Partiimik pilersitsisoq siulittaasutut tunuartoq

Hans Enoksen partiimi siulittaasutut ullumi tunuarniuteqareersorlu Naleraq nutaamik siulittaasussarsiortussanngorpoq. Hans Enoksenip partii 2014-imi pilersippaa, inuttulli atukkani pissutigalugit maanna tunuarniuteqartoq, tusagassiorfinnut nalunaarummi allassimavoq.

- Naleqqami siulersuisuunerit siulittaasoq Hans Enoksenip siulittaasutut tunuarniuteqarnera ataatsimiissutigalugu suliaraat, siulersuisut sinnerlugit partiimi siulittaasuugallartutut Ruttsi Lynge Lennert tusagassiorfinnut nalunaaruteqarluni allappoq.

- Hans Enoksenip siulittaasuusimaneranut siulersuisuunerit qujassuteqarumapput. Hans Enoksen ilaqutaalu ajunnginnerpaanik tamanik kissaallugit, Hans Enoksenip nalunaaruteqarnera tiguarput.

Immikkut ittumik ataatsimeersuartoqassasoq

Hans Enoksen Naleqqami siulittaasuunermini naalakkersuisunut ilaasortaasimavoq Inatsisartunilu marloriarluni siulittaasuusimalluni. Partii ilisimatitsivoq siulittaasunngortitsinissaq pillugu immikkut ittumik ataatsimeersuarnissamut aggersaassallutik.

Partiimi suleqataasut Hans Enoksen nersualaarpaat.

- Hans qasuttuilluni ukiorpassuarni politikkimik suliaqarsimavoq, maannali inuttut atukkani pissutigalugit siulittaasutut tunuarniuteqarluni, ingerlaannartumik atuutilersumik. Naleqqamiit neriuutigaarput tusagassiorfiit innuttaasullu paasinnissasut, aqqusaakkammi imaannaanngitsut pissutigalugit attavigineqannginnissaq pisariaqarmat.

Hans Enoksen Inatsisartuni politikkimilluunniit suliaqarnermik ingerlatitseqqissanersoq, nalunaarummi allassimanngilaq.

Hans Enoksen 1987-imi politikkimik suliaqalerpoq, Itillimi nunaqarfimmi aqutsisuni ilaasortanngorami.

• 2018 - Inatsisartuni siulittaasoq
• 2017 - 2018 Naalakkersuisunit ilaasortaq - Inuussutissarsiornermut
• 2016 - 2017 Naalakkersuisuni ilaasortaq - Aalisarnermut
• 2014 - 2016 Inatsisartunit ilaasortaq
• 2009 - 2014 Inatsisartuni ilaasortaq
• 2002 - 2009 Naalakkersuisut Siulittaasuat
• 2001 - 2002 Naalakkersuisuni ilaasortaq - Aalisarnermut
• 1998 Sisimiuni Borgmester, Simon Olsen ukiup affaani sulinngiffeqarnerani
• 1997 - 2001 Sisimiuni borgmesterip tullia
• 1995 - 1999 Inatsisartuni ilaasortaq
• 1989 - 2001 Sisimiuni kommunalbestyrelsemi ilaasortaq
• 1987 - 2001 Itillimi nunaqarfimmi aqutsisuni ilaasortaq