Partiit Nato pillugu isumaqatigiinngitsut
Folketingimi ilaasortap Aaja Chemnitzip (IA) Nato-p sakkutuuinik nunami maaniittoqannginnissaanik oqaaseqarsimanera assortuussutaavoq. Uppianerullunilu Kalaallit Nunaannik Danmarkimut avissaartitsiniarnerusoq, arlalinnit isornartorsiuilluni oqaatigineqarpoq.
Naleqqamit, Demokraatinit Siumumillu folketingimi ilaasortap Aaja Chemnitzip (IA) Nato aamma sillimaniarnermi politikkimut atatillugu USA-mik suleqateqarneruniarneq pillugit apeqqusiisimanera isumaqatigineqanngilluinnarpoq.
Partiinit oqaatigineqarpoq, Kalaallit Nunaat Danmarki aqqutigalugu Nato-mut ilaareersoq aamma USA-mik suleqateqarnerulernikkut nunat assigiinngitsut imminnut sunniiveqatigiittarnerannut ulorianartorsiortitsiffiusumi nunap isumannaassusaa pitsaanerulersinneqassasoq.
- Kalaallit Nunaata sillimaniarnermut nunallu assigiinngitsut sunniiveqatigiitarnerannut soqutigisani nammineq isumagisariaqarpai. Inuiaavugut nunarsuarmi inuiaat allat assigalugit nunani tamalaani inissisimaffitsinnik nammineq aalajangiisinnaassuseqarnissamut tamakkiisumillu oqartussaassuseqarnissamut pisinnaatitaaffillit, Siumut sinnerlugu folketingimut qinigassanngortittoq Markus E. Olsen, Aaja Chemnitzip Nato pillugu oqaaseqaataanut qisuariarluni tusagassiorfitsigut nalunaaruteqarluni allappoq.
Nunat eqqaamiorisat suleqatigineqarnerusariaqartut
Aaja Chemnitzip Ilulissani qinersisartunik ataatsimiisitsisoqarmat USA-mik suleqateqarnerunissamik kissaateqarani oqaaseqarsimanera Naleqqamit Siumumillu nuannarineqanngilluinnarpoq. Kalaallit Nunaannik Danmarkimit avissaartitsiniarnerusoq, partiinit taakkunanit marlunnit oqaatigineqarpoq.
- Isumannaatsuunissarput matumani pineqarpoq, aamma nukittuunik, soorlu Canadamik, USA-mik ikinngutitsinnullu Islandimik Danmarkimillu suleqateqarnissaq pisariaqartipparput, Siumumi politikkeri erseqqissaavoq.
Nalera sinnerlugu Folketingingimut qinigassanngortittoq Kiista Fencker aamma Aaja Chemnitzip oqaaserisimasaanut sakkortuumik isornartorsiuivoq.
- Naleqqamiit Aaja Chemnitzip nalunaarutaa aamma Danmarkimut immikkut suli pituttuiniarnera isumaqatigisinnaanngilluinnarparput. Akerlianilli piaarnerpaamik Kalaallit Nunaata USA-llu illersornissaq pillugu isumaqatigiissuteqarnissaat, sapinngisamik piaarnerpaamik atuutsinneqalertussamik anguniartariaqarparput.
Markus E. Olsenip oqaatigaa, Nato-mut ilaasortanngorsinnaaneq innuttaasunit isummerfigineqartariaqalersoq, Kalaallimmi Nunaat illersoqatigiinnissamik isumaqatigiissut 1949-mi atuutsinneqalermat Danmarkip Kalaallillu Nunaata ataqatigiinnerat pissutigiinnarlugu ilaasortaamat.
- Taamanikkut nunatsinnut tunngassuteqartunut aamma nunanut allanut sillimaniarnermullu politikkimut oqartussaaqataasutut sunniuteqarata nunasiaataavugut. Siumumit taamaammat isumaqarpugut, nammineq inatsisartuvut aqqutigalugit Nato-mut tamakkiisumik ilaasortanngussanerluta aalajangiisariaqalersugut, tassa 1949-mi Danmarkip aalajangiussaanut ilanngussatuinnaq ilaasortaanata, taanna tusagassiorfitsigut nalunaaruteqarluni allappoq.
Innuttaasut Nato-mut ilaasortaarusuttut
Taassuma innersuussutigaa, Ilisimatusarfimmit misissuisimanerup takutissimaga, Kalaallit Nunaanni innuttaasut Nato-mut ilaasortanngorusuttut.
- Siumumit takorloorparput Islandimisulli inissisimassasugut, tassa sakkutooqanngikkaluarluta aamma illersornissamut ministeriaqarfeqanngikkaluarluta pisussaaffit pisinnaatitaaffiillu pigalugit Nato-mut ilaasortanngorsinnaalluta. Soorlu Islandimi taamaaliortoqarsimasoq, siunnersuutaa taamatut nipeqarpoq.
Oqartussaaffiit illersorneqarsinnaasariaqartut
Demokraatit siulittaasuat Jens-Frederik Nielsen aamma erseqqissumik oqaaseqarpoq.
- Illersornissamut sillimaniarnermullu politikkip folketingimut qineqqusaarutigineqarnera ulorianartumik uppertikkuminartuunertut oqaatigisariaqarpoq.
Taassuma partiit allat marluk assigalugit erseqqissaassutigaa, Kalaallit Nunaat Danmarki aqqutigalugu Nato-mut ilaasortaareersoq.
- Sakkutuut tuusintilikkaat aqqusinerni angalaartarnissaat aamma illoqarfinni tamani sakkuusiveqarnissaq radareqarnissarlu arlaannaannilluunniit oqaatigineqanngilaq. Illersorteqartariaqarpugulli aamma nammineerluta oqartussaaffitsinnik isumaginnissinnaasariaqarpugut. Nunarsuarmut qanorluunniit kusanartigisumik isumaqaraluarutta tamanna takusinnaasariaqarparput.