Partiimi siulittaasoq misileeqqippoq: Tunngaviusumik inatsisissaq pillugu Isumalioqatigiissitat atuinerat pillugu akissuteqaqqusisoq

Tunngaviusumik inatsisissaq pillugu Isumalioqatigiissitat ukiut ingerlanerini 30 millionit koruunit missaanniittut qanoq atorsimavaat.

Jens-Frederik Nielsenip (D) tamanna paasilluarusuppaa, kisianni Naalakkersuisut siulittaasuat qaammatit pingasut sinnerlugit eqqarsareerluni, paasissutissat nassaariniarneranni suliaq annertuallaartoq akissuteqarpoq.

Jens-Frederik Nielsen apeqqutinik allanik nassiussilluni qisuariarpoq, nalunaarut naammaginnginnamiuk:

- Qaammatit pingasut sinnerlugit akissuteqarniarsarisimagaanni tunngavilersorluakkanik akisinnaasariaqarpoq. Naqissuserlarali, pakatsisimavunga. Naalakkersuisut Siulittaasuat piffissaq taama sivisutigisoq atorlugu apeqquteqaatikka akissallugit suliaavallaarnissaanut akissuteqaatiliorniarsarisimavoq, Jens-Frederik Nielsen apeqqutinut arlalinnut tunngavilersuilluni taama allappoq.

- Isumalioqatigiissitat pitsaanngitsumik inissikkaat

Partiimi siulittaasup nassuiaatit paasinarnerulersippai, kisianni Tunngaviusumik inatsisissaq pillugu Isumalioqatigiissitat aningaasanik qanoq amerlatigisunik nerisaqarnermut atuisimanersut ilaasortanullu ajunngitsorsianut atorsimaneraat apeqqutit suli tunngassuteqarput.

- Isumaqarpungami inuiaqatigiit akileraarutaat Naalakkersuisunit qanoq pingaarnersiorneqarnersut inuiaqatigiinniit paasineqassallutik pisinnaatitaaffiusoq. Demokrati aqqani Naalakkersuisut ammasumik ingerlatsinissaat pinngitsoorneqarsinnaanngilaq, Jens-Frederik Nielsen allappoq.

Paasissutissat amigaatigineqartut isumalioqatigiissitat aningaasaqarnerani tukattoqartoq takussutissaasinnaasut, Jens-Frederik Nielsen Sermitsiaq.AG-mut itisiliivoq, tamannalu isumalioqatigiissitanut suliaannullu pitsaanngitsumik inissisimalersitsivoq:

- Isumalioqatigiissitat siunertaat politikkikkut oqallisigineqarsinnaavoq. Kisianni isumalioqatigiissitat nunatta tunngaviusumik inatsisissaanut siunnersuuteqartussat pineqarput.

Sukkasuumik akineqarnissanik neriuutigigaa

- Aningaasaqarneq pillugu apeqqutit akisinnaanngikkaanni, tukattoqarneranut takussutissaavoq, ingerlatsinerlunnermillu isikkoqalersitsilluni, Jens-Frederik Nielsen oqarpoq.

Apeqqutit maanna akineqassasut, partiimi siulittaasoq neriuuteqarpoq:

- Apeqqutit ulluni 110-iusuniit sukkanerusumik akineqarnissaat kissaatigaara – ileqquusumillu ullut qulit suliffiusut iluanni kingusinnerpaamik, partiimi siulittaasoq allappoq.

Naalakkersuisut siulittaasuata Naalakkersuisoqarfiata apeqqutit akisussaavai. Naalakkersuisoqarfiup suliaq oqaaseqarfiginngikkallarniarpaat, taamaallaat Jens-Frederik Nielsenimit apeqqutit akineqarsinnaassanersut nalilersoqqinneqassasut oqaatigaat.

Tunngaviusumik inatsisissaq pillugu Isumalioqatigiissitat aningaasanik atuinermut malittarisassat malinneqarsimanersut paasiniarlugu aningaasaqarnerannik misissuisoqarsimasoq, Sermitsiaq.AG-p januaarip qiteqqunnerani oqaluttuaraa. Aammattaaq Tunngaviusumik inatsisissaq pillugu Isumalioqatigiissitani suliaqartut imaluunniit allattoqarfik eqqunngitsumik iliorsimanersut misissorneqarnikuuvoq. Misissuinerit tamanut saqqummiunneqarnikuunngillat.