Partiit ammaanermi oqalugiaat pillugu: Anguniakkat pilersaarutillu ersarissut pisariaqarput

Naalakkersuisut siulittaasuat, Múte B. Egedep inatsisartut ukiakkut ataatsimiinnerata ammaanersiornerani oqalugiaataani, nunatsinni ineriartortitsinissamut alloriarnissanik ersarissunik amigaateqarpoq, Naleraq isumaqarpoq.

- Sapiissuseqarnerusariaqarpugut allannguinissamik, oqaasiinnaanngitsumik. Nunaqavissut allannguerusupput, kivitseqataarusupput. Qilanaarnikuupput allannguisoqarnissaanut. Periarfissarsiornerusariaqarpugut allannguinissamut, Jens Napaattooq oqarpoq.

Innuttaasut akissaatikinnerulerput

Ataatsimiititaliat Inatsisartullu ilaasortat saaffiginnissutaannut Naalakkersuisut akiniaasaartarneri Demokraatit nangillugu isornartorsiorpaat.

Aammali nunatta aningaasaqarnikkut patajaannerulernissaa, innuttaasullu akissaateqarnikkut pitsaanerusumik inissisimalernissaat Demokraatit oqaatigaat. Demokraatit isumaqarpoq RAL-imut Naalakkersuisut ikiorsiissutaat pisisartunut toqqaannartumik iluaqutaanissaanut qularnaveeqqusiinerunngitsoq.

- Akit qaffakkiartortunut Naalakkersuisut qanoq iliuuseqassanerlutik assut nalornissutigivaat. Maanna RAL aningaasalersoqqissallugu misilippaat, pisiniarfinni akit appasinnerusut innuttaasunut tunniunniaraluarlugit, kisiannili ilisimaneqarunanngilaq tamanna ilumut iluatsissanersoq. Soorlulusooq suna tamarmi nammineerluni iluarseriataarnissaa neriuutigineqaannartoq. Taannarpiaq pillugu oqaatiginiarpara, neriulluarneq periusissiatut atussallugu isumassarsiatsialaanngilaq ulorianartuullunilu, Jens-Frederik Nielsen oqarpoq.

Iluarisimaarneq kaammattuinerlu

Partiit naalakkersuisuutitaqartut, Siumut aamma Inuit Ataqatigiit Múte B. Egedep ammaanersiornermi oqalugiaataanut iluarisimaarinnipput.

IA-mit Siumumiillu sinerissami sanaartortoqarnerulernera iluarisimaarneqarpoq. Aammali meeqqat illuinik pingasunik pilersitsisoqarnissaa iluarisimaarneqarpoq.

Tamanna aamma Atassutip iluarisimaarlugu oqariartuutigaa.

Siumumi politikkikkut oqaaseqartarput naalakkersuisut arlalinnik kaammattuuteqarfigai.

- Perorsaasut, socialmedhjælperit, sundhedsmedhjælperillu sulinermi atugaat pitsaanerulertinniarlugit politikkikkut iliuuseqartoqartariaqalerpoq, taakkuuppummi meerartatsinnik ullup ilarujussua paaqqutarinnittartut. Sulinermi atugaat pitsaanerugaluarpata ila qassimmita ilinniagartik atorlugu sulissagaluarpat, Doris J. Jensen oqarpoq.

Peqqinnissaqarfik qitiulluinnarpoq

Naalakkersuisut siulittaasuata peqqinnissaqarfiup ilungersornera oqalugiaammini ilanngussimammagu partiit tamarmiullutik maluginiarpaat.

Partiit arlallit peqqinnissaqarfiup sulisunik atorfinitsitsiortornissamut siunnersuuteqarput, ilaallu nunanit allanit sulisunik sulisoqalernissaq piaartumik inissittariaqartoq oqariartuutigaat, malitsigisaanillu oqaatsitigut nutserisoqarnikkullu aporfiit aaqqiissuteqarfigineqarnissaat piumasarineqarluni.

Atassutip siulittaasuata, Aqqalu Jeremiassenip peqqinnissaqarfiup ukkatarineqarnera nuannaarutigaa. Peqqinnissaqarfiup ilungersunartumik inissisimalersimanera Atassutip ukiuni arlalinni kingullerni ukkatarereerpaa. Partiimi siulittaasup danskit naalagaaffianut ikioqqunissaq piffissanngoreersimasoq erseqqissarpaa.

- Peqqinnissaqarfitta artornartumik inissisimanera pillugu, Atassummiit avaqqunneqarsinnaanngitsutut isigisinnaavarput, pisariaqavissortumik sukannersumik naalakkersuisut siulittaasuat peqqinnissaqarfik pillugu aaliangiussaqassasoq inuit inuuneri pingaarnerpaatut isigalugit. Tassani qallunaat nunaata aningaasanut inatsisissaanni pinngitsoorata peqqinnissaqarfikkut ikiorneqartariaqavinnerput anguneqarsinnaasariaqarpoq, Aqqalu Jeremiassen oqarpoq.

Oqaaseqaatit tamaasa UANI nassaarisinnaavatit.