Pasilliutit sakkortuut politiinut suliassanngortinneqarsinnaassapput
Sakkortuumik eqqunngitsumillu pasillerneqaraanni, inummut annertuumik ajoqusiisunik, suliamik politiinut unnerluutiginninnissamut siunissami periarfissaqalissaaq. Tamanna inatsisissatut siunnersuutip nutaap, Inatsisinik atuutsitsinermut Ministereqarfiup suliarisimasaata, pingaarnertut imaraa.
Inatsisinik atuutsitsinermut Ministereqarfik inatsisissatut siunnersuummut missingiummik, nittartakkani attaveqatigiittarfinni pasilliutinik sakkortuunik aserorsaataasunillu ajornartorsiummik annertusiartuinnartumik sammisaqarfiusumik.
Siunnersuutip tusarniaassutigineqaqqammersup Inatsisartut upernaakkut ataatsimiinneranni saqqummiunneqarnissaa Folketingillu ataatsimiinnissaani oqaluuserineqarnissaa naatsorsuutigineqarpoq. Inatsisinik atuutsitsinermut ministerip Nick Hækkerupip Folketingimi Kalaallit Nunaannut Ataatsimiititaliaq tamatuminnga ilisimatitsissuteqarfigeqqammerpaa.
Maannamut ajortuliorfigineqartut namminneq suliat nikassaataasut suliariniartariaqartarsimavaat, inatsisilli nutaap atulerneratigut suliamik politiinut unnerluutiginnittoqarsinnaalissaaq, suliarlu immikkut sakkortuujuppat Kalaallit Nunaanni Politiit paasiniaavigisinnaalissaavaat, eqqartuussivinni suliarineqarsinnaalersillugu.
Suliat makkua pineqarput
Inatsisissamut oqaaseqaatini, suliat sorliit politiinit isumagineqarsinnaanerat erseqqissaatigineqarpoq:
- (…) suliani sualuttumik pasilliutit eqqunngitsuusimatillugit pisortanit pinngitsoornani unnerluutiginnittarneq atuutilersinneqassasoq, suliani pasilliutip tusagassiuutip imarisaatigut saqqummiunneqarfigisaani siammarterneqarfigisaanilu, pasilliutillu pinerlineqartumut ajoquseerujussuarsinnaasutut ilimagineqarfigisaani, inuup pissutsinik pisortani atorfimmik tatigisatulluunniit atuuffimmik annaasaqarneranik kinguneqarsinnaasuni, aamma suliani pasilliutit sualuttut kinaassutsimik isertuussillu siammarterneqarfigisaanni.
Inatsisissatut siunnersuummut missingiummi erseqqissaatigineqarpoq, politiit sulianut ”namminersuutigalugu unnerluutiginninnerup” aallartinneqarfigisimasaanut akuliussinnaanngitsut.
Allannguut aqqutigalugu Kalaallit Nunaanni pinerluttulerinermi inatsit imarisamigut Danmarkimi inatsimmut nallersuussinnaalissaaq.