Partiit: Aningaasanut inatsisissatut siunnersuut taamatut isikkoqartillugu akuerineqarsinnaanngilaq

2021-mut aningaasanut inatsisissatut siunnersuut 183,3 millioner koruuninik amigartooruteqarfiusussattut naatsorsuutigineqartoq, pingasunngormat Inatsisartuni siullermeerlugu suliarineqarpoq.

Inatsisartut Aningaasaqarnermut Akileraartarnermullu Ataatsimiititaliaata aningaasanut inatsisissatut siunnersuut siusinnerusukkut isornartorsiorsimavaat, pingasunngormallu oqallinnermi partiinit kissaatigineqarpoq Naalakkersuisut siunnersuutaat allanngortinneqassasoq.

Siumut Inatsisartuni gruppiannit kissaatigineqarpoq, Naalakkersuisut Inatsisartunik suleqateqarnerullutik aningaasanut inatsisissatut siunnersuusiussasut.

- Nunanit allanit aningaasanik taarsigassarsinissarput piareersimaffisariaqarparput. amannami periarfissaqarluarpoq. Tamanna tunngaveqassaaq inuiaqatigiit unittuunnginnissaat tamatta kissaatigisariaqaratsigu aammalu upperigatsigu nunatta siunissami aningaasarsiornikkut periarfissai pitsaanerulertussaasut, partii allanik akitsuusersuisoqarnissaanik kissaateqanngitsoq oqarpoq.

Inuiaqatigiit naligiinnerusut

Illuatungiliuttuni partiit annersaannit Inuit Ataqatigiinnit Naalakkersuisut aningaasanut inatsisissatut siunnersuummut missingiutaat naammagineqanngilluinnarpoq. Partiimit malunnartumik allannguisoqarnissaa kissaatigineqarpoqet.

- Inuit Ataqatigiit eqqartorneqartariaqartutut pingaartutut isigaarput Inatsisartut aningaasanut inatsisaat siunissami inuiaqatigiit naligiinnerusut, sineriatsinnilu naligiinnerusumik kommunit akornanni ineriartortitsineq pilissappat iliuusissat amigaatigineqartut suunersut ujartueqatigiittariaqartugut. Naalakkersuiusooqatigiit illua-tungiliuttoqatigullu Inuit Ataqatigiinniit suleqatiserinnippugut. Ukiut qulit qaangiuppata nunarput qanoq ittoq pilersinniarlutigu sulilertariaqarpugut, partiimit oqaatigineqarpoq.

Demokraatit aamma aningaasanut inatsisissatut siunnersuut naammagivinngilaat.

- Nalilersueqqissaartariaqarpugut. Pisortat aaqqissuunneqarnera taama angitigitittariaqarparput? Pisariaqarpa inuussutissarsiutinut tapiissutinik taama annertutigisunik tunioraaginnarnissarput? Pisariaqarpa suliniaqatigiiffinnut soorlu ICC-tut ittunut aningaasatigut tapiissuteqartuarnissaq? Tassa tamakku eqqumaffigisassagut aningaasanut inatsisissamut siunnersuummut isumaqatigiinniarnitsinni, partii naalakkersuisooqatigiinnut ilaasoq, Aningaasaqarnermut Ataatsimiititaliami ataatsimiititaliap suliaqarnissaanik innersuussisoq oqarpoq

Amigartooruteqarnissamik siunnersuut isornartorsiorneqartoq

Partii Nalerqqamit amigartooruteqartumik siunnersuusiortoqarnissaa kissaatigineqanngilaq.

- Ullumikkut anigaasarsiaqarnerit aningaasarsiakkinerillu akornanni nikingassut annertusiartuinnarpoq, tassa pisoorsuit pisuunngoraluttuinnarput, piitsut piitsunngoraluttuinnarlutik. Kallerup inneranut imermullu akit qaffakkiartorput, nioqqutissat akii qaffakkiartorput, angallannikkut akit aatsaat taama qaffasitsigaat, ineqarnermut akit qaffarujussuarnissaat ilimanarsiartuinnarpoq, akitsuutit oqaluttuarisaanitsinni aatsaat taama qaffasitsigaat.

- Aap naalakkersuinikkkut ingerlaaseq allanngortinneqartariqarpoq inuit atugarisaat pitsaanerulersinneqassappata. Taamaammat maannakkut aningaasanut Inatsisissaq amingartoorfijusorujussuaq taamatut isikkoqartillugu akuersaarneqarsinnaanngilaq, nutaamik aaqqissuuseqqittariqarpugut, kritiserer Partii Naleraq.

Atassut isumaqarpoq, Naalakkersuisut aningaasanut inatsisissatut siunnersuummik suliaqarnerminnut atatillugu sattallutik sulisut, partiimit annertuumik allannguisoqarnissaa kissaatigineqarpoq.

- Tunngaviusumik Inatsisissamut isumalioqatigiisitaq peerallarli. Aningaasartuutaannaapput kusassaatit. Namminiilivinniapilunnerujussuaq unikkallarli, takorluugaq kusanartoq aningaasarsiorfigisinnaanngilarput.

- Siunnersuutigisarsimavarputtaaq nunani allanisuut takornarissat unnuinerannut akitsuusiinissaq. Takornarissat avataaniit tikittut akilertagassaat. Naatsorsuutiginngilarput tamanna uparuartalissagaat, tassami sungiusimareerpaat takornariassatillutik unnuinermut akitsuuserneqartarnertik, Atassummit ilaatigut oqaatigineqarpoq.

Nersorneqarlunilu isornartorsiorneqartoq

Naalakkersuisooqatigiinni partiip minnersaat Nunatta Qitornai, siunnersuummik naammagisimaarinnipput. Partiimilli neriuutigineqarpo, siunnersuummut ataasiakkaanik ilanngussisoqarnissaa.

- Piffinni inoqarfinni misissortissinnaanermut atortut, assiaqutit, saaffissat allallu suli nukittorsarneqarnissaannut aningaasatigut tunuliaqutsiisariaqarpugut. Nappaalaneqassagaluarpat uninngavissat aammalu ajornerpaamik atugaqalissagaluarutta atortorissaarutitigut amikkitsinnginnissaq isumagineqarsinnaanerlu sallersaali pingaarneq, partii erseqqissaavoq.

Suleqatigiissitsisut tupinnanngitsumik Naalakkersuisut siunnersuutaanut toqqaannartumik akerliupput, tassungalu atatillugu Tillie Martinussenip piumasaraa Naalakkersuisut tunuassasut.

- Tamanna oqaluuseriuarlugu qasunarsinnaavoq, naalakkersuisooqatigiilli mittarfiliorniarnermut tunngatillugu kukkussuteqartoqarsimanera akisussaaffittut tigusariaqarpaat, nassuerutigalugulu inuuniarnermi atortussanut akigititat, angalanermi bilitsit akiisa, aningaasaqarnerup atugarissaartuunerullu ajornerulersinneqarsimanerat.

- Saqqummiunneqarsimasut allarpassuit tunngavigalugit Naalakkersuisut tunuarsinnaanngippata, Nunatta Karsiata inissisimanera tunngavigalugu Naalakkersuisut iluatsitsinnginnertik nassuerutigalugu tunuartariaqaraluarput, Suleqatigiissitsisut sinnerlugit Inatsisartuni ilaasortaasutuaq oqarpoq.

Inatsisissatut siunnersuut oktobarip 28-ani aappassaaneerlugu suliarineqassaaq.