Partiit qilalukkanik qernertanik immikkut 100-nik pisasseeqqusisut
Partiit sisamat Naalakkersuisunut ammasumik allagaqarnermikkut, qilalukkanik qernertanik pisassiissutit qanoq amerlatigisunik ilaneqarnissaannik kissaateqartut
Siumut, Partii Naleraq, Atassut Nunattalu Qitornai septembarip 26-ani ammasumik allagaqarnermikkut qilalukkanik qernertanik immikkut pisasseeqqusipput.
Naalakkersuisut tallimanngormat tunniutiinnarput, immikkullu katillugit qilalulukkanik qernertanik 48-nik pisasseeqqillutik.
Partiit taakku sisamat qilalukkanik qernertanik immikkut 100-nik pisasseeqqittoqarnissaanik aallaqqaammut eqqarsaateqarsimapput. Ammasumik allakkanut missingiummi Sermitsiaq.Ag-mit pissarsiarineqarsimasumi taamatut allassimasoqarpoq. Missingiummi, sumiiffiit assigiinngitsut qanoq amerlatigisunik immikkut qilalukkanik qernertanik pisassinneqassanersut allassimapput:
Qaanaaq: 25
Savissivik: 5
Upernavik: 25
Ilulissat: 10
Tasiilaq: 25
Ittoqqortoormiit: 10
Ammasumik allakkat inaarutaanni immikkut qanoq amerlatigisunik pisasseeqqittoqassanersoq imaluunniit aqutsiveqarfiit sorliit pisassiivigineqaqqissanersut allassimanngilaq. Sermitsiaq.AG-p ilisimatitsissutaa naapertorlugu, kisitsisit pineqartut Siumut iluminni oqallisigisimannguatsiarpaat.
Immikkut pisassiissutissat Naalakkersuisut tallimanngormat nalunaarutgisaat imatut agguaanneqarsimapput:
Etah: 4 (ammasumik allakkani Qaanaaq tassunga ilanngunneqarsimavoq)
Qaanaaq: 16
Savissivik: 4
Upernavik: 12
Tasiilaq: 12
Takuneqarsinnaasutut Qeqertarsuup Tunua Ittoqqortoormiilluunniiit immikkut pisassinneqarsimanngillat.
Inuit Ataqatigiit allakkamut atsioqataasimanngillat. Partiimiilli Avannaarsua, tassa Qaanaaqq Savissivillu immikkut pisassinneqarnissaat kissaatigineqarsimavoq.