Skip to main content

Partiit: Nalunaarut kinguneqartinneqartariaqarpoq

Illuatungiliuttut partiivi isumaqarput, Kukkunersiuinermut Ataatsimiititaliap Kielsen nipisattassiissutillu pillugit nalunaarutaa kinguneqartinneqartariaqartoq. Naalakkersuisooqataasulli oqaaseqanngillat.

Akuersaarneqarsinnaanngitsoq, oqartussaaqataanermut ajoqutaasoq, pissaanermik atornerluineq, inatsisinik unioqqutitsineq, kisermaassilluni ingerlatsineq.

Kukkunersiuinermut Ataatsimiititaliap nipisattassiissutit pillugit nalunaarutaanut, sapaatip akunnerani kingullermi saqqummiunneqartumut partiit illuatungiliuttut oqaaseqaataasa taakku ilagiinnarpaat.

Inuit Ataqatigiit siulittaasuat Múte B. Egede isumaqarpoq, pineqartoq kinguneqartinneqartariaqartoq.

- Inatsimmik unioqqutitsisoqarsimavoq, suliamut attuumassuteqarpallaarsimanermut tunngatillugu, minnerunngitsumillu kukkunersiuinermut ataatsimiititaliap Naalakkersuisut inatsimmik malinnilluarsimanersut misissuiniarneranni Naalakkersuisut nunami kukkunersiuinermut ataatsimiititaliamut paasissutissanik isertuussisimanerat ataatsimiititaliamit innersuussutigineqarput, taanna oqarpoq.

Atassummi siulittaasup tupaallaatigaa Demokraatit Kielsenimut suli tapersersuinerat:

- Oqartussaaqataanermut ajornartorsiuterujussuuvoq, amerlanerussuteqartunit tapersersorneqarneq tunngavigalugu kinguneqartitsisoqartannginnera. Tamanna akuersaarneqarsinnaanngilaq. Kinguneqartitsisoqanngkkaangat allanngortoqarneq ajorpoq, taamalu kisermaassisutut ingerlatsisoqalertarluni, Aqqalu C. Jerimiassen oqarpoq.

Aatsaat taamak sakkortutigisumik isornartorsiuisoqartoq

Partii Naleqqami politikkikkut oqaaseqartartoq Jens Napaattooq aamma isumaqarpoq, ataatsimiititaliap nalunaarutaata eqqortuunera paatsoorneqarsinnaanngitsoq.

- Maluginiagassaavoq sakkortunerpaamik isornartorsiuisimanerat. Tamatuma imminermini takutippaa suliaq ilungersunartuusoq .

- Tamatuma saniatigut maluginiagassaavoq, ataatsimiititaliap suliami uppernarsaatinik pissarsisinnaasimannginnera. Naalakkersuisut paasissutissat ataatsimiitialiap pissarsiarisassai tunniukkusussimanngilaat. Tamanna akuersaarneqarsinnaanngilaq, Napaattooq oqarpoq.

Suleqatigiissitsisuni ilaasortap Tillie Martinussenip erseqqissaatigaa, innuttaasut politikkeriminnut tatiginnissaariaqartut.

- Matumani ikinngutinik kiffartuussineq pineqanngilaq. Matumani pineqarpoq, tatigisatut aqutsisup suliamik suliarinneqataasimanera angallamminillu atukkiinermini aningaasannassimanera. Suliaq pineqartoq suli ajornerulerpoq, nunami aqutsisup suliamut attuumassuteqarpallaarsimanerminik qularnanngitsumik ilisimasaqarsimanera. Pissaanermik atornerluineruvoq. Tamanna ajorluinnarpoq, taanna oqarpoq.

Taanna isumaqarpoq, ajortumik ingerlatsisimaneq Naalakkersuisut siulittaasuannut kinguneqartinneqartariaqartoq.

- Angallatip inuussutissarsiutigalugu aalisarnissamut akuerisaasimannginnerata kusanaatsuliaq suli ajornerulersippaa. Oqartussaaqataaneq tunngavigalugu inuinnaat naalakkersueqataaaneranni kusanaatsuliaq ima annertutigivoq, allaat Naalakkersuisut Siulittaasuat atuuffimminit nammineerluni tunuartariaqaraluarluni, Tillie Martinussen oqarpoq.

Tassungalu atatillugu taperneqarpoq.

- Atassummiit tamatumunnga peqataarusunngilagut. Naalakkersuisunut kaammattuutigaarput, isornartorsiuineq pimoorullugu tigussavaat akisussaaffimminnillu tigusillutik kinguneqartitsisariaqartut, Aqqalu Jerimiassen oqarpoq.

IA-mit kaammattuutigineqarpoq, Inatsisartut ataatsimiilerpata, pineqartoq inersuarmi suliarineqalerpat Inatsisartut iliuuseqarnissaat.

- Isumaqarpugut, siulittaasoq nunamik aqutsinissamut naleqqutinngitsoq. Neriuutigaarput Inatsisartuni amerlanerussuteqarttut tamatumannga isumaqatigissagaatigut, Múte B. Egede oqarpoq.

Naalakkersuisooqataasut oqaaseqanngitsut

Siumumi politikkikkut siulittaasup tulliata oqaluttuaraa, partiimi tamanna oqaluuserineqanngitsoq.

- Suliaq partiimi oqaluuserisimanngilarput. Nalilersimavarput oqaluuserissallugu tunngavissaqanngikkallartoq. Ataatsimiititaliamit suliarineqareerpoq, taamaammat oqaluuserinissaanut tunngavissaqanngilagut, isumaqarpungalu suliaq partiimi oqaluuserineqaqqissanngitsoq, Karl Kristian Kruse Sermitsiaq.AG-mut oqarpoq.

Aaqqissuisoqarfimmit Demokraatit oqaaseqartinniarneqarsimagaluarput, Jens-Frederik Nielsenili suliamut atatillugu Sermitsiaq.AG-mut oqaaseqarusussimanngilaq. Aamma ilanngutassiap saqqummiunneqarnerani Nunatta Qitornai oqaaseqartinneqarsinnaasimanngillat.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER