Partiit siulittaasuisa kalaallit sunniuteqartussatut oqaatigaat: - Danmarkimi partiit saamerliit amerlanerussuteqanngillat

Aki-Matilda Høegh-Damip, Siumut, aamma Aaja Chemnitzip, Inuit Ataqatigiit, qinigaanerisigut partiit saamerliit Folketingimi 90-erpiaallutik amerlanerussuteqalerput.

Politikkerit taakku marluullutik qinersinissaq sioqqullugu oqaatigereernikuuaat, Mette Frederiksen (Soc.) ministeriunissartut toqqassamaarlugu.

Danmarkimi qinersisoqareersoq partiit siulittaasuisa inaarutaasumik oqallitsinneqarneranni, ministeriunerusimasup partiimit nutaameersup Moderaternemeersup Lars Løkke Rasmussenip kalaallit folketingimi ilaasortaatitaasa pingaarutilimmik sunniuteqartussaalernerat ajornartorsiutaanerarpaa.

Taassuma erseqqissaassutigaa, Danmarkimi partiit saamerliit amerlanerussuteqanngitsut:

- Ingerlaqqittariaqartut

- Oqarputit (tv-kkut aallakaatitsinermik ingerlatsisoq) danskit partiit saamerliit amerlanerussuteqartilerlugit taasisimasut, tamannali eqqorpallaanngilaq. Taamatut oqarninni tunngavigivat, Atlantikup Avannaaneersut partiinik saamerliusunik taasisimanissaat. Qinersinerulli inernera suli naluarput, ilimanarporli kalaallit partiinit saamerlerneersut marluk qinigaanissaat, Lars Løkke Rasmussen oqarpoq, nangillunilu:

- Danmarki qiviarutsigu - tassa naalagaaffik Danmarkiunngitsoq - taava partiit saamerliit amerlanerussuteqanngillat.

Lars Løkke Rasmussenip ilangullugu oqaatigaa, Folketingi taamatut aaqqissuussaasoq, ingerlaqqittoqartariaqartorlu.

LA-mi siulittaasoq isumaqataasoq

Lars Løkke Rasmussenip saniatigut Liberal Alliancemi siulittaasup Alex Vanopslaghip Kalaallit Nunaanneersut sunniuteqarnissaat aamma oqaaseqarfigaa:

- Atlantikup Avannaani qinigaasut ilanngullugit kisitsigaanni, taava partiit saamerliit amerlanerussuteqarput. Danskilli qinersinerat kisiat eqqarsaatigissagaanni, taava danskit amerlanerussuteqartut Mette Frederiksenimut akerliupput, oqartussaaqataanerpulli taamatut aaqqissuussaavoq, partiimi siulittaasoq oqarpoq.

Konservativet siulittaasuata Søren Pape Poulsenip (K) pingasunngornermi ullup-qeqqata siornatigut tamanna "eqqarsarnartoqartippaa":

- Danskit allamik ministeriuneqartoqartariaqarneranik oqarsimanerat eqqarsaatigalugu tamanna eqqarsarnartortaqarpoq. Atlantikup Avannaaneersut Danmarkimki kiap ministeriunerunissaanik aalajangiissanerlutik isummerfigisariaqarpaat.

- Oqartussaaqataanerput taamatut aaqqissuussaavoq. Tamanna attanneqarsinnaasariaqarpoq, uangalu tamanna attassinnaavara, Ritzau naapertorlugu Søren Pape Poulsen (K) pingasunngornermi Publicitklubbimi oqallittoqannginnerani taamatut oqarsimavoq.

Atlantikup Avannaaneersut sunniuteqarsinnaanerat siusinnerusukkut sammineqarsimasoq

Atlantikup Avannaaneersut sunniuteqarsinnaanerat Savalimmiuni politikkerip Sjúrður Skaalep siusinenrusukkut qaqissimavaa. Skaalep qinersisoqarneranut atatillugu erseqqissaassutigisimavaa Mette Frederikseni tapersersorlugu, arlaleriarluniliu atlantikup avannaaneersut sunniuteqarsinnaanerat pillugu oqallittoqarnissaanik kammattuisarsimalluni.

Assersuutigalugu Mette Frederiksen 2021-mi decembarip qaammataani Folketingimi oqalliseqatigingamiuk:

- Ministeriuneq aaqqissuussaq taamatut isikkoqartillugu Atlantikup Avannaaneersugut kujammukarluta Danmarkimi qinersisoqarnerani ajorsarsimasunut amerlanerussuteqartitsilersinnaanerput pillugut tunngaviatigut qanoq isumaqarpa, Skaale ministeriunermut taamatut apeqquteqarsimavoqren.

Ministeriunerup tamanna ajornartorsiutaanngitsoq oqaatigisimavaa:

- Tunngaviusumik inatsit malillugu Danmarkip Folketingiani ilaasortat 179-iusussaapput, ilaasortallu tamarmik immikkut sunniuteqarsinnaallutik, inatsillu tunngaviusoq malillugu naalakkersuisunngortitsinissamut malittarisassaqarluta, tassungalu atatillugu ilaasortat arlaannaannilluunniit immikkoortitsinianngilanga, Mette Frederiksen taamanikkut taamatut oqarsimavoq.

Sunniuteqarsinnaanerat suli nalunartoq

Aki-Matilda Høegh-Dam aamma Aaja Chemnitz Mette Frederiksenimut amerlanerussuteqartitsilersinnaasutut ilimagineqaraluartut, Kalaallit Nunaannit ilaasortaatitat takku marluk qanoq sunniuteqarsinnaanerat suli nalunarpoq.

Mette Frederiksenimmi partiit talerperliit saamerliillu akornanni siammasissumik naalakkersuisuutitaqartoqartnissaanik kissaateqarnini maannamut aalajangiussimavaa. mette Fredseriksen ullumi Dronningimukarluni Danmarkimi naalakkersuisut atorunnaartut nalunaarutigiartussavaa, tamatumalu kingorna naalakkersuisunngortitsiniarnissamut dronningimit peqquneqaruni, nutaanik naalakkersuisunngortitsinissamut partiinik isumaqatiginninniarneq aallartissallugu.