Parti: Misissuinerup naatsorsuusiorneq kinguaattoortippaa

Naatsorsuutit tunniunneqarnissaannut piffissaliussaq qangali qaangiutereeraluartoq Nunatta Qitornaasa Suleqatigiissitsisullu naatsorsuutitik suli tamanut saqqummiutinngilaat. Suleqatigiissitsisut naatsorsuutaat kinguaattooqqapput, partiimut politiinut unnerluussut partiimit suli misissorneqarmat, partiimi siulersuisuunernut ilaasortaq ilisimatitsivoq.

Inatsisartuni partiit ukiup naatsorsuuteqarfiusup naaneranit kingusinnerpaamik qaammatit arfinillit qaangiunneranni naatsorsuutitik Inatsisartunut tunniutereersimasussaavaat, naatsorsuutit tamanut saqqummiunneqartussaammata.

Partiit politikkikkut suliaqarnerannut kikkut aningaasaliissuteqartanersut ammasumik saqqummiunneqartarnissaat qulakkeerniarlugu malittarisassaq suliarineqarsimavoq.

Partiit tallimat naatsorsuutaat Inatsisartut nittartagaasigut maanna takuneqarsinnaapput, partiilli marluk - Nunatta Qitornai Suleqatigiissitsillu - suli tunniussisimanngillat. Pingaartumik Suleqatigiissitsisut siorna aningaasaqarnermikkut tukattumik ingerlatsisimasut naatsorsuutaat qanoq innersut pissanngatigineqarput.

Partiit taakku marluk naatsorsuutitik kingusinnerpaamik juunip 30-ani tunniutereersimasussaagaluarpaat, partiit marluullutik ukioq naatsorsuuteqarfiusoq malittussaagamikku. Partiit taakku marluk taamaalillutik tunniussiffissaq qaammatip pingajuat avillugu qaangersimavaat.

Vittus: Qanittukkut tunniutissavavut

Malittarisassat malillugit partii akiligassinneqarsinnaavoq, naatsorsuutit tunniunneqarnissaannut malittarisassat malinneqarsimanngippata.

Nunatta Qitornaasa siulittaasuat Vittus Qujaukitsoq Sermitsiaq.AG-mut oqarpoq, qinersisoqarmalli partiimi suliaqarneq killeqarsimasoq, qinersisoqarmat partii Inatsisartunut isertitaqanngitsoorpoq.

- Naatsorsuutit qanittukkut tunniunneqassasut naatsorsuutigaarput, Vittus Qujaukitsoq Sermitsiaq.AG-mut oqarpoq.

Misissuisoqarmat Suleqatigiissitsisut naatsorsuutaat kinguaattooqqasut

Suleqatigiissitsisut aningaasaqarnerat siorna politikkikkut oqallisigineqarsimaqimmat partiip naatsorsuutai arlallit misissussallugit soqutissannguatsiarpaat.

Tamatumunnga pissutaavoq, partiip aningaasaataanik atuisimaneq ilaasortat ilaannit naammagineqanngilluinnarsimanera, tusarfiillu arlallit naapertorlugit atuisimanermut bilagit arlallit amigaataapput. Ilaasortat naammaginninngitsut isumaqarput, siulittaasoq Tillie Martinussen aningaasanik atuivallaarsimasoq.

Martinussenilli taamanikkut aningaasaqarnikkut tukattumik ingerlatsisoqannginnerarsimavaa. Naatsorsuutit kingusinaarunneqartut eqqarsaatigalugit partiip siulersuisuuneranni ilaasortaq Torben Ørting Jørgensen saaffigeqqullugu innersuussutigaa.

- Ammasumik ingerlatsisimavugut

Taassuma Sermitsiaq.AG-mut oqaatigaa, 2020-mut naatsorsuutit suli naammassineqanngitsut, partiimi ilaasortaasimasut tallimat partii politiinut unnerluutiginninnerisa kingorna suli misissuisoqarnera pissutigalugu. Misissuisornerani partii 'kukkunersiuisunut eqqartuussissuserisunullu aningaasarpassuarnik atuisimavoq, tassungalu atatillugu naatsosuutit suli naammassineqarsimanatik'.

Partiip aningaasaatai nammineq inuttut atorneqarsimanerarlugit politiinut unnerluussisoqarsimavoq.

- Ammalluinnartumik tamanna ingerlassimavarput, politiillu naatsorsuutinik tamanik politiinullu unnerluussinerup isumannaarneqarnissaa eqqarsaatigalugu tunniussinnaasatsinnik tamanik pissarsisimallutik.

- Isertuussaqarataluuunniit naqisimannissimanngilagut, Torben Ørting Jørgensen oqarpoq.

Politiit qanittukku inerniliiumaartut neriuutigineqartoq

Siulersuisuunernut ilaasortap neriuutigaa, politiit paasisimasaminnik qanittukkut saqqummiussiumaartut, Torben Ørting Jørgensen naapertorlugut unnerluussisimaneq partiip politikikkut sulineranut akorngutaalluinnarsimammat:

- Tatigisaajunnaarsinniarluta unnerluunneqarsimavugut, politiillu misissuinerat suli naammassitinnagut unnerluussutigineqartunik naqqissuisinnaasimanata.

- Suliamik naammassinnissinnaannginnerput pakatsissutigisimaqaarput.

- Neriuutigaarput politiit suliaq salliutissinnaassagaat naammassillugulu, Torben Ørting Jørgensen politiit pingaarutilinnik allanik suliassarpassuaqartut nassuerutigalugu erseqqissaavoq.

Powered by Labrador CMS