Partiini siulittaasut Inatsisartuni uummaarissumik oqallittut

Partiini siulittaasut ullumi pingasunngornermi Inatsisartut ataatsimiittarfianni apeqqarissaarput.

Inatsisartuni partiit siulittaasui ullumi ukiakkut ataatsimiinnermi apeqqarissaarnerat nalunaaqutaq 09.30-miit 11.00-imut ingerlanneqarpoq.

Partiini siulittaasut paarlakaajaallutik oqaluttarfimmiit oqaaseqartarput, tassani partiit tamarmik politikkimik maannalu pisunik oqallissuteqarput. Pingaarnertut sammisat tassaallutik aalisarneq, timmisartoqarfinnik alliliineq inuussutissarsiuteqarnerlu.

Siammasissumik tunngaveqarluni isumaqatigiissuteqartarnissaq

Inatsisartuni partiit annersaanni siulittaasup aamma Naalakkersuisunut siulittaasup Múte Bourup Egedep (IA) oqaaseqarnermini oqaatigaa, siunissami aalajangiiffigisassat siammasissumik tunngaveqarluni isumaqatigiissutigineqartarnissaat pingaaruteqartoq.

- Naalakkersuisooqatigiit siuliinut sanilliullugu allannguutiit annersarivaat, Namminersorlutik Oqartussat ingerlatseqatigiiffiutaanni siulersuisunut ilaasortanik allannguisimanerput, tassani inuusuttut amerlanerit nunatsinneersut silersuisuni assigiinngitsuni ilaasortanngortinneqarput.

- Sulili annertuunik suliassaqarpugut, taamaammat siammasissumik tunngaveqarluta isumaqatigiissuteqartarnissarput pingaaruteqarpoq, taamaalillutami innuttaasut akornanni eqqissisimatitsilissagatta, Naalakkersuisut Siulittaasuat ilaatigut Demokraatit siulittaasuata Jens-Frederik Nielsenip naalakkersuisoqatigiinnut kingullernut sanilliullugit maannakkorpiaq suna allannguutaanerpaasimanersoq pillugu apeqqutaanut akissuteqarluni oqarpoq.

Suleqatigiinneq

Múte Bourup Egedep aamma Erik Jensen (S) oqaluttarfimmiimmat Siumup Naalakkersuisullu sunik suleqatigiissuteqarsinnaanerat apeqqutigaa.

- Suleqatigiissutigisinnaasavut amerlapput. Ineqarnermut tunngassuteqartut, utoqqarnut politikki, isumaginninnermut tunngassuteqartut, inuussutissarsiuteqarneq kiisalu aalisarnermut tunngassuteqartut suleqatigiissutigisinnaavavut. Arlalippassuit aamma peqatigiilluta angusaqarfigisinnaavavut, tamannalumi innuttaasut pisariaqartippaat, Siumumi siulittaasoq erseqqissaavoq.

Akuerseqataasariaqarsimaneq

Naleqqameersoq Pele Broberg qaammammi kingullermi nunanut allanut naalakkersuisutut tunuartinneqarpoq. Tassungalu atatillugu Naleqqami siulittaasoq Hans Enoksen qanoq isumaqarnersoq aperineqarpoq.

- Partiit naalakkersuisooqatigiittut oqallittarnerat isertuussaanngilaq, tamanna ukiuni allani aamma takusarsimavarput. Tamanna nutaarsiassaanngilaq. Inatsisartunut qinigaanitsinnit ukiup affaa qaangiutiinnartoq annertuunik suliaqarlutalu angusaqareersimavugut. Akuerseqataasariaqarsimavugulli (Pele Brobergi nunanut allanut naalakkersuisutut tunuartinneqarnissaa pillugu), maannali meeqqanut ilaqutariinnullu susassaqarfik tigusimavarput. Politikkimi tunniussisoqartarlunilu tigusisoqartarpoq, Naleqqami siulittaasoq Naalakkersuisut Namminersorlutik Oqartussat inissiaataanni ineqarnermut akiliutinik qaffaasoqarnissaanik aalajangersimanerannut partiip akerliuneranik oqaluttuartoq oqarpoq.

Partiini siulittaasut apeqqarissaarnerannut peqataapput Múte Bourup Egede (IA), Erik Jensen (S), Hans Enoksen (N), Jens-Frederik Nielsen (D) kiisalu Atassummi siulittaasoq Aqqalu Jerimiassen.

Powered by Labrador CMS