kommunimut qinersineq
Partiip peqatigiiffiata siulittaasortik inissaanut inissikkaat
Demokraatini Sermersooq Kitaani siulittaasup Randi Vestergaard Evaldsen isumaqatiginngilaat. Taanna borgmesteritut piukkussaminik toqqaariaannaavoq. Sermersooq Kitaanili Demokraatit Asii Chemnitz Narupi borgmesteriussasoq naqissuserpaat
Demokraatini Sermersooq Kitaani immikkoortortaqarfiata kommunimut qinersinissamut sassartortartik siulittaasortillu Randi Vestergaard Evaldsen inissippaat.
Maanna suleqatigiinneq iluaraat
Randi Vestergaard Evaldsenip Asii Chemnitz Narup (IA) Martha Lund Olseniluunniit (S) suleqatigisinnaallugit ammaffiginerarnikuuai.
Atuaruk: Randi aalajangiisuusinnaavoq
Taamaattoqassanngitsorlu Demokraatini Sermersooq Kitaani siulittaasup naqissuserpaa.
Atuaruk:
- Maanna suleqatigiinneq ingerlatiinnassallugu sulissutigaarput, Demokraatini Sermersooq Kitaani siulittaasuat Tillie Martinussen Sermitsiaq.AG-mut oqarpoq.
Qinersinermi kingullermi Demokraatit Kommuneqarfik Sermersuumi kikkit amerlanerussuteqalernissaannik aalajangiisuupput. Taamatullu pisoqaqqissagaluarpat Randi Vestergaard Evaldsenip suliniutigerusutani amerlanerpaat sorsuutiginissai piareersimaffiagai.
Qinigassanngortittuni taakkunani arlaat toqqassaneraa AG-mit aperineqarami ima akivoq:
- Partii sorleq neqerooruteqarneruniarnersoq taamaallaat apeqqutaassaaq. Politikkitta piviusunngortinneqarnissaa kisiat apeqqutaavoq, inuit aamma isiginianngilavut.
Sermersuumi immikkoortortaqarfik aalajangiissaaq
Partiilli Sermersuup kitaani immikkoortortaqarfiani taama isummerneq tusarniaaffigineqarsimanngilaq. Taakkuami aalajangiisuusariaqartut Tillie Martinussenip naqissuserpaa.
- Siulersuisut qineqqusaarnermut suleriusissaq ilusilersortussaavaat. Qinersisoqareerpallu kikkut suleqatigineqassanersut aamma aalajangertussaallugu, oqarpoq.
Partiit liberaaliusup suleqatigiinnissamut isumaqatigiissummi suliniutigerusutatik amerlanerpaat ilanngunneqarnissaat piumasaraat. Kommuneqarfik Sermersuumilu suleqatigiumaneqarnerusut tassaapput Inuit Ataqatigiit.
- Suleqatigiinnerput iluarisorujussuuarput, ajunngitsorpassuarnimmi angusaqaratta. Tamannalu ingerlateqqikkusupparput, Tillie Martinussen oqarpoq.
"Randip qanoq isumaqarnersugut nalunngilaa"
Aningaasaqarneq pitsanngoriaateqarsimasoq, illoqarfimmi pilersaarutit pitsaanerusut meeqqallu atuarfiata pitsanngoriaateqarsimanera ilaatigut tikkuartorpai.
Tillie Martinussenip Randi Vertergaard Evaldsenip isumaqatiginnginnera qassiiliuutigerusunngilaa. Partiilli siulittaasuata Sermersuumi immikkoortortaqarfiup qanoq isummeqqaneranik ilisimatinneqarsimasoq erseqqissarlugu.
- Randip oqiartuutai eqqartornikuuagut. Nalunngilaa qanoq isumaqarnersugut, Tillie Martinussen naggasiivoq.