Partii: Mittarfimmut taarsiullugu aqquserniortoqarli
Qaqortumi mittarfiliornissamik neqeroortitsineq ajutoorneqarpoq, maannalu allatut pilersaarusiornissamut periarfissaqalerpoq, taamatut isumaqarput Suleqatigiissitsisut.
Qaqortumi nutaamik mittarfiliornissamut sanilliullugu Kujataani ujaraaqqanik qallikkamik aqquserniortoqarli.
Suleqatigiissitsisut isumaqarput, Qaqortumi mittarfiliornissamut neqeroortitsinerup taamaatiinnarneqarneranut atatillugu aqquserniornissaq periarfissaasoq.
Suleqatigiissitsisut Kujallermi siulittaasuata Kim Lyberthip politikkerinut kaammattuutigaa, suliariumannittussarsiornerup taamaatiinnarneqarnerani nutaamik pilersaarusiortoqarnissaa.
Tassunga atatillugu siunnersuutigaa, Qaqortumi mittarfiliornissamut aningaasat immikkoortinneqareersimasut ukununnga atorneqassasut:
Aqquserngit, pingaartumik aqquserngit ujaraaqqanik sanaat Sverigemi periuseq atorneqartoq malillugu sanaat
Takornariartitsinermi suliniutit
Narsarsuup nutarterneqarnera
Imminut nappassinnaasumik takornariartitsisarnerup aamma imminut nappassinaasumik asimi takornariartitsisarnerup ineriartortinnissaannut aningaasaliisussarsiorneq
Politikkerip oqaatigaa, naatsorsuinerit takutissimagaat Qaqortumi mittarfik inuiaqatigiinnut amigartoorutaasassasoq, aamma suliniutip naammaassineqarnissaa eqqarsaatigalugu aningaasanut inatsit aqqutigalugu aningaasanik amerlanerusunik immikkoortitsinissaq ajornakusuussasoq.
Iluaqutissartaqarnerusoq
Suleqatigiissitsisut isumaqarput, aqqusineqarneq mittarfimmit ataatsimit iluaqutaanerussasoq:
- Iluaqutit tassaapput aqquserngit Kalaallit Nunaata Kujataani pinngortitami takornariartitsinermi suliniuteqarnissamut taassaanngingajattunik periarfissaqartitsinerat, assersuutigalugu illuaqqat, aalisarneq, pisunneq savaatilinnullu tikeraarneq. Imminnut nappassinnaassuseq tunngavigalugu, skriver Kim Lyberth tusagassiorfinnut nalunaaruteqarnermi allappoq.
Assartuinermut Isumalioqtigiissitaq 2011-mi tamatumunnga akerliusumik inassuteqaateqarpoq. Tassa Qaqortumi mittarfiliortoqartariaqartoq, illoqarfiit akornanni aqquserniornerup akisunerusussaanera pissutigalugu.
Aqquserngit asfaltilernagit ujaaraaqqanik qallikkat
Tassunga atatillugu Kim Lyberthip oqaatigaa, Assartuinermut Isumalioqatigiissitap taamanikkut inassutigisimasaanit akikinnerusumik aqquserniortoqarnissaanik Suleqatigiissitsisut kissaateqartut.
Politikerip aqquserniornermik suliaqartartut oqaloqatigisimavai, taakku ilisimatitsisimapput aqqusinernut asfaltitalinnut sanilliullugu ujaraaqqanik qallikkanik aqquserniorneq akikinnerungaatsiassasoq, Kim Lyberthilu naapertorlugu aaqqiissutaasinnaasoq tamanna sammineqarnerusariaqarpoq.
Kommuni Kujallermi borgmesterip Kiista P. Isaksenip erseqqissumik oqaatiginikuuaa, Qaqortumi 1.499 miiterimik takissusilimmik mittarfiliortoqarnissaanik pilersaarutit Naalakkersuisunit attatiinnarneqarnissaat kommunimit kissaatigineqartoq.
Naalakkersuisut siusinnerusukkut ilisimatitsissutiginikuuaat, neqeroortitsineq taamaatiinnarneqareersoq suliniutip qanoq ingerlateriaqqinneqarnissaa pillugu Kalaallit Airportsip suliniuteqarnissaa utaqqimaarneqartoq.