Partiit siuttuisa qineqqusaarneq qinersinerullu inernera naammagisimaarpaat

Partiit siuttui qasoqqagaluarlutik taamaattorli nuannaarlutik KNR-ip inatsisartunut qinersinermut tunngatillugu unnuaq marlunngornerup pingasunngornerullu akornanni ataatsip qeqqata missaani katersuutsitsineranut peqataajartorput (Siverth K. Heilmann telefonikkut). Kisitsisit suli takkussuupput, taamaattorli Sisimiuni kisitsinerminni ajornartorsiuteqarmata, nalunaaquttap akunnialui utaqqisoqaqqaarpoq.

Sapaatip akunnerisa arfinillit ingerlaneranni qineqqusaarneq sakkortooq ingerlannikuullugu aammalu ulloq qinersivik sivisooq ingerlannikuullugu qasoqqagaluarlutik, qiimallutik partiit siuttui KNR-ip qinersinermut atatillugu aallakaatitsinerata naggaserneqarnerani peqataapput. Periarfissarlu iluatsillugu qinersisiminnut qineqqusaarnermilu tunuliaquttaminnut qujamasunnertik ersersippaat.

Siumut

Siumup siulittaasua Kim Kielsen oqilisimaarluni naqissuserpaa, Siumut Kalaallit Nunatsinni partiini annersaaginnartoq qinersisartut 27,2 procentii tunuliaqutaralugit, tamannalu isumaqarpoq partii 2014-mi aqqanilinnik inatsisartuniititaqariarluni qinersinermi matumani qulingiluanik inatsisartuniititaqalissasoq.

- Kalaallit Nunarput qinersinermut tunngatillugu pilluaqquara, aammalu qinersinermikkut nunatta ingerlaqqinnissaa pillugu ilusilersuinermut qinersinermikkut aalajangersaaqataasut tamaasa qutsavigaakka. Tullinnguuttoq tassaavoq naalakkersuisooqatigiinnissamut tunngatillugu ataatsimiinnerit ingerlanneqarnissaat. Partiit tamaasa ammaffigaakka, isumaqatigiissutigaarpullu oqaloqatigiinnernut aggersaassasunga qasuersaalaariarluta.

Kinguariarnertik pillugu nassuiaavoq Siumumut qinersisartut aalajaatsupilussuusut, qinertakkatillu allamut nuukkaangata qinersisartut aalajaannermikkut nooqataasartut. Taamatuttaaq qinersisitik siulittaasumuunnaanngitsoq sassartunulli siammasinnerusumik siammarneqarsimammata naammagisimaarinninnerarpoq.

Inuit Ataqatigiit

Inuit Ataqatigiit siulittaasuata Sara Olsvigip ajuusaarutigaa partii angusarissaarnerunngimmat aammalu naalakkersuisunik pilersitsisoqarnissaani siuttuusinnaanngimmat, taamaattorli inerniliivoq angusartik naammagisimaarnartoq, partiip anguniagaanik naleqartitaanillu, pingaartumik kikkut tamarmik inissaqarnissaannik oqariartuutiminnik siammarterilluarsimanertik innersuussutigalugu.

- Malugisinnaavara anguniakkavut naleqartitavullu innuttaasut tigulluarsimagaat, taamaattorli nunatsinni partiit arfineq marlunngornerat ilaatigut pissutaalluni qinersinerup inernera taamaappoq, Sara Olsvig tikkuaavoq.

Taamaattorli Sara Olsvigip nassuerutigisariaqarsimavaa Nuummi partii kinguariangaatsiarsimasoq, 13,6 procentimik kinguariarluni, tamannalu ilaatigut pissutaanerarpaa nuna tamakkerlugu kinguariarnerminnut. Sermitsiaq.AG-mut oqarpoq sinerissami ingerlalluarnertik sineriammiunillu inatsisartuni ilaasortaatitaqarluarnertik ilutigalugu Nuummut tunngatillugu oqimaaqatigiissaarisimanertik naammassimanngitsoq aammalu Nuummi malunniutikippallaarsimasinnaallutik.

Demokraatit

Demokraatit siulittaasuata Randi Vestergaard Evaldsenip assut nuannaarutigaa partii siuariangaatsiarmat, qinigaaffimmi kingullermi sisamanik ilaasortaatitaqariarlutik qinersinermi arfinilinngortinneqarput, tamannalu 7,7 procentimik siuariarneruvoq. Randi isumaqarpoq anguniakkatik sulissutigiumasatillu ersarissumik siammarterneqarneri aammalu unammilligassanut aaqqiissutissanik siunnersuuteqarlutik saqqummiussuinertik qinersisartut tigulluarsimagaat kiisalu aaqqissuussaanerup allanngortinneqarnissaanik pisariaqartitsisoqarnerarlugu ersarissuliornertik qinersisartut tigulluarsimagaat.

Partii Naleraq

Parti Naleqqap siulittaasuata Hans Enoksen-ip aamma nuannaarutigaa parteertik siuarialaarsimammat 1,8 procentimik, siuariaat annikikkaluarluni Inatsisartuni ilaasortat 2014-mi pingasooriarlutik qinersinermi matumani sisamanngorput. Hans Enoksen erseqqissaavoq siuariarsimallutik, naak massa qallunaat tusagassiorfii Sermitsiarlu namminiilivinnissamut tunngatillugu sakkortoorujussuarmik isornartorsiorneqartaraluarlutik.

Atassut

Atassut Inatsisartuni ilaasortaatitaqaqqilerpoq, partiip ilaasortaatitani annaagaluarpai Knud Kristiansen aamma Mala Høy Kúko partiimit tunuarlutik Siumumut ilaasortanngormata. 0,6 procentimik kinguarialaaraluarlutik inissat marluk uterteqqippaat. Partiip siulittaasua Siverth K. Heilmann angusartik pillugu naammagisimaarinnippoq.

- Naqqaniit suna tamaat allarteqqittariaqarsimavarput, atsiornernik katersisariaqarsimavugut aammalu partiitta qineqqusaarnermi tunngavissai piffissap sivikitsup iluani nukippassuit atorlugit isumannaartariaqarsimavagut, taamaammat angusarput nuannaarutigaara, Siverth K. Heilmann oqarpoq.

Suleqatigiissitsisut

Taamatuttaaq Suleqatigiissitsisut angusaminnik nuannaarutiginnipput, siulittaaMichael Rosing oqarpoq:

- Partii ukioq manna 11. marts pilersipparput, maannalu Inatsisartuni issiatitaqalerluta. Ilaasortaq ilaasortaavoq tamatumalu periarfissippaatigut Inatsisartuni oqaloqataasinnaanissatsinnut, taamaalilluta naalagaaffeqatigiinnerup ataannarnissaanik aammalu Tilliep (Martinussen) uummateqarfiata, tassalu meeqqat inuusuttullu sullinneqarnissaannik inatsisartutigut aallussisinnaanngorpugut, taamaammat angusarput pillugu assut tulluusimaarpunga, Suleqatigiissitsisut siulittaasuat Michael Rosing oqarpoq.

Nunatta Qitornai

Taamatuttaaq partii pilersinneqaqqammertoq alla Nunatta Qitornai inatsisartuni ilaasortaatitaqalerpoq, siulittaasuallu Vittus Qujaukitsoq angusaminnik naammagisimaarinnippoq:

- Partiimik aallartitsinitsinniit sapaatip akunnerisa arfinillit iluanni sorpassut pipput, sapaatip akunnerisa arfinillit iluanni qineqqusaarneq pikkunaqaaq, taakku pasilliuterpassuit aqqusaarpavut, allaat siulittuutigineqaraluarluni Inatsisartunut isertitaqarnavianngutsugut. Taamaattumik nuannaarpunga qinersisartut oqariartuutigut ilassilluarmatigit qinigaatitaqartillutalu, Vittus Qujaukitsoq oqarpoq.

Partiit siuttuisa ulluni tulliuttuni periuusissatik paarilluarpaat, aammalu qulequtarsiuinerit eqqaassanngikkaanni naalakkersuisooqatigiinersinnaanermi piumasaqaatissatik itisilerumanngikkallarpaat, oqaloqatigiinnerit isumaqatigiinnarnerillu Kim Kielsen-ip aallartitassai pitinnagit, naatsorsuutigineqarporlu qasuersaalaariarluni aallartittoqassasoq.