Partii Naleraq: Naleraqqap 1.199 meterinik piumasaqarnini aalajangiusimavaa
Jens Napaattooq, Partii Naleqqap angallannermut oqaaseqartartua, erseqqissaavoq, mittarfiit takissusissaasa allaanerusut sukumiisumik misissorneqarnissaat suli pingaaruteqartorujussuusoq
Taamaalilluni partii isumaqartuarsinnarpoq, Kalaallit Nunatsinni mittarfissualiornissamut pilersaarutit suliallu allanngortinneqartariaqartut, taamaaliornikkut 2x2.200 meterinik aammalu 1x1.500 meterimik pilersaarutit suliniutillu taarserneqarsinnaaniassammata 1.199 meterinik, Sermitsiaq allappoq.
Mittarfiit naannerusut
Partii isumaqarpoq, mittarfiit minnerusut sineriammi sanaartorneqarnissaat aammalu Kangerlussuup Narsarsuullu piuinnarnissaat imminut akilersinnaanerussasoq.
– Naalakkersuisooqatigiinnissamik isumaqatigiinniarnerni mittarfissuarnut pilersaarutini takissusissaannik allassimasut peertinnissaat, uagut piumasaraarput. Isumaqatigiissutissatut missingiummi allassimagaluarpoq Nuummi Ilulissanilu mittarfiit 2.200 meterinik takissusilerneqassasut aammalu Qaqortumi mittarfissaq 1.500 meteriussasoq. Nuannaarutigaarput mittarfiit takissusissaasa aalajangiunneqarnissaannut allaanerusumik siunnerfeqarsinnaaneq ammaanneqarmat, kisianni soorunami misissuinerit sukumiisut tunngavigalugit mittarfissualiornissamut pilersaarutit allanngortinneqassagunik allanngortinneqassapput, Partii Naleqqap angallannermut oqaaseqartartua, Jens Napaattooq oqarpoq.
Partii avissaartuutinngilaq
Jens Napaattuup erseqqissaatigerusuppaa, partii avissaartuutinngitsoq, paarlattuanilli isumaqatigeeqqissaarluni partiip nutaamik 1.199 meterinik takissusiliinissamut politikkeqarneranut ataatsimoortoq.
Allaaserineqartoq aviisimi Sermitsiami tallimanngormat saqqummersumi tamakkiisumik atuarneqarsinnaavoq. Aviisi uani pisiariuk: