Partii Naleraq: Siumut pissutsinut malinnaasimanngilaq

Kumoorn Siumut. Grønlandsbankenip uumasoqassutsikkut aningaasaqarnikkullu nammanneqarsinnaanngitsumik umiatsiaararsorluni aalisartoqarnerarlugu aningaasaliisarunnaarnissamik aalajangernera pillugu Karl-Kristian Krusep kamanneranut Partii Naleraq taama oqaaseqarpoq

Jens Napaattuup Partii Naleqqameesup Siumut oqaaseqartartuata Karl-Kristian Krusep aningaaseriviup aalajangernera ”politikkimut akulerunnerarlugu” aamma ”naligiinnissamik inuiaqatigiittut anguniagaqarnermut unioqqutitsinerarlugu” oqaaseqarneranut sanilliullugu Grønlandsbankenip umiatsiaararsorlutik aalisartunut atukkiisarnerminik unitsitsinera paasisinnaavaa. Steen Lyngep Demokraatineersup aamma Siumumi politikkeri isornartorsiorpaa.

- Aningaaserivik ukiorpassuarni taamatut ingerlatsisimavoq, Jens Napaattooq, ”aningaaseriviup aningaasarsiornissamik tunngaveqarluni soorunami ingerlanneqartussaaneranik” paasinnittoq oqarpoq.

Unneqqarissumik nalunaaruteqartoq

- Grønlandsbankenip unneqqarissumik nalunaaruteqarnera nuannaarutigaara. Karl-Kristian Kruselli qisuariarnera atuarlugu pakatsinarpoq, Jens Napaattooq oqarpoq.

- Kumorn, Siumut. Pissutsinut malinnaasimanngivippusi, Jens Napaattooq erseqqissaavoq.

Partii Naleqqami politikkeri isumaqarpoq, umiatsiaararsorlutik aalisartut aalisakkerivissuarnik – Polar Seafoodimik aamma Royal Greenlandimik – umiatsiaararsorlutik aalisartut taakkununnga tunisaqartarnissaat anguniarlugu taarsigassarsisitsisartunik pinngitsuuisinnaajunnaarsimanerat Siumumit akisussaaffigineqartoq, aalisartut taamaalillutik aalisakkerivissuarnit sallunaveeqqutitut tigusaaqqanerarlugit.

Sallunaveeqqutitut tigusaqarneq

- Ingerlatseqatigiiffiit pineqartut umiatsiaararsorlutik aalisartut taarsigassarsissittarlugit sallunaveeqqutitut tigusarisimavaat, taarsigassarsisitsisarnerit akisoorujussuarmik taarsigassarsigasuartarnernut, Danmarkimi oqallisaaqisunut inuppassuarnillu akiitsoqalersitsisartunut naapertuupput, Jens Napaattooq oqarpoq.

Taanna isumaqarpoq, Aalisartunut aningaaserivittut ittumik, aalisarnermi pitsaasumik atugaqarnissamik qulakkeerinnittussamik Namminersorlutik Oqartussat pilersitsisinnaanerat misissorneqartariaqartoq.

- Nalunngilarput erniaritinneqartartut appasissuusut. Aalisartunut aningaaseriveqarnikkut qulakkeerneqassaaq, aalisartut atortussaminnik angallatissaminnillu nutarterisinnaanerat. Soorunami aningaaserivik aningaasarsiornissamik tunngaveqarluni ingerlanneqartussaavoq, taarsigassarsisitsisarninilu erniatigut iluanaarniarfigisariaqanngilaa, politikkeri erseqqissaavoq.

Akuersissutit amerlassusaat

Taanna isumaqarpoq, Qeqertarsuup Tunuani qaleralinniarneq ajalusoorluinnartoq misissorneqartariaqartoq. Akerlianilli qularnaarlugu oqaatigisinnaanngilaa, umiatsiaararsorlutik aalisartunut akuersissutinik amerlavallaanik tunniussisoqarsimasoq.

- Biologit oqaatiginikuuaat, Upernaviup eqqaani qaleraleqarpaallaanngitsoq. Maannali umiatsiaararsorlutik aalisartut aalajaatsumik misissuisarnerisa takutippaat naammattorsuarnik qaleraleqartoq. Biologit inassuteqaataat tamatigut tatigineqartariaqanngillat, Jens Napaattooq isumaqarpoq.

Demokraatit

Steen Lyngep Demokraatineersup aamma Grønlandsbankenip aalajangersimanera illersorpaa.

- Demokraatinit GrønlandsBanken A/S-ip akisussaaffimminik ilaginnaasimaneragaanera imaluunniit politikkimut akulerunneragaanera isumaqatigineqanngilaq.

Demokraaatit akerlianik isumaqarput, politikkerit suliffeqarfiit politikkimut akulerullutik aalajangiinerarlugit aamma/imaluunniit ingasattumik piumasaqarnerarlugit ulluinnarni ingerlanneqarnerannut akuleruttussaanngitsut, Steen Lynge tusagassiorfinnut nalunaaruteqarnermini oqarpoq.

Steen Lyngep erseqqissaatigaa, aningaaseriviit taarsigassarsiassanik itigartinneqarsinnaasunik nalilersuigaangamik pisussaaffigigaat eqqortumik siunnersuinissaq.

Grønlandbankenip aalajangiinera pillugu ilanngutassiat tamaasa uani takukkit: Malinnaagit

Nalinginnaasoq

- Aningaaserivik tamatuma akerlianik iliuuseqaruni akisussaaffimminik aatsaat ilaginnaassaaq, Steen Lynge erseqqissaaavoq.

Powered by Labrador CMS