Partiimi allatsi: Siumup sanningasulimmut kikiattorpaanga
Siumut partiiani allatsi Mikael Petersen marlunngormat Siumut siulittaasuannit Kim Kielsenimit nalunaarfigineqarpoq, suliaanut atatillugu naammagittaalliortoqartarsimanera pissutigalugu partiimi suliunnaarsinneqarallarluni.
Mikael Petersen, Siumumi allatsitut pissaaneqarfiusumi aammali ajornakusoortartumi 2014-imili atuussimasoq, marlunngormat oqarasuaatikkut nalunaarfigineqarami nalunaarutip imarisaanut tupaqqavoq.
- Kim sianerpoq nalunaarutigalugulu siulersuisut aalajangersimasut, arlalitsigut naammagittaalliortoqartarsimanera pissutigalugu suliunnaarallartinneqassasunga, Mikael Petersen angerlarsimaffiata igaffiani kaffisorujooqatigalugu oqaluttuarpoq.
Ilisimasaqanngitsoq
- Suut naammagittaalliuutigineqarsimanersut ilisimasaqarfiginngilakka. Politikkikkut pissaaneqarniunnermi pilliutigineqarsimanerpunga, Mikael Petersen aperivoq, nangillunilu:
- Naluara.
Naatsorsuutigaa partii naammagittaalliuutinik misissuinissamut eqqartuussissuserisumik suliaqartitsisssasoq.
Sermitsiaq.AG-mit oqarfigineqarpoq, ataatsimiinnermi aalakoorluni kinguaassiuutitigut inniminniilliorsimaneranik oqallittoqarsimasoq.
- Taamatut pineqarsimangaanera paasisinnaanngilluinnarpara. Kinguaassiuutitigut inniminniilliorsimanerangaanera eqqortuusinnaanngilaq. Immaqa taamatut oqaluttoqalersimassaaq, inuit nalunngisakka naapikkaangakkit ilassillugit eqitaarinnittarama. Aamma ukioqqortusingama imminut aalakoortillunga imerneq ajorpunga, Mikael Petersen 63-inik ukiulik 1982/83-imili Siumumi ilaasortaavoq.
Partiimi assigiinngitsutigut suliaqartarsimasoq
Partiip politikkerisaanik assigiinngitsutigut suliaqartarsimavoq. Uummannami kommunalbestyrelsimut ilaasortaasimavoq, Inatsisartuni ilaasortaasimavoq, Naalakkersuisuusimavoq, partiip siulersuisuini siulittaasumut tullersortaasimavoq marloriarlunilu partiimi allattaasimalluni – siullermik 2006-imiit 2010-mut, kingullermillu 2014-imiit Aleqa Hammondip kanngunartuliaanik iluarsaassisoqartussanngormat
- Ataatsimut isiginnillunga sulisarsimavunga partiimilu ilaasortat ataatsimoortinniartarlugit, tassa politikkikkut anguniakkat malinniarlugit. Partiimi assigiinngitsunik isumaqartorpassuaqarpoq namminneq isummaminnik malinnittartunik, isumaqarpungali partiimi ilaasortat iluatsittumik ataatsimoortittarivut, Mikael Petersen oqaluttuarpoq.
Nassuerutigaa, naammagittaalliuutit suliunnaarsinneqarneranut tunngaviusut suunersut paasineqarnissaannut issiaannarluni utaqqineq annernarsinnaasoq.
Eqqarsaasersortupilussuaq
- Nalornineq sussaanngilaq. Suna tunngaviusinnaanersoq eqqarsaasersuutigeqaara. Erseqqissumik akissutissaqartinngilara, Mikael Petersen narrutsassimarpasilluni oqarpoq.
- Partiimit sanningasulimmut kikiattungaasimasutut misinnarpoq, tamannalu partiimik qamanermioqarluni annernarpoq, aamma ilaquttanut sunniuteqarpoq, Mikael Petersen erseqqissaavoq.
- Taamaattoq ukiorpassuarni partii sinnerlugu suliaqarluartareerlunga, taamatut pineqarnera pissutigalugu ulluni qaninnermi atorfinniit soraarniarpunga, Mikael Petersen erseqqissaavoq, taamalu politikkikkut suliaqarnermut tunngatillugu qanoq iliorfigineqarsinnaanini killeqartoq naqissuserlugu.