Partiimi allattaasimasoq pinngitsuutinneqarpoq
Atassummi allattaasimasoq peqquserlussimasutut piginnaatitaanerminillu atornerluisimasutut Sermersuup eqqartuussiviani sassartinneqarami pinngitsuutinneqarpoq. Illersuisup inerniliunneqartoq naatsorsuutigereersimavaa.
Atassummi allattaasimasoq, piffissami aalajangersimasumi ukioq ataaseq sinnilaarlugu imminut akilertarsimasutut katillugit 138.000 koruuninik nutserinermut tapinik partiimiit akuerineqarani pisarsimasutut, Sermersuup eqartuussiviani eqqartuunneqarami pinngitsuutinneqarpoq.
Suliami illersuisoq, inatsisileritooq Lars-Christian Sinkbæk Sermitsiaq.AG-mut taama ilisimatitsivoq.
Pineqartoq Sermersuup eqqartuussiviani, aningaasanik peqquserlussimasutut aamma piginnaatinneqarnerminik atorlugu peqquserlussimasutut sisamanngornermi 6. maj unnerluunneqarluni sassartinneqarpoq.
Partiimi allattaasimasoq partiip siulersuisuuneri akuersiseqqaarsimanagit "peqquneqarani katillugit kr. 138.000,-it imminut tunniuttaramigit” unnerluunneqarsimavoq, Suliamili uppernarsaatit eqqartuussivimmi suliarineqarmata pinngitsuutinneqarpoq.
- Pinngitsuutinneqarnissaa naatsorsuutigereersimavara. Isumaqarpunga uppernarsaatit saqqummiunneqartut aallaavigalugit eqqartuussivik eqqortumik aalajangertoq, inatsisileritooq Lars-Christian Sinkbæk Sermitsiaq.AG-mut oqarpoq.
Unnerluussisussaatitaasoq ilisimatitsivoq suliami aalajangiussaq pillugu suliassanngortitseqqiinissamut ulluni 14-ini eqqarsaatiginnikkumasimalluni, maannalu eqqartuussivimmi suliami allagaatit aalajangernerlu atuaqqaarneqassasut.