Partii Naleraq: Air Greenlandip pisiarineqarnera akilersinnaanngilaq
Namminersorlutik Oqartussat danskit naalakkersuisuisa SAS-illu Air Greenlandimut piginneqataassutaannik pisinerat inuiaqatigiinnut atuisunullu akisoorujussuussaaq. Partii Naleraq taama isumaqarpoq.
Namminersorlutik Oqartussat Air Greenlandimik kisimik piginnittunngorput, Naalakkersuisummi SAS-imut danskillu naalakkersuisuinut pisinissamut ullumi isumaqatigiissuteqarput.
Taamalli isumaqatigiissuteqarneq Partii Naleqqamut nuannersuunngilaq. Jens Napaattooq, Inatsisartuni aningaasaqarnermut ataatsimiititaliami ilaasortaasoq, isumaqarpoq Kalaallit Nunaat timmisartuutileqatigiiffimmik kisiartaalluni piginnittunngornera imminut akilersinnaanngitsoq.
- Maannakkut innuttaasut atuisullu annaasaqartussanngorlugit aningaasat nunatsinninngaaniit anninneqartussat annertunerusut pinissaanut inissiisoqarluni aaqqiiniartoqaqqilernera Partii Naleqqaminngaaniit akuersaarsinnaanngilluinnarparput, Jens Napaattooq tusagassiutinut nalunaaruteqarluni allappoq.
Danskit naalakkersuisuisa SAS’illu Air Greenlandimi piginneqatigiissutaannik pisinissaq Kalaallit Airportsimik piginneqatigiinnissamut isumaqatigiissummi, Naalakkersuisut Siulittaasuannit, Kim Kielsenimit ministeriunermillu Lars Løkke Rasmussenimit septemberimi 2018-imi atsiorneqartumi isumaqatigiissutaareerpoq.
Mittarfissuit pillugit isumaqatigiissut
Isumaqatigiissut atsiorneqarneranit qaammatit marluk qaangiummata mittarfissuassat pillugit isumaqatigiissut Inatsisartuni ataatsimiinnermi suliarineqarpoq. Isumaqatigiissut Inatsisartuni amerlanerussuteqartunit akuerineqarpoq, Air Greenlandimulli piginneqatigiissutit pisiarineqarnissaannut amerlanerussuteqartut isumaqataanatik.
Tamannalu Jens Napaattuup tusagassiutinut nalunaarummini erseqqissarpaa.
- Akiat apeqqusersunnguarnagu niuernitsialaanersorlu qulakkiinnguarnagu aaliangersaasoqartoq isumaqarpugut, allappoq.
Inuiaqatigiit aningaasaqarniarnerannut kingunissat
Air Greenlandimut piginneqatigiissutit pisiarineqarnerat, taamatullu Nuummi Ilulissanilu mittarfissuarnik talliliinissamut pilersaarutit, inuiaqatigiit aningaasaqarniarnerannut qanoq kinguneqassanersut Partii Naleqqamit Jens Napaattuup erseqqissumik paasisaqarfigerusuppaa.
- Partii Naleqqammiit tupaallaatigivarput piumassuseqartoqanngimmat inuiaqatigiinnut sunniutigisinnaasai qulaajarniarneqaqissaarumaneqanngimmata sunniutigisinnaasai Air Greenland pisiarianissaanut tunngatillugu.
- Ersarilluinnartumik saqqummiunneqartaarputtaaq mittarfissuit atuutilerpata Air Greenlandip timmisartuutai 1 milliardit koruunit angullugit akeqartumik nutarsartariaqartut, mittarfiliassap naappallaarnera pissutigalugu maannakkut timmisartuutigineqartoq tamakkiisumik atorneqarsinnaannginnera peqqutigalugu. Tassa kisermaassilluni ingerlatsinermini aningaasaliinermini aningaasat isertinneqaqqinnissaanik qulakkeeqqaanngivillugu.
- Aningaasarsiornerunngilaq aammalu taamatut iliorniarneq namminersortut ingerlatsilernissaanut periarfissiinerunngilaq akerlianilli pisortat ingerlatsineranik annertusaaqqinnerulluni. Pisortat taamatut ingerlataqarneruleqqinnerani maluginiagassaavoq innuttaasunut iluaqusiissussaanani akerlianik aningaasartuutissanik annertunerusunik innuttaasunut ajuusaarnaraluartumik tunniussinerummat, Jens Napaattooq allappoq.