Partiinut nalunaarut: Tusarnaaritsi, oqaaseqarnasi

Aalisarneq pillugu Ataatsimiititaliarsuarmi aalisarnermut inatsisiliorniarnermi partiit oqarsinnaatitaanerat killeqarpoq. Kim Kielsenip oqaaserisimasaanit allaanerusumik iliuuseqartoqarpoq

Aalisarnermut inatsisissap suliarineqarnera IA-mit Partii Naleqqamiillu isornartorsiorneqareerpoq.

Aalisarneq pillugu Ataatsimiititaliarmi sulinermi partiit tamarmik suleqatigineqassasut Naalakkersuisunut siulittaasup Kim Kielsenip Inatsisartut ataatsimiinneranni kingullermi oqarpoq.

Nersualaarineq

Taamatut oqariartortoqarnera illuatungiliuttunit nersualaarneqarpoq. Ammanerusumik sullissisoqalernissaa neriuutigineqarsimasoq piviusunngortinneqalernera ilaatigut nersualaarneqarluni.

Taamatut pisoqareersoq aalisarnermut naalakkersuisoq Jens Immanuelsen partiinut tamanut allappoq, partiit Aalisarneq pillugu Ataatsimiititaliarsuarmi sinniisussaanik toqqaaqqullugit. Allakkami ilisimatitsissutigineqarportaaq Ataatsimiititaliarsuarmi decembarip 13-ani 14-anilu ataatsimiittoqassasoq.

Aalisarneq pillugu Ataatsimiititaliarsuarmi siulittaasoq Jens Paulsen decembarip qulingani nalunaaruteqarpoq Aalisarneq pillugu Ataatsimiititaliarsuarmi oqallisissat nassiunneqassasut allakkamik allappoq. Oqallisissiat Inatsisartunut ilaasortanut saqqummiunneqaqqaassasut, tusagassiorfinnut nassiunneqassasut tassanngaanniillu innuttaasunut paasissutissiissutigineqassasut ilisimatitsissutigineqarluni. Partiit ataatsimiititaliarsuarmi sinniisaat juullilernerani ataatsimiinnissaraluat taamaatinneqartoq aamma ilisimatitsissutaavoq.

Sinaakkutit aalajangersimanngitsut

Taamatut aalajangerneq Jens Paulsenimit ima nassuiarneqarpoq:

- Aalisarneq pillugu Ataatsimiititaliarsuarmi sulinermi partiit qanoq peqataatinneqartigissanersut suli sinaakkuserneqanngimmata ataatsimiinnissaraluaq februaarimut nuutsinneqarnissaa aalajangerneqarpoq, Jens Paulsen nassuiaavoq.

Politikkikkut suliaqartut Ataatsimiititaliarsuarmi qanoq suleqataatigisinnaanersut taamaasilluni suli aalajangiutivinneqarsimannginnera naqissuserneqarpoq.

IA: Pakatsinarpoq

Taamatut nalunaartoqarnera IA-mi siulittaasumit Múte B. Egedemit aamma Partii Naleqqamit Pele Brobergimit isornartorsiorneqarpoq.

- Politikkikkut suliaqartut qanoq Ataatsimiititaliami suleqataatigisinnaanerat aalajangiunneqannginnera isornarpoq. Ataatsimiititaliarsuarmi suliarineqartussaq tassaavoq Nunatsinni inuussutissarsiutini pingaarnersaasoq. Aamma oqarfigineqarpugut ataatsimiititaliarsuarmi suleriusissanik siunnersuuteqarsinnaanngitsugut, Múte Bourup Egede oqarpoq.

Pele Broberg isornartorsiummut isumaqataavoq.

- Naalakkersuisut killormut suleriuseqalerput. Kim Kielsenimut tatiginninnginnermik taatitsinermi oqarpoq ataatsimiititaliarsuarmi sulinermi suleqataatinneqassasugut.

Powered by Labrador CMS