Partiit pingasut Tasiilaq Ittoqqortoormiillu nammineq kommuninngornissaannik neriorsorpaat

Inuit Ataqatigiinneersup Charlotte Ludvigsenip qinersinerup kingorna unammilligassaa siulleqtassaavoq nunarsuarmi kommunit annersaanni borgmesterinngornissani.

Qineqqusaarnermi Siumup, Naleqqap aamma Nunatta Qitornaasa Tasiilaq Ittoqqortoormiillu namminiilernissaannik neriorsorpaat, Sermersuarlu avissaaqutigalugu Kommuneqarfik Sermersooq avinneqarpat Tunumi kommunimik pilersitsisoqassaaq angissutsimigut Kitaani kommunip sinneranit anginerujussuarmik, ikinnerujussuarnilli inulimmik.

Nuuk Paamiullu ullumikkut 20.352-inik inoqarput; Tasiilaq Ittoqqortoormiillu 3.110-nik inoqarput.

Aaqqissuussaanermut Ataatsimiititaliap inassutiginikuuaa 2009-mi kommunit kattunnerisa
kingorna kommunit nutaat ikinnerpaamik 8.000-inik inoqassasut, akisussaaffiit arlallit, ullumikkut namminersorlutik oqartussanit isumagineqartut, tigunissaannut naammattumik
nukittussuseqassagunik.

– Tunumi kommuni 3.110-nik inulik, nunami tamarmi appasinnerpaamik aningaasarsiorfiusoq, qanoq ililluni imminut napatissinnaassagami?

– Pissutigalugu inuussutissarsiornikkut periarfissarpassuaqaqigatta, kommunip
pilersissinnaasimanngisaanik, Emanuel Nûko oqarpoq.

Kommunitut namminersulernissamut atortussatut pingaartumik takornariaqarneq aalisarnerlu tikkuarpai.

Inatsisartuni sinniisussatut Emanuel Nûkop 2018-imi Naalakkersuisunut apeqqutigaa Tunumi kommunimik namminersortumik pilersitsineq qanoq akeqassanersoq.

Naalakkersuisut tamanna eqquissumik oqaatigisinnaanngilaat, Kommunilli Qeqertallip 2018-imi kommunalbestyrelseqalerluni qitiusumillu allaffeqarfeqalerluni pilersinneqarnera 90 millioner koruuninik akeqarsimavoq. Naalakkersuisut nassuerutigaat namminersortumik
kommuneqalernikkut Tunumi innuttaasut kommunalbestyrelsimut qaninnerulerneq misigissagaat, oqaatigisinnaanaguli Tunumi kommunimi namminersortumi sullissinerup pitsaassusia qanoq ittuussanersoq.

Emanuel Nûkop Naleqqameersup Tunumi kommunitoqqat pilerseqqinneqarnissaat kissaatigaa

– Kommunit kattunneqanngikkallarmata Ammassallip Kommunia aningaasaqarnikkut
ingerlalluarsimavoq, namminerlu inuussutissarsiutit ineriartortinnissaat akisussaaffigigutsigu ullumikkut aamma taamaassagaluarpoq. Nuummit avissaarnissaq inuit akornanni oqaluuserineqartarpoq, minnerunngitsumik qineqqusaarnerup nalaani, marlunngormallu qinersinikkut uppernarsarneqarpoq nammineq kommuneqaleqqinnissatsinnut piumassuseqartoqartoq kajumissuseqartoqarlunilu, Emanuel Nûko oqarpoq.

Kommunimut qinersinermi taanna 229-init taaneqarpoq, taakkulu kommunalbestyrelsimut
isernissamut naammanngillat. Akerlianik Emanuel Nûko Inatsisartunut qinerneqarpoq 161-inik taaneqarluni, Tunumilu namminersortumik kommuneqalernissaa Inatsisartut ataatsimiittarfianni sorsuutiginiarpaa.

Nuummit avissaarusuttoq

Naleqqamit Tunumi taaguunneqarnerpaaq, Tasiilarmiu Emanuel Nûko, 29-nik ukioqarpoq,
taamaalillunilu ukiuni 17-ini Ammassallip Kommuniani najugaqarsimavoq, ukiunilu 12-ini
Kommuneqarfik Sermersuumi najugaqarsimalluni.

– Nuummit, Tunumik soqutiginninngitsumit, avissaarusuppugut. Kommunit kattunneqarnerisa kingorna Tasiilaq nunaqarfivullu tallimat inissialiornikkut, suliffissaqarnikkut, aaqqissuussinertigut allarpassuartigullu kinguaattoorsimapput. 2009-mi kommunit aaqqissuuteqqinneqarnerat sioqqullugu ukiut tamaasa illuliortoqartarpoq, 2015-imiilli kommuni Tasiilami illumik ataasinnguamilluunniit sanasimanngilaq. Sermersooq sioqqullugu Tunumi pissutsit pitsaanerujussuusimapput, suliassamalu annersaat tassaavoq tullianik 2025-mi kommunimut qinersinissami kommunitoqqap utertinneqarnissaa, Emanuel Nûko Sermitsiamut oqarpoq.

Tunumi kommuni

Inuit amerlassusaat

Tasiilaq ......................... 1.916

Sermiligaaq .................... 210

Isertoq ................................. 58

Kulusuk ............................ 216

Tiileerilaaq ........................ 93

Kuummiit ........................ 254

Ittoqqortoormiit ........... 363

Katillugit .............................. 3.110

Kitaani kommuni

Inuit amerlassusaat

Arsuk ................................... 82

Paamiut ........................ 1.247

Nuuk ........................... 18.800

Qeqertarsuatsiaat ....... 181

Kapisillit ............................. 42

Katillugit ........................... 20.352

Kommunimut qinersinermi Ken Madsen, aamma Naleqqameersoq, Ittoqqortoormiini nunap immikkoortuata sinniisuatut ajugaavoq, taassumalu Emanuel Nûko assigalugu Tunumi namminersortumik kommuneqalernissaa tapersersorpaa.

Tunumi kommunit nammineq ingerlatsisut

Nuup Tunu soqutiginngikkaa borgmester Charlotte Ludvigsenip eqqunnginnerarpaa.

Kommuneqarfik Sermersuumi 2019-imi aningaasat qanoq agguataarneqarsimanerisa takutippaat Nuup Ittoqqortoormiini 30 millioner koruunit, Tasiilamilu 124 millioner koruunit, atorsimagai.

– Kommunimut tamavimmut borgmesteriunissara pingaartilluinnarpara, Charlotte Ludvigsen Sermitsiamut oqarpoq.

Borgmesteri Tasiilameeqqammersimavoq, tassani isumaginninnikkut ingerlatsiviit marluk
atuutilersikkiartorlugit: Anaanap/Meeqqap illuata angajoqqaanngorlaat inuttut ajornartorsiutillit ikiussavai, inuusuttunullu centerip meeqqat anginerusut ikiussavai inuusuttullu 18 aamma 23-t akornanni ukiullit tapersersussallugit.

Kitaata kujataani Arsummit Tunup avannaani Ittoqqortoormiinut ungaseqaaq.

– Assigiinngisitaassuserli tamannarpiaq nukittussutsittut isigissavarput, Charlotte Ludvigsen oqarpoq.

Borgmesterip nassuerutigaa Tunumi suliffissaaleqisoqartorujussuusoq, Tasiilarmiullu Royal
Greenlandip Kitaani suliffissuaataanut suliartortinneqartarsimapput.

Kommuneqarfik Sermersuup Politikkikkut Ataqatigiissaarinermut Gruppimut, tassaasoq
Naalakkersuisut borgmesterillu tallimat, siunnersuutigisimavaa kommuninik nammineq
ingerlatsisunik (frikommuninik) pilersitsinissamut periarfissiisoqassasoq.

– Tunumi kommuni nammineq ingerlatsisoq nammineq tunngavissani atorlugit suliffinnik
pilersitsisinnaavoq, inatsisinik malittarisassanillu, kommuninut atuukkaluartunik,
qilersorneqarsimanani, Charlotte Ludvigsen oqarpoq.

Aggustip aallaqqaataanut killissalerlugit namminersorlutik oqartussani Nunamut namminermut pissutsinut immikkoortortaqarfiup kommunalbestyrelsit tamaasa, kommuninik nammineq ingerlatsisunik misileraanissamut kissaatigisaannik qinnuigisimavai. Taamaalilluni kommunalbestyrelsip nutaap suliassaasa siulliit ilagissavaat Kommuneqarfik Sermersuup kommunimik nammineq ingerlatsisumik takorluugaanik saqqummiussinissaq.

Aviisi Sermitisaq tamaat atuaruk UANI:

Powered by Labrador CMS