Partiit nutaat meeqqanit soqutigineqarluartut

Meeqqat ataasiakkat pinnagit angajoqqaamisulli qinersipput.

Partiit nutaat marluk, Nunatta Qitornai ingammik Suleqatigiissitsisut meeqqanit nuannarineqarluarput. Tamanna Nakuusap nittartagaani matoqqasumik qinersititsisussaarnerani takutinneqarpoq. Atuartut 4. klassimiit 10. klassit tungaanut atuartut taasinermi peqataapput.

- Meeqqat qinersisinnaanngikkaluit isumaannik tusarfiginissaat pingaartutut isigaarput. Ukiulli arlaqanngitsut
qaangiuppata taakku qinersisinnaalertussaapput. Meeqqanut inuusuttunulluttaaq aamma pingaaruteqarpoq inuiaqatigiit
akornanni inuiaqatitut akuutinneqartutut misigitinneqarnissaat. Amerlasuut qinersineq malinnaaffigilluarpaat
inernissaallu pissangassutigerrallugu, Arnavaraq Jørgensen, NAKUUSAmi pilersaarusiornermi aqutsisoq oqaluttuarpoq.

Taasititsinermi meeqqat angajoqqaaminniit allaanerugaanngitsumik isummersimanerat takutinneqarpoq. Tassa Siumut aamma Inuit Ataqatigiit anginerpaanngussapput. Partiillu allat tapersersorneqarluarnerat HS Analysep isumasiuinerani kingullermik takuneqarsinnaavoq (allaannguuteqarsinnaanerali sillimaffigineqassaaq).

Partiit marluk immikkut taaneqarsinnaasut tassaapput, Nunatta Qitornai 7,4 procentimik pissarsisut (HS Analysemit 3,6-mik pissarsisimasut, minnerunngitsumillu Suleqatigiissitsisut (2,9 procentimiit) 9,3 procentimik pissarsisut.

Powered by Labrador CMS