Partiit kinguaassiuutitigut inniminniilliortarnerit pillugit: Killissaa nassaariuminaassinnaavoq

Siumumi inniminniilliortoqartarsimanerata malitsigisaanik nunami partiini siulittaasut, suliffimmi kinguaassiuutitigut inniminniilliortoqartillugu malittarisassatik nutarternianngikkunikkut malittarisassaliorniarput. Killissarli sumiippa? Partiini siulittaasut erseqqissumik killiliisoqartariaqartoq isumaqatigiissutigaat, aamma isumaqatigiillutik oqaatigaat qanoq killiliisoqassanersoq nalorninartoq.

Demokraatit sapaatip akunnerata siuliani ataatsimiissimapput, tassani suliap qanoq isumagineqarnissaa oqaluuserineqarsimalluni.

- Partiimi kinguaassiuutitigut inniminniilliortarnermut tunngatillugu erseqqissumik malittarisassaqassaaq, immitsinnummi qanilluinnarluta suleqatigiittarpugut. Immitsinnut nalunngippallaarluta ilaannikkut killissaq qaangerlugu quiasaarisoqarsinnaasarpoq, partiip siulittaasua Nivi Olsen oqarpoq.

Nuannisarnermiit kannguttaatsuliornissaq qanittuaraasartoq

Atassutip siulittaasua Aqqalu Jerimiassen erseqqissumik oqarpoq.

- Kikkut tamarmik suliffeqarfimmi illersugaasussaapput. Partiip allaffeqarfianiikkaluarpata kommunimiluunniiit. Kinguaassiuutitigut inniminniilliorneq kinguaassiuutitigut inniminniilliorneruvoq. Tamanna arnanut angutinullu atuuppoq. Arlaat inniminniilliorfigineqarsimasutut misigisimappat, suliassaq pimoorullugu tiguneqassaaq, Aqqalu oqarpoq.

Taamaakkaluartoq.

- Qanorli killiliinissaq aamma nalorninarsinnaavoq. Ilaatigut suleqatit nuannisaqatigalugit kinguaassiuutitigut inniminniilliorsinnaaneq qanittuaraasarpoq, Aqqalu Jerimiassen oqarpoq. Aqqalu aamma isumaqarpoq, inuit attaveqaqatigiittarfiisigut inuit pissusilersuutigisartagaat pissutsinik ajortunik aallarneeqataasinnaasut.

- Inuit attaveqaqatigiittarfii misissuataaraanni ilaannikkut takuneqarsinnaasarpoq inuit ilaannikkut malugeqqulluinnartartut. Atisaqarpiaratik assitik ikkussuuttarpaat. Tamakku aamma kinguaassiuutitigut inniminniilliornermik nassataqarsinnaasarput, Atassutip siulittaasua oqarpoq.

Partii Naleqqami imminnut qiviartariaqarsimapput, tamatumalu malitsigisaanik sulisunut najoqqutassiaq ullutsinnut naleqqussarneqarsimalluni, partii sinnerlugu Inatsisartunut ilaasortaq Pele Broberg oqaluttuarpoq. Taassuma aamma nassuerutigaa, killiliinerit ersernerlussinnaanerat.

- Suut akuersaarneqarsinnaanersut aalajangiiffigiuminaassinnaapput, suliffeqarfimmiit suliffeqarfimmut pissutsit assigiinngittarnerat pissutigalugu. Tunngaviatigut inuit pisumut attuumassuteqartut isumaat atuutsinneqartarpoq, taanna oqarpoq nangillunilu erseqqissaatigalugu, partiimi siulittaasoq suliffeqarfillu akisussaasuusartut inuit ataasiakkaat pinnatik.

Sulisunut najoqqutassiaq partiip nittartagaatigut maanna takuneqarsinnaavoq, imatullu kaammattuutitaqarluni:

- Isumaqarpugut taanna allanit atorneqarsinnaasoq. Taamaammat tamanut saqqummiupparput, partiit allat aamma atorsinnaaniassammassuk, Pele Broberg oqarpoq.

Inatsisartut malittarisassaqassasut

Muté Bourup Egedep Inuit Ataqatigiinneersup politikkerit suliffeqarfianni erseqqissunik malittarisassaqartoqarnissaa ujartorpaa.

- Sammineqartoq manna pillugu malittarisassaqartoqarnissaanik kissaateqarnerput Inatsisartut Siulittaasoqarfianut erseqqissumik nalunaarutigisimavarput, tamannalu maanna malitseqartipparput, taanna oqarpoq.

Inatsisartut ulluinnarni ingerlatsineranni kinguaassiuutitigut inniminniilliortoqartarneranut tunngatillugu maannakkorpiaq malittarisassaqartoqanngilaq.

Muté Bourup Egedep erseqqissaatigaa, partiimi suliassat tamaasa pimoorullugit tiguneqarniartartut.

- Nuanninngitsunik misigisaqarsimanermik nalunaaruteqartoqaraangat tamatigut iliuuseqartarpugut, pineqartumullu tunngatillugu politikkerput erseqqissarniarlugu suliaq aallartissimavarput, Muté Bourup Egede oqarpoq.

Suleqatigiissitsisuni inatsisartunut ilaasortaatitaq Tillie Martinussen ilisimatitsivoq, inuit nikanarsarneqarsimasutut misigisimagaangata partii qanoq pissusilersortoqarnissaanik malitarisassaqartoq, ileqqorissaarnissamut malittarisassaqartoq aamma disciplinærudvalgimut suliakkiisoqarsinnaasoq.

Siumut siulittaasuata Kim Kielsenip partiip allaffianit Sermitsiaq.AG-mut nalunaarutigisimavaa, toqqaannartumik oqaloqatigerusunnata, allakkatigulli oqaaseqaammik nassiunissani siunertaralugu.

Vittus Qujaukitsoq Torontomi PDAC pillugu ataatsimeersuartunut peqataammat oqaaseqartinneqarsinnaasimanngilaq.