Partiit akitsuusiinissamik siunnersuummut naammaginninngilluinnartut
Plug-in hybridbiilinut akitsuutit qaffanneqarnissaannik siunnersuut Demokraatinit Naleqqamillu naammagineqanngilaq, Atassummiilli siunnersuuteqarnermi siunertarineqartoq paasineqarsinnaavoq. Naalakkersuisunit oqaatigineqarpoq, tamanna akileraartarnermut politikkimut naapertuilluartuusoq.
Naalakkersuisut plug-in hybridbiilinut akikillisaatitut aaqqissuussaq atorunnaarsikkiartuaartikkusuppaat, siunnersuullu plug-in hybridbiilinik piginninnittunut ukiumoortumik akitsuummik qaffaasussaq kiisalu plug-in hybridbiiliinik eqqussinermi 2023-miit akitsuusiisalertussaq maanna tusarniaassutigalugu.
Illuatungiliuttut partiivinit Demokraatinit Naleqqamillu siunnersuut naammagineqanngilaq, Atassummiilli siunnersuummi siunertarineqartoq paasineqarsinnaavoq. Tamanna siulittaasup Aqqalu Jerimiassenip imatut nassuiaatigaa:
- Biilit batteriitortut pillugit paasissutissat nutaat takutippaat, siullermik ilimagineqartutut avatangiisinut iluaqutaavallaartuunngitsut, taamaammat Naalakkersuisut siunertarisaat paasisinnaavarput. Erseqqissaassutigissalluguli uagutsinnut pingaaruteqarluinnarpoq, siunnersuut atuutsinneqalissappat, biilinik batteriitortunik piginnittunut kingumoortumik akitsuusiisoqannginnissaa, Aqqalu Jerimiassen allakkatigut Sermitsiaq.AG-mut akissuteqarluni allappoq.
Naalakkersuisut siunnersuutaanni, plug-in hybridbiilit motooriinut ukiumoortumik akitsuutit ukiumut 13.000 koruuninngortikkiartuaarneqarnissaat siunertarineqarpoq. Tassa ullumikkut akitsuutigineqartartut marloriaatingajaannik. Naalakkersuisut allapput, akitsuutit qaffasinnerusut biilinut akitsuutigineqartartunut naapertuuttut.
N: Akitsuusiiniarneq kukkusuuvoq
Naleqqamit plug-in hybridbiilinut akikillisaasoqarsimanerata nalilersoqqinneqarnera akuersaarneqarpoq, Jens Napaattuuli Naalakkersuisut siunnersuutaat akuerinngilaa:
- Biilit taamatut ittut akikillisaaffigalugit pisiarineqarnissaannik kaammattuisoqarsimanera ingasappallaartoq isumaqarpunga. Inuppassuit hybridbiilinik eqqussinermi akitsuutitaqanngitsunik pisiaqarnissaannik pilerisaarimaneq ukiumoortumillu qaffasissupilussuarmik akitsuusiiniarneq imminnut ataqatigiinngilluinnarput, Jens Napaattooq Naleraq sinnerlugu Aningaasaqarnermut Akileraartarnermullu Ataatsimiititaliami ilaasortaq oqarpoq. Taassuma erseqqissaassutigaa, partii akitsuutinik qaffaanissamut nalinginnaasumik akuersaartuunngitsoq.
Nutaanik qaffasinnerusunillu akitsuusiiniarneq Demokraatinit aamma nuannarineqanngilaq. Partiimit oqaatigineqarpoq, qanga misissuisimanerit tunngavigalugit Naalakkersuisut siunnersuuteqarsimasut, aamma plug-in hybridbiilit nunami maani atugaanerat isumaqarluartoq.
Naalakkersuisut siunnersuumminni missingersimavaat, plug-in hybridbiilit biilinut dieselitortut sanilliullugit ukiut 40-t sinnerlugit Nunatsinni ingerlasimasariaqartut avatangiisinut ajoqusiisinnaanerisa annikillisinneqarnissaannut.
D: Teknologii ineriartorpoq
Demokraatit siulittaasuat Jens-Frederik Nielsen isumaqarpoq, ineriartortoqarnera Naalakkersuisut inerniliussimasaannut naapertuutinngitsoq:
- Biilinik avatangiisinut mingutsitsinnginnerusunik pisiaqarnissamut kajumissuseqartoqartuarnissaa suli kissaatigaarput. Teknologi ineriartortuarpoq, aamma batteriinut tamanna batteriinillu sanaartortarnermut tamanna atuuppoq, Demokraatit siulittaasuat Jens-Frederik Nielsen oqarpoq.
Naalakkersuisunit naatsorsuutigineqarpoq, plug-in hybridbiilinik biilinillu innaallagiatortunik eqqussinermi akitsuusiisarnikkut Nunatta Karsia 2024-miit 35 millioner koruuninik isertitaqarnerusalissasoq.
Tamatumunnga pissutaavoq, 2017-imili hybridbiilinik biilinillu innaallagiatortunik ukiumut 200-t missaanniittunik eqqussinermi akitsuusiisoqartarsimannginnera. Biilit nutaat suli pisariaqartinneqartartussaapput, biili taakku akitsuuserneqartussaallutikt.
Nathanielsen: Akileraartarnermut politikkinut naapertuilluartuuvoq
Naalakkersuisut 35 millioner koruunit akitsuutitigut isertinneqartussat sulinermi ilanngaatip qaffanneqarnissaanut atorniarpaat. Taamatullu iliorniarneq pillugu naalakkersuisoq Naaja H. Nathanielsen imatut oqarpoq:
- Akileraarutitigut tunngavilersuutitaqanngitsumik inuit ilaannut iluaqusiisimaneq, pingaartumik atugarissaarnerusunut iluaqutaasimasut atorunnaarsinneqarnissaat matumni pineqartut, isertitakinnerusut akileraarutitigut oqalisaaffigineqarnissaannut atorneqarniarput. Tamanna uanga isumanga malillugu kileraartarnermut politikkimut naapertuilluartuuvoq, naalakkersuisoq Naaja H. Nathanielsen pingasunngornermi allakkatigut oqaaseqarpoq.
Naleqqamit oqaatigineqarpoq, akileraartarnikkut aaqqissuusseqqinnissaq pillugu isumaqatiginninniarnerit aallartilaaginnarneqartut, sulinermi ilanngaammik qaffaaniarneq pillugu naalakkersuisut nalunaaruteqarnerat siusippallaartoq, akileraartarnermummi tunngatillugu sorpassuit suli tikinneqanngimmata.
Demokraatit siulittaasuata biiliutilinnut nutaanik akitsuusiinikkut aningaasanik amerlanerusunik aallerniarneq isumaqatiginngilluinnarpaa. Jens-Frederik Nielsenip oqaatigaa, sulinermut ilanngaammik qaffaanissamut partii aningaasanik nassaarniarnermut peqataarusuttoq - biiliutillilli aningaasaataannik aallertoqarnissaatiguunngitsoq.