Partit siulittaasui: Kielsen kisimi ingerlatsivoq

Coronap ajornartorsiortitsinera februaarip naalerneranili nunamut siaruaammat, Naalakkersuisut illuatungiliuttullu imminnut akersuukkunnaarsimapput. Ajornartorsiutip anigorniarnissaa isumaqatigiissutigineqartullu illikartinneqarnissaat isumaqatigiissutaasimavoq.

Kim Kielsenip sapaatip akunnerani matumani siusinnerusukkut erseqqissaatigaa, ikiorsiissutissat, aningaasaliissuteqarnissaq, nunamik matusinissa il. il. pillugit aalajangiisoqarniartillugu, partiini siulittaasut tamarmik suliap ingerlanerani isumasiorneqarlutillu ilanngussaat tusaaneqartartut.

Partiilli siulittaasuisa tamarmik taamatut oqarnera isumaqatiginngilaat.

- Suleqatigiinnermiit paasissutissiinerusarpoq, Partii Naleqqami siulittaasoq Hans Enoksen oqarpoq.

- Oqaatigerusunneruara ilaannikkut sianerfigineqartarpugut aalajangiisimanerit pillugi ilisimatinneqarluta. Isumaqarpunga tusaaniarneqarnerusinnaagaluartugut, Atassummi siulittaasoq Aqaalu Jerimiassen oqarpoq.

- Partiit siuttuini ataatsimeeqatigiittarnivut ilisimatitsissuteqarnertut isikkoqarnerusarput. Siunnersuuteqarsinnaavugut, susoqaqqinnerli ajorpoq, Inuiat Ataqatigiit siulittaasuat Múte Bourup Egede oqarpoq.

Partii tapersersortaasoq naammagisimaarinnittoq

Nivi Olsenili Denmokraatini siulittaasuugallartoq allaanerulaartumik misigisarsimavoq.

- Suleqatigiinneq ajunngilluinnartumik ingelavoq. Tamarmik ilanngussaqarsinnaanerat pitsaasuuvoq, Nivi Oqarpoq. Kim Kielsen ataatsimiinnissamut siunnersuuteqartarpoq, taava uagut ilanngukkusutavut oqaatigisarpavut, takkulu tunngavigalugit Kim Kielsen aalajangiisarpoq, Nivi oqarpoq.

Tillie Martinussenip Suleqatigissitsisuneersup takujuminaatsippaa, Kim Kielsen aalajangiiniarnermini partiit siulittaasuisa ilanngussaannik pimoorussisarnersoq.

- Qanoq tusarnaartartiginersoq ilanngussatsinnillu ingerlatitseqqittarnersoq nalorninarsinnaavoq. Amerlanertigut aalajangiisoqareersimagaangat aatsaat ilisimatinneqartarpugut, aamma tusagassiortunik katersortitsisoqareeraangat aatsaat innuttaasut paasissutissinneqartarput.

Aaqqissuussaasumik suliaqartarnissaq ilisimatitsissuteqartarnissarlu amigaataasut

Hans Enoksenip Múte Bourup Egedellu tamanna aamma takusinnaasimavaat. Taamaammat IA-mi siulittaasup arlaleriarluni qinnutigisarsimavaa aaqqissuussaanerusumik peqataatitsisoqartarlunilu ilisimatitsissuteqartoqartarnissaa.

- Ilungersunarluinnartumik inissisimavugut. Taamaammat aalajangersimanerusumik ataatsimiittoqarnissaa ujartortarsimavara, tassa tugassiortunik katersortitsisoqartinnagu ilisimatinneqartarniassagatta. Taamaalillutami periarfissaqalissaagut inuiaqatigiinnut aningaasaqarnemullu tunngassutilinnik isumaqatiginninniartarnissamut, tassa partii akimorlugit pissutsit ataatsimoorfigisinnaaniarlugit, taanna oqarpoq.

- Pitsaanerujussuarmik ingerlatsisoqarsinnaavoq. Maannakkorpiaq ataatsimiittoqarnissaanik qinnuiginnikkaangaata imaluunniit piumasaqaraangatta atsaat ataatsimiittarpugut, partiip siulittaasua erseqqissaavoq.

Partiit siulittaasuisa arlallit oqaatigaat, ikiorsiissutissat qanoq aaqqissuunneqassanersut, nunap matuneqarnera qanoq ingerlanneqassanersoq, aamma Nuummi aalakoornartortalinnik tuniniaanerup qaqugu qanorlu atuutsinnelqalerluni atorunnaarseqqinneqarnissaa pillugit aalajangiisimanernut peqataatinneqarsimanatik.

- Isumaqarpunga, nunamut tamarmut sunniuteqartupilussuarmik ajornartorsiuteqarnitsinni partiit siuttuinik taamatut attaveqartarneq attanneqarsinnaanngitsoq, Hans Enoksen oqarpoq.