Naleraq 3.-4. juni nalinginnaasumik ataatsimeersuassaaq, ataatsimeersuarnerullu kinguneeranngua, tassa ataasinngorneq 5. juni isumasioqatigiissitsissalluni "Nunarput - Land Back"-imik taallugu.

Politikkimi suliat anguniakkallu pillugit siulersuisuunerit immikkoortortanilu ilaasortat oqallissapput.

Naleraq taama ilisimatitsivoq.

Partiip siulittaasuata Pele Brobergip partiimit nalunaarut saqqummiutissavaa, partiillu aningaasaqarnera aamma saqqummiunneqassalluni. Politikkikkut siunnerfiit kingorna oqaluuserineqassapput.

Naleqqap politikkikkut anguniagai pillugit immikkoortortani ilaasortat isumaat aamma tusarniarneqassapput.

Naleqqami siulersuisuunernut sapaatiuppat 4. juni qinersisoqassaaq.

Peqqinnissaq, namminiilivinneq naalagaaffeqatigiinnermilu naligiinneq

Oqaluuserisassatut saqqummiunneqartut ilaatigut peqqinnissaqarfimmut, sulisoqarnermut, pisortanit pisartakkanut utoqqalinersianullu tunngassuteqarput.

Namminiilivinnissamut sulinerup saniatigut innuttaasut atugarissaarnissaat anguniarneqarpoq.

Ataatsimiinnermi eqimattakkaarluni suliaqarnerit matoqqasumik ingerlanneqassasut, Naleraq ilisimatitsivoq.

Naleraq Katuami isumasioqatigiissitsinermut ”Nunarput – Land Back” ataasinngorneq nal. 12.00-20.00 qaaqqusivoq. Tassani Naalagaaffeqatigiinneq, kinaassuseq namminiilivinnissarlu ilaatigut oqallissutigineqassapput.

Oqalugiarnerit filmiliarlu

Inuit Ataqatigiit sapaatip akunnerata naanerani aamma naapissapput. Inuit Ataqatigiit qitiusumik allattoqarfianit ilisimatitsissutigineqarpoq siulersuisuunerit immikkoortortanilu siulersuisut Nuummi aasaanerani naapissasut.

Ataatsimoorneq aallarnerlugu, partiip ukiunik 45-nik nalliuttorsiornera malunnartinniarlugu, partiit siulittaasorisimasai tallimat kiisalu maanna siulittaasuusoq, oqalugiassapput. Tamanna pissaaq arfininngornermi ullaap tungaani.

IA-mi ilaasortat 80-it missaat peqataassapput.

Oqalugiartoqareernerani partiip politikkimi sulinermik killiffissiuineq anguniakkallu pillugit oqallissaaq, tamannalu matoqqasumik ingerlanneqassaaq.

Innuttaasut soqutiginnittut partii pillugu isiginnaangassiamik arfininngornemi unnukkut isiginnaariarsinnaapput. Tamanna Nuummi katersortarfimmi nal. 19.30 ingerlanneqassaaq.