Partiit siullermeerlutik isumaqatiginninniarlutik ataatsimiinnerat naammassivoq

Siumup siulersuisuni partiillu Inatsisartuni ilaasortaatitai nutaat susoqassanersoq ataatsimiissutigaat. Partiinik allanik isumaqatiginninniarnerit suli oqaatigineqarumanngikkallarput.

- Suli oqaaseqarsinnaanngikkallarpunga. Siulersuisuni ilaasortat Inatsisartunilu ilaasortaalersut partiinik allanik ataatsimeeqateqarnerit pillugit ataatsimeeqatigineqaqqaassapput. Taanna periarpat nalilersuilerumaarpugut susoqassanersoq, Kim Kielsen oqarpoq.

Suleqatigiinnissaq IA-mit ammaffigineqarpoq
Inuit Ataqatigiit Siumumik ataasinngornermi nalunaaqutaq 09.00 ataatsimeeqateqaqqaartuuvoq.

- Ingerlalluarpoq. Ataatsimiinneq isumaqatiginninniarnerunngilaq. Kaffisoqatigiippugut, allamik naamik, Sara Olsvig oqarpoq.

Ataatsimiinnik akunnermi ataatsimi sivisussuseqartumi suut eqqartorneqarsimanersut oqaatigiumanngilaa. Ataatsimeeqqinnissartilli isumaqatigiissutigaat. Qaqagu taanna pissanersoq Siumup aalajangerumaarpaa.

- Taakku qaaqqusussaavaatigut. Qaqagu taanna pissanersoq ilisimanngilara.

Partiit allat assigalugit, Siumut suleqatiginissaat ammaffigaat.

Siammasissumik suleqatigiinnissaq
Demokraatit tulliullutik Siumumik ataatsimeeqateqarput.

- Suut eqqartorsimanerigut oqaatigissanngilakka. Siumumik ataatsimeeqateqarsimanerput pillugu parteeqatikka isumasiussavakka, partiip siulittaasua Andreas Uldum oqarpoq.

Ataatsimiissimanertilli ingerlalluarsimasoq oqaatigisinnaavaa.

- Inatsisartuni sulinitsinnit immitsinnut nalunngilagut. Ataatsimiinnerput eqqissilluta ingerlapparput kaffisoqatigiilluta. Partiinik allanik ataatsimeeqateqarnissara naatsorsuutigaara. Periarfissaasinnaasut tamaasa ammatippagut. Qineqqusaarnermi oqaatigineqarpoq siammasissumik suleqatigiittoqassasoq, tamanna piviusunngornissaa neriuutigaara.

Demokraatit Siumukkullu qaqagu ataatsimeeqqissanersut ilisimaneqanngilaq. Demokraatit qaaqquneqaqqissanerlutik aamma naluaa.

Partii Naleqqap inissani qulakkeerusuppaa
Siumumik ataatsimeeqateqareernermi kingorna, Partii Naleqqap siulittaasua, Hans Enoksenl, qungujulalluni anillappoq. Ataatsimiiffigisaannit aamma ersaattaappaluttut tusaaneqarsinnaapput.

- Annertuuliuutissaanngilaq, nassuiaavoq.

- Qineqqusaarutivut anguniakkavullu saqqummiuppagut, taakku kisimik nalilersuutigineqarput. Ataatsimiinnerput isumaqatiginninniarnerunngilaq. Oqaluuserineqartut siulersuisuni oqaluuserineqassapput.

Ineqarnerup akiata apparneqarnissaa, aalisarnerup iluarsartuuteqqinnissaa ilinniagaqarfiillu amerlanerulernissaat Partii Naleqqamit Siumumiillu oqaluuserineqarput. Pisortat allaffeqarfiini aamma aaqqissuusseqqinnissat pisariaqarnerat oqaluuserineqarpoq.

- Naalakkersuisooqatigiinnissamik isumaqatiginninniartoqalissappat piareersimavugut. Kissaatigut oqaatigaagut. Naalakkersuisooqatigiilissagutta inissisimalluarnissarput qulakkeertariaqarparput, Hans Enoksen oqarpoq.

Avinngarusimasuni pitsanngorsaanissat suli oqallisigineqarsimanngitsut Hans Enoksenip oqaatigaa.

Qaaqqunerarnissamik utaqqipput
- Eqqissilluta oqaluunnissatsinnut aatsaat tassa piffissaqaleratta eqqissilluta oqaluuppugut, Atassutip siulittaasua Knud Kristiansen, Siumumik ataatsimeeqateqareernermi kingorna oqarpoq.

Pingaartitatik pillugit oqaluussimallutik oqarpoq.

- Ataatsimiigiaqquseqqittoqarnissaanik qaaqquneqarnissarput utaqqiinnalerparput. Parteeqatimma aamma isumaat paaseqqaartariaqarpakka, Atassutip siulittaasua oqarpoq.