Partiit: Inigisap inniminartuunera illersorneqassaaq
IA-p, Demokraatit Partii Naleqqallu inatsimmi nutaami tuaviuullugu suliarineqartussami, pagragrafi ataaseq, politiit eqqartuussiviit aqqutigeqqaarnagit angerlarsimafinnut isersinnaanerannut tunngasoq peeqquaat
Politiit inuit qanoq amerlatigisut katersuuttarnissaat pillugu malittarisassat isumaginiarlugit, eqqartuussiviit aqqutigeqqaarnagit angerlarsimafinnut isersinnaalissapput. Inatsisissami tuaviuullugu suliarineqarttussami, Inatsisartut pingasunngorpat suliarisassaani tamanna takuneqarsinnaavoq.
Demokraatilli naalakkersuisoqatigiinnut tapersersortaasut aamma illuatungiliuttuni partiit annersaasa Inuit Ataqatigiit isumaat malillugit, inatsisissatut siunnersuummi paragrafi taanna peerneqartariaqarpoq.
- Siullertut inigisap inniminartuuneranut tunngatillugu apeqquserneqartoq peerneqassaaq. Taanna peqataaffigisinnaanngilarput. Isumaqarpungalu tamanna aamma Naalakkersuisunit kissaatigineqanngitsoq. Taannartaata peerneqarnissaa piumasaqaatigaarput, Múte B. Egede Inuit Ataqatigiinni siulittaasoq oqarpoq.
Demokraatinit aamma taamatut oqartoqarpoq:
- Inatsisissamut tuaviuussamut tunngatillugu pingaarnerpaatut oqaatigissavarput, eqqartuussiviit aqqutigeqqaartinnagit inuit angerlarsimaffiinut isersinnaaneq akuersaarsinnaanngilluinnaratsigu. Tamanna killissamik qaangiineruvoq, siulittaasuugallartoq Nivi Olsen oqarpoq.
Pingasunngorpat suliarineqapallassasoq
Partii Naleqqamit aamma akerlerineqartoq paragraf 6, imm. 2 isumaqatigineqanngilaq, Pele Broberg partii sinnerlugu Inatsisartui ilaasortaq ilisimatitsivoq.
Paragrafi ima allassimavoq:
”Naalakkersuisut malittarisassanik aalajangersaasinnaapput eqqartuussiviit akuersiseqqaarnagit imm. 1-imi aalajangersakkat malinneqarneri nakkutiginiarlugit ininut allanullu isertoqarsinnaaneranut tunngasunik nakkutilliinissaq siunertaralugu.”
Inuit Pisinnaatitaaffiinut Instituti isumaqarpoq, paragrafi inuit angerlarsimaffiinut poligiit isersinnaatitaanissaannut atorneqarsinnaasoq, tamatumalu akuerineqarnissaa politikkerinit kissaatigineqanngilaq.
Suleqatigiissitsisut aamma siunnersuutip immikkoortortaa taanna peqataaffigineqarusunngilaq:
- Ilimagilluinnarpara, peqqissaarussamik oqallisereerluta inatsisissatut siunnersuutip imaasa ilaat taanna akuerineqassanngitsoq. Tamatumali aamma erseqqissumik takutippaa, qanoq pingaaruteqarttigisoq, politikikkut annertuumik iliuuseqartoqarniartillugu partiit innuttaasullu tamarmik oqallinnermut peqataatinneqartarnissaat, siulittaasuugallartoq Tillie Martinussen partiip nittartagaatigut allappoq.
Inatsit pingasunngorpat suliarineqassaaq, Inatsisartut immikkut ittumik ataatsimiinneranni, inatsisissatulli siunnersuutip misissorlurnissaa piffissaqarfigineqarpallaassanngilaq, tassami ullormi ataatsimi siullermeerlugu, aappassaaneerlugu pingajussaaneerlugulu suliarineqartussaammat.