatigineqartoq

Nassuiaat tamanna Dorthea Olsen Rasmussenip aamma Ane Marie Schmidt Hansenip tupaatigaat, misigisimagamik pissutsit ilungersunartut tamakkua isertuunniarsarineqartut.

– Taamatut uagut ilisimasatsinnik ilisimasaqarneq tupinnaannartumik oqimaassimavoq, Dorthea Olsen Rasmussen aamma Ane Marie Schmidt Hansen Sermitsiamut nassuiaapput.

Taakkua KNI-p qullersaqarfiani Risk Manageritut aamma Logistikcontrolleritut atorfeqarsimapput. Ullumikkut marluullutik Nuummi najugaqarlutillu suliffeqarput.

– Sassarnerput inuttut pissarsissutiginavianngilarput, kisianni neriuutigilluinnarparput, maanna iliuuseqartoqassasoq, suliami pissutsit ataqatigiinnerat eqqortoq saqqummiunneqarsinnaaqqullugu, taakkua marluk suliap paamaarunneqarsimaneranik isumaqartut, oqaluttuarput.

Suliaq nalunaarutiginnittarnermik whistleblowerimik aaqqissuussineq aqqutigalugu apriilimi 2020-mi nalunaarutigineqarpoq, taamanilu kukkunersiuisut suliffeqarfiat Deloitte aamma siulersuisut siulittaasuat Lars Borris Pedersen pasilliutinik saqqummiussivigineqarput. Kisianni Deloitte aatsaat qaammatit marluk matuma siorna misissuilluni aallartissimasoq, siulersuisut siulittaasuat paasissutissiivoq.

Allaaserisaq tamaat aviisimi Sermitsiami nutaami atuarsinnaavat, aamma atuartartut allagaat atuarsinnaavat. Aviisi uani pissarsiariuk:

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER