Partiinut tapiissutit Siumut annertuumik sinneqartoortippaa
Kielsen eqqissilluni aasaanerani sulinngiffeqarsinnaavoq. Naalakkersuisoqatigiit aamma partiip iluani suliassat ingerlanneqarput. Partiimi naatsorsuutit ukiorpassuarni aatsaat taama pitsaatigipput.
2018 ukiuuvoq Siumumut pitsaalluinnartoq. Tassa aningaasaqarneq eqqarsaatigalugu.
Aningaasanik isaatitsisoqarluarpoq – partiillu amigartooruterpassui maanna matussuserneqarlutik.
Aviisi AG taama allaaserisaqarpoq.
Tamanna Siumup 2018-imut ukiumoortumik nalunaarusiaani, Deloittemit kukkunersiorneqarsimasumi takuneqarsinnaavoq.
Taamaattorli partiip nammineq ilaasortaasa aningaasaqarneq ingerlallualersinngilaat. Naatsorsuutini kisitsisit naapertorlugit ilaasortaanermut akiliutinit taamaallaat 5.500 koruunit aamma Partiip Ikinngutaannit 1.600 koruunit isertinneqarput, kingullertut taaneqartut ukiup siuliani 3.000 koruuniusimagaluartut.
Tamatuma akerlianik pisortanit partiimut tapiissutit amerlalaartunik amerleriarsimapput.
2017-imi partiimut tapiissutit ataatsimoortumik 3,9 millionit koruuniupput – 2018-imilu 5,4 millionit koruuningajaallutik. Taakku nikingassutaat naatsorsuutini sinneqartoorutit amerlaqatigingajappaat.
Taamaalillunimi 2018-imi ingerlatsinermi angusat 1,4 millionit koruuninik sinneqartoorfiupput, 2017-imili 1 millionit koruuningajannik amigartooruteqarlutik.
Taamaalilluni sinneqartoorutit kingunerinik nammineq aningaasaatit patajaallisarneqarput, ukiunimi kingullerni amigartoorujussuartoqartareersoq, kingullermik 1,4 millionit koruuninik (2017-imi angusat) 2018-imi 37.000 koruuninik sinneqartooruteqarmat.
AG-mi allaaserisamut tamakkiisumik una linki aqqutigalugu isissutissarsigit: