Partiit: Inatsit allanngortinneqarpat oqartussaaqataaneq annikillisinneqassaaq
Inatsimmi atuuttumi iluarsiisoqarneratigut, pisortat ingerlataat pillugit Inatsisartuni ilaasortat apeqqutaannut akissuteqartannginnissaq periarfissinneqassaaq.Tamatuma malitsigisaanik isertuussinissaq piumasaqaatigineqartalissaaq, partiinit arlalinnit oqaatigineqarpoq.
Inatsisartut ullumi ataatsimiinnerminni, paragraf 37 naapertorlugu apeqquteqartarneq pillugu inatsisip allannguutissaatut siunnersuut suliarissavaat. Allannguinermi apeqqutigineqartunut akissuteqannginnissamut periarfissat pingasut ilanngunneqassapput. Oqaluuserisassaq sivisuumik oqaluuserineqareermat, aappassaanik suliarineqartinnagu ataatsimiititaliamut suliassanngortillugu ingerlateqqinneqarpoq.
Inatsimmut oqaasertaliussami maannakkorpiaq allassimvoq:
Inatsisartunut ilaasortaq pisortat suliassaataat pillugu paasissutissinneqarnissaminik kissaateqarpat, tamanna Naalakkersuisunut apeqquteqarnikkut pisinnaavoq.
Inatsimmut 2010-meersumut nassuiaatini allassimavoq, Naalakkersuisut eqqortumik takutitsisumik sukumiisumillu akissuteqarnissaq naalakkersuisoqarfimmi pisussaaffittut pisussaaffigaat, Naalakkersuisullu apeqqut erseqqinnerusumik qulaajarniarlugu tamanna pisariaqarpat naleqquttumik ilungersuuteqartariaqarlutik.
Taamaammat paasissutissanik pissarsiniarneq ajornannginnerulissanersoq ajornarnerulissanersorluunniit ersernerluppoq, Tille Martinussen Suleqatigissitsisuneersoq oqaluttuarpoq.
-Qularutigineqassaanngilaq tamanna qularnarluinnartutut isigingatsigu. Inatsisartuni inatsisilerituut isumaqarput, akissuteqarnissammut pisussaaffimmik tamanna sukaterinerusoq, akissuteqarusunngikkaannili, tamatuma akissuteqannginnissamut utoqqatsissutitut politkkerinit atorneqarsinnaanera ilimanarsinnaavoq, Tillie Martinussen Sermitsiaq.AG-mut oqarpoq.
Siunnersuumit uku ilanngunniarneqarput:
Imm. 2. Naalakkersuisut apeqqummut akissuteqarnissaminnut pisussaaffeqanngillat:
Naalakkersuisut paasissutissanik akissuteqarnissaminnut atugassaminnik pissarsisinnaanngippata,
malunnartumik piffissaq nukissallu paasissutissanik akissuteqarnissamut atugassanik pissarsiniarnermut atortariaqassappata, imaluunniit
paasissutissat kissaatigineqartut nipangiussisussaatitaanermut ilaatinneqarpata.
Pele Brobergip Partii Naleqqameersup iluarsiissuteqarnermi ammasumik ingerlatsinissamik annikillisaaniarneq nuannarinngilaa.
-Oqartussaaqataanermik ilisimaarinnilluni annikillisaanermi, qinikkanut pingaarutilinnik paasisutississanik tunniusserusunnginnissaq akuersaarneqarsinnaanngilluinnarpoq, Pele Broberg Sermitsiaq.AG-mut oqarpoq, nangillunilu.
-Naalakkersuisuit apeqqutinut akissuteqartarneq piffissaajaataaneralugu, Inatsisartut nakkutilliisarnissaannik avaqqutaarinninniarlugit, pissaanermik tigumminnikkusullutik isertuussisarnerminnik annertusaaniarnerat aamma akuersaarneqarsinnaanngilaq.
Tillie Martinussen taamatut ernumassuteqartoqarneranut tapersiivoq.
-Takoreerparput Naalakkersuisut tungaannit qanoq matoqqatigisumik ingerlatsisoqartoq, aamma paragraf 37 naapertorlugu apeqqutinut akissutigisartagaat qanoq imakitsigisarnerat. Ammasumik ingerlatsisoqarnissaa oqartussaaqataanerullu ajunngitsumik ingerlanneqarnissaa pisariaqartilluinnarparput, Tillie Martinussen oqarpoq.