Skip to main content

Partii Naleraq: Nunaqarfiit attatiinnarneqarlik

Partii Naleqqami silittaasup Inuit Ataqatigiit sinnerllugit folketingimi ilaasortap Aaja Chemnitz Larsenip nunaqarfiit pissusiviusut naapertorlugit matuneqartarnisaannik isumassarsisimanera akuerisinnaanngilluinnarpaa.

Folketingi ammarnersiorlugu oqallinnermut atatillugu Inuit Ataqatigiinnit Folketingimi ilaasortaatitatp siunnersuutigaa, nunaqarfiit innuttaasa ikiliartornerat naapertorlugu matuneqartarnissaat.

Aaja Chemnitz Larsen isumaqarpoq, nunaqarfinni innuttaasut illoqarfinnut nutserneqarnni ikiorneqartariaqartut, nunaqarfiillu matuneqartarnerisigut atugarissaartuussuseq qaffatsinneqarsinnaasoq. Tamatumunngali Partii Naleqqami siulittaasoq Hans Enoksen isumaqataanngilluinnarpoq.

- Maani nutasinni nunaqarfinni innuttaasunut taamatut ataqqinninngitsigisoqarnera aamma taamak nikassaarpasitigisumik politikkeqartoqarnera akuersaarsinnaanngilarput.

- Inuit sumiluunniit najugaqarnissamut kiffaanngissuseqarnerat ataqqivarput, taamaammat akuersaarsinnaanngilluinnarparput najugaqarfimminnit nuannarisaminnit pingitsaalisaallutik nuutsinneqarnissaat, partiimi siulittaasoq Hans Enoksen tusagassiorfinnut nalunaaruteqarluni allappoq.

Pissusiviusut naapertorlugit matusisoqarneq ajortoq

Partii Naleraq naapertorlugu illoqarfimmik nunaqarfimmilluunniit pissusiviusut naapertorlugit mautusisoqarsinnaanngilaq. Taakku isumaqarput kiffaanngissuseqarluni nammineq nuuttoqarlunilu pingitsaalisaasumik nuuttoqartartoq.

Aaja Chemnitz Larsenimit ilaatigut atugarissaartuuneq, inatsiseqarneq kiisalu innuttaasut peqqissusaat ernummatigineqarput. Tamanatumunngali Partii Naleraq peqataarusunngilaq.

- Isumaqarpugut nunaqarfinni innuttaasut peqqissuutillugik illoqarfinni innuttaasunut sanilliullutik arlalitsigut pitsaanerujussuarmik inuuneqartut, tamattalumi inuunitta annersaani peqqissuusarpugut. Nunaqarfinni kultureqarpoq sumiiffinni allani taarsersinnaanngisatsinnik, Hans Enoksen Sermitsiaq.AG-mut oqarpoq.

Illoqarfinni anginerusuni inuuneq pitsaanerujuaannanngitsoq

- Eqqaamasariaqarparput nunaqarfinni innuttaasorpassuit atugarissaarluarlutik inuullutillu aningaasarsiorluarmata, kulturitsinnik pitsaasumik ingerlatsillutillu peqqissuullutik inuullutik, siulittaasoq oqarpoq.

- Aamma illoqarfinnut nuuttut tamarmik pitsaanerusumik augaqalerneq ajorput, taassuma erseqqissaatigaa.

Sermitsiaq.AG-p apeqqutigisimavaa, nunaqarfimmi innuttaasut amerlanersaat allamut nuussimatillugit, kiffartuussisarneq qanoq sivisutigisumik atuutsinneqartassanersoq.

Nunaqarfiit attatiinnarneqassappata inuit qassit nunaqarfimmi najugaqartariaqarpat?   

- Nunaqarfiit attatiinnarusullugillu ineriartortikkusuppavut, taamaammat nunaqarfimmi innuttaasut qanoq amerlatiginissaannik apeqqut eqqarsaatiginngilarput, Hans Enoksen oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER