Partiit: Akileraartarnermut aaqqissuussinissaq aallartinneqarli

Inatsisartuni partiit Jens-Frederik Nielsenip akileraarusersuinermik ajornannginnerusumik, akileraartarnerullu appartinnissaanut siunnersuutaa isumaqatigaat. Aaqqissuusseqqinnissamulli suleriuseq qanoq ittoq oqallisigineqarpoq.

Nunatsinni innuttaasut aningaasaateqarnerusariaqarput, annikinnerusumik akileraartarlutik atugarissaarnerullutillu.

Inatsisartuni ilaasortat Jens-Frederik Nielsenip akileraartarnermut tunngatillugu siunnersuutaa ippassaq oqaluuserigamikku, taama oqariartuuteqarput.

Akileraartarnerulli aaqqiissuussiffigineqarnissaanut, suliallu qanoq sukkatingisumik ingerlanissaanut apeqqut oqallisigiuminaappoq.

Isumaqatigiissuteqartoqareerpoq

Inuit Ataqatigiit oqaaseqartuata Agathe Fontainip erseqqissarpaa suleqatigiit aningaasanut inatsisip isumaqatigiissutigineqarnerani isumaqatigeereersimasut inuit akileraaruserneqartarnerisa aaqqissuusseqqinnissaat piaartumik suliarineqassasoq. Tamatuma kingorna suliffeqarfiit akileraaruserneqarnerinut aaqqissuusseqqinnissat ingerlanneqassasut isumaqatigiissutaavoq.

IA-p kaammattuutigaa akileraartarnermut aaqqissuusseqqinnissat piaartumik aallartinneqassasut, Jens-Frederik Nielsenilli siunnersuutaa taamaatsillugu tapersernagu.

- Inuit Ataqatigiiniit siunnersuuteqartoq paasilluaraluarlugu, siunnersuummut qilersorsinnaaneq ernumagaarput. Suliarli piaartumik aallartinneqassasoq kaammattuutigerusunnerullugu, IA-p oqaaseqartua Agathe Fontain oqarpoq.

Innuttaasut akileraarutikinnerullutik kaasarfimmioqarnerulissappata, akileraarutissaraluanit annaasassat matussuserniarlugit aningaasat allamit nassaarineqartariaqarput.

Naatsorsuinerit takutippaat inummut ilanngaatip ukiut sisamat ingerlaneranni kittaarlugu 8.000 koruuninut qaffakkiartuaartinneqassappat, tamanna nunatta karsiata ukiumut 37 milliuunit koruuninik annaasaqaatigisassagaa.

Innuttaasut kaasarfimmioqarnerulissapput

Jens-Frederik Nielsenip inatsisartunut aalajangiiffigisassatut siunnersuutigaa naalakkersuisut akileraarusersuinermik ajornannginnerusumik, taamatulu akileraartarnerup annikillisinnissaanut suliaqartussanngorlugit peqquneqassasut. Kissaatigineqartoq, innuttaasut kaasarfimmioqarnerulernissaat, Atassutip isumaqatigaa:

- Innuttaasut kaasarfiisa nunatta aningaasiviatut isigineqanngilluinnarnissaat siunertariuarparput, Atassutip siulittaasua Aqqalu Jeremiassen oqarpoq.

Akitsuutilli aamma eqqaasitsissutigai:

- Akileraartarnerup nunatsinni piffissami aggersumi pingaartumik aaqqissortariaqalernera, nalimmassartariaqalernerat, oqilisarneqartariaqalernera akitsuusiisarnikkullu periutsinik allannguisoqartariaqalernera uninngaannartinneqarsinnaajunnaarpoq, oqarpoq.

Siumup naalakkersuisoq taperserpaa

Aningaasaqarnermut Naalakkersuisoq, Naaja Nathanielsen, siunnersuummut akissuteqaammini allannguutissatut siunnersuuteqarpoq, akileraarusersueriaatsimut ajornannginnerusumut sulinissamut aamma akileraarutip appartinnissaanut periarfissat oqallisaasimanerat aaqqissuusseqqinnissami ilanngunneqassasut.

Naalakkersuisup allannguutissatut siunnersuutaanut Siumut ilaliivoq, sulialli aallartilertornissaa pingaaruteqartoq oqaatigalugu.

- Siumumit isumaqarpugut akileraartarnermut aaqqissuusseqqinnerit suliarilluakkat pisartut, soqutigisaqaqatigiit innuttaasullu qanimut oqaloqatigilluarlugit ingerlanneqaraangata, taamaaliornikkut sakkugissaarnerussagatta, inuiaqatigiinni aningaasaqarnikkut ajunngitsumik ingerlaniartilluta. Taamaattoq aamma pingaaruteqarpoq, inuiaqatigiittut isigalugu akileraaruteqartarnikkut sukkasuumik aaqqissuusseqqinnissaq pisariaqartartoq, taamaalilluni inuiaqatigiinni piumasarineqartunut avataaniillu sunniutaasunut naleqqussarnissaq pilertornerusinnaammata, Kuno Fencker, S, oqaaseqaatimini oqarpoq.

Naleqqap Demokraatit siunnersuutaat ilalerpaa. Pele Brobergip oqaaseqaatimini erseqqissarpaa akileraartarnermut atugarisaarnermullu ataatsimiititaliarsuup innersuussutigisimagaa akileraarut siullermik 37 procentimut appartinneqarsinnaasoq, kingornalu 29 procentimut appartinneqarsinnaalluni. Naleqqamit siunnersuutigineqarpoq kommunimut nunattalu karsianut akileraartarneq agguarsimajunnaarlugu qitiusumik akileraartoqartalersinnaasoq. Taamaasiornikkut akileraarusersuineq eqaannerusoq aningaasartuutaannginnerusorlu anguneqarniassammata. Siunnersuut naalakkersuisumit aamma inatsisartunit tigulluarneqarpoq.

Siunnersuut ataatsimiititaliami suliassanngortinneqarpoq aappassaaneerneqassallunilu 25. maj.

Powered by Labrador CMS